استانا قالاسىندا وتكەن حالىقارالىق ۆولونتەرلەر فورۋمىنا الەمنىڭ 34 مەملەكەتىنەن 140 حالىقارالىق ۇيىم وكىلدەرى مەن شەتەلدىك قاتىسۋشىلار جينالدى. فورۋم اياسىندا ۆولونتەرلەردىڭ قىزمەتىنە قاتىستى ءتۇرلى تاقىرىپ 11 پانەلدىك سەسسيا بارىسىندا ورتاعا سالىنىپ, تالقىلاندى.
ەكى كۇن قاتارىنان ەلورداداعى فورۋمدا ۆولونتەرلىك قوزعالىستى قولداۋ, ءوزارا تاجىريبە الماسۋ, سونىمەن قاتار, ۆولونتەرلەردىڭ مارتەبەسىن ارتتىرىپ, حالىقارالىق ىنتىماقتاستىق پەن ءوزارا ءىس-ارەكەتتى نىعايتۋ ماسەلەلەرى كەڭىنەن ءسوز بولدى. حالىقارالىق فورۋم ادامگەرشىلىكتىڭ اسىلى – وزگەگە جانە ەلىنە قول ۇشىن سوزىپ, ونىڭ تاعدىرى ءۇشىن كۇرەسۋدىڭ ءمان-ماعىناسىن اشۋ ماقساتىندا ءوتتى. القالى جيىندا 400-دەن استام ادام جيىلدى.
«حالىقارالىق ۆولونتەرلىك باستامالار: تاسىلدەر مەن تاجىريبەلەر» اتتى ءبىرىنشى سەسسيادا جيىنعا قاتىسۋشىلار حالىقارالىق ۆولونتەرلىكتىڭ دامۋ ماڭىزىنا توقتالىپ, وتاندىق جانە ءىرى شەتەلدىك ۇيىمداردىڭ وكىلدەرى قايرات سارىباي, داۋرەن اباەۆ, ميكاەلا فريبەرگ-ستوري, رونني ليندستروم, ەميليا اسادوۆا, كاتارينا يارۆي جانە باسقالار ءسوز سويلەدى. ساراپشىلار حالىقارالىق ۆولونتەرلىكتىڭ بەلسەندى دامىپ كەلە جاتقانىن اتاپ ءوتتى. ماسەلەن, بۇۇ دامۋ باعدارلاماسىمەن جۇمىس اياسىندا 7 قازاقستاندىق ۆولونتەر يوردانيا, كەنيا, تايلاند پەن تۇركياداعى بۇۇ-نىڭ ءتۇرلى قۇرىلىمىندا جۇمىس ىستەدى. بۇل شارا ءبىزدىڭ ەلگە ۆولونتەرلىك قىزمەت سالاسىندا الەمدىك وڭ تاجىريبەنى ەنگىزۋگە مۇمكىندىك بەردى. سەسسيا اشىلۋىندا ءسوز العان تمد باس حاتشىسىنىڭ ورىنباسارى داۋرەن اباەۆ ەرىكتىلەر قوزعالىسى قوعامنىڭ ءار سالاسىنداعى تۇيتكىلدەردى ءتيىمدى تۇردە شەشۋگە مۇمكىندىك بەرەتىن ماڭىزدى الەۋمەتتىك ينستيتۋت ەكەنىن ايتتى. سەنات توراعاسى ماۋلەن اشىمباەۆتىڭ فورۋم قاتىسۋشىلارىنا ارناعان حاتىن سەناتور نۇرتورە ءجۇسىپ وقىپ بەردى.
– پرەزيدەنت قاسىم-جومارت توقاەۆتىڭ باستاماسىمەن قازاقستاندا 2020 جىل «ۆولونتەرلەر جىلى» دەپ جاريالاندى. مۇنداي قادام ەلىمىزگە ارتىلعان باعىتتىڭ كەڭ قانات جايۋىنا تىڭ سەرپىن بەرەدى. ناتيجەسىندە جاڭا جوبالار قولعا الىنىپ, ءساتتى ىسكە اسا باستادى. بۇگىنگى فورۋم دا سونىڭ ءبىر ناقتى ناتيجەسى دەپ ايتۋعا بولادى. ءارى قاراي دامۋ ءۇشىن ەرىكتىلەردىڭ قىزمەتى زور, – دەدى ول.
حالىقارالىق فورۋم اياسىندا توتەنشە جاعدايلار كەزىندەگى ۆولونتەرلەردىڭ ۇلەسى تاقىرىبىنا ايرىقشا نازار اۋدارىلدى. «توتەنشە جاعدايلار كەزىندەگى ۆولونتەرلىك» سەسسياسى بارىسىندا قازاقستان مەن تۇركيا مەملەكەتتىك ورگاندارىنىڭ, ەۋروپا جانە تمد ەلدەرىنىڭ, شەتەلدىك ۇيىمداردىڭ وكىلدەرى ءسوز سويلەدى. فورۋمعا قاتىسقان توتەنشە جاعدايلار ءمينيسترى سىرىم ءشارىپحانوۆ پاندەميا جانە وتكەن جىلعى قوستاناي وبلىسى مەن بيىلعى اباي وبلىسىندا ورىن العان الاپات ءورت كەزىندە قاتەرگە قارسى كۇرەسكە جۇمىلعان ەرىكتىلەردىڭ ەرلىگىن ەرەكشە اتادى. ءمينيستردىڭ ايتۋىنشا, قوستاناي وبلىسىنداعى ءورت كەزىندە مىڭنان استام ۆولونتەر زارداپ شەككەندەرگە 1200 تونناعا جۋىق كومەك جيناپ, العاشقى قاجەت زاتتار مەن ازىق-تۇلىگى بار 150 ماشينا جىبەرگەن.
فورۋمنىڭ ەكىنشى كۇنىندە مەملەكەت باسشىسى قاسىم-جومارت توقاەۆ قاتىسىپ, ۆولونتەرلىك قوزعالىستى ۇزاقمەرزىمدى گرانت بەرۋ ارقىلى ىنتالاندىرۋ كەرەگىن ايتتى. پرەزيدەنت ۆولونتەر بولۋ, ەڭ الدىمەن, ءپاتريوتيزمنىڭ, ياعني وتانشىلدىقتىڭ جارقىن كورىنىسى دەپ سانايدى.
– ەرىكتىلەر ونەگەلى ىستەرى ارقىلى قوعامدى دامىتۋعا زور ۇلەس قوسادى. جاناشىرلىق – قازاقتىڭ قانىندا بار قاسيەت. حالقىمىز قيىندىققا تاپ بولعان ادامداردان كومەگىن اياماعان. ەل باسىنا كۇن تۋعان قيىن-قىستاۋ ساتتە «ءبىر جەڭنەن قول, ءبىر جاعادان باس شىعارا» بىلگەن. قازاقستانعا جەر اۋدارىلعان تالاي ەتنوس وكىلدەرىن باۋىرىنا باسىپ, بارىن بولىسكەن. سوندىقتان بۇگىنگى جيىننىڭ ماقساتى حالقىمىزدىڭ بولمىسىمەن ۇندەس ەكەنى ءسوزسىز, – دەدى مەملەكەت باسشىسى.
حالىقارالىق فورۋمنىڭ ەكىنشى كۇنى «الەۋمەتتىك ۆولونتەرلىك جانە ينكليۋزيا», «ءبىلىم بەرۋ جانە تسيفرلاندىرۋداعى ۆولونتەرلىك باستامالار», «جەدەل ۆولونتەرلىك كومەك: دەنساۋلىق ساقتاۋ سالاسىنداعى ۆولونتەرلەر ءرولى» اتتى سەسسيا وتىرىسى ءوتىپ, ونىڭ اياسىندا بىرقاتار ەرىكتى ءوز جوباسىن تانىستىردى.
