بيىل قازاقستان پرەزيدەنتى قاسىم-جومارت توقاەۆ 2020 جىلدى ەرىكتىلەر جىلى دەپ جاريالادى. قازىردە ەلىمىزدە 50 مىڭ بەلسەندى ازاماتى بار 200 ۆولونتەرلىك ۇيىم جۇمىس ىستەيدى. ال نۇر-سۇلتان قالاسى اكىمدىگىنىڭ «استانا جاستارى» مەكەمەسىندە 5 مىڭنان اسا ەرىكتى قايىرىمدىلىقپەن اينالىسادى.
«استانا جاستارى» جاستار رەسۋرستىق ورتالىعىنىڭ ەرىكتىلەرى «30 يگى ءىس» اكتسياسى اياسىندا مۇقتاج جانە كوپبالالى 100 وتباسى مەن زەينەتكەرلەرگە ازىق-تۇلىك تاراتتى. بۇل ءىس-شارانى جوعارىدا اتالعان ورتالىقتىڭ قولداۋىمەن جاستار ساياساتى ماسەلەلەرى باسقارماسى, الماتى اۋدانى اكىمدىگى جانە «وتباسى مەكتەبى» قورى ۇيىمداستىردى.
اكتسياعا 60-تان استام ەرىكتىلەر قاتىستى. ازىق-تۇلىكتى جەتكىزۋدى «استانا جاستارى» ەرىكتىلەرى, اۆتو جانە مەديا ەرىكتىلەرى, قالالىق ەرىكتىلەر شتابىنىڭ وكىلدەرى, سونداي-اق كومەكتەسۋگە نيەت بىلدىرگەن جاندار جۇزەگە اسىردى. ءىس-شارا بارلىق سانيتارلىق نورمالارعا سايكەس ءوتتى.
«مۇنداي اكتسيالار ءبىرىنشى رەت وتكىزىلىپ وتىرعان جوق. قولداۋ كورسەتۋ جانە مۇقتاج ادامداردىڭ قانداي دا ءبىر جاعدايدا جالعىزدىق سەزىنبەۋىن قامتاماسىز ەتۋ – ءبىزدىڭ قولىمىزدا. ەرىكتىلەر ءۇشىن ەل ريزاشىلىعىنان ارتىق سىي جوق» دەدى «استانا جاستارى» باسشىسىنىڭ ورىنباسارى ايان ەرمەنتاەۆ.
