بيىل كسرو حالىق ءارتىسى, قازاقستاننىڭ ەڭبەك ەرى, پروفەسسور, قازاق كسر مەملەكەتتىك سىيلىعىنىڭ لاۋرەاتى ەركەعالي راحماديەۆتىڭ تۋعانىنا 85 جىل تولدى. وسىعان وراي «استانا وپەرا» تەاترىندا كورنەكتى كومپوزيتوردى ەسكە الۋعا ارنالعان «تۋعان جەر تۋرالى جىر» اتتى كونتسەرت ءوتتى. وندا تەاتردىڭ جەتەكشى وپەرا سوليستەرى, وركەستر جانە كامەرالىق حور ارتىستەرى كلاسسيكتىڭ شىعارمالارىن ورىندادى.
ەركەعالي راحماديەۆ مۋزىكا ونەرىنىڭ ءبىراز جانرلارىندا ەڭبەك ەتتى. اسىرەسە, ۇلتتىق وپەرا ونەرىنىڭ دامۋىنا ەلەۋلى ۇلەس قوسىپ, سيمفونيالىق كۇي جانرىنىڭ نەگىزىن قالادى. وسى جانردا «دايراباي», «قۇداشا-دۋمان» تۋىندىلارىن جازدى. كومپوزيتوردىڭ «قامار سۇلۋ», «الپامىس», «ابىلايحان» وپەرالارى قازاق مۋزىكا مادەنيەتىنىڭ اسقاق بيىگىنە اينالدى.
ەسكە الۋ كەشىندە «تاڭ سامالى», «بالا عاشىق», «جەتىسۋدىڭ قىزدارى-اي» تۋىندىلارى, «قامار-سۇلۋ» وپەراسىنان دۋەت, «الپامىس» وپەراسىنان گۇلبارشىن ارياسى, حور كومپوزيتسيالارى جانە وزگە دە شىعارمالار شىرقالدى.
كونتسەرتكە وپەرا مەترى قازاقستاننىڭ ەڭبەك سىڭىرگەن ءارتىسى شاحيماردان ءابىل, قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ, «استانا وپەرانىڭ» جەتەكشى سوليستەرى – قازاقستاننىڭ ەڭبەك سىڭىرگەن قايراتكەرلەرى جۇپار عابدۋللينا (سوپرانو), مەدەت شوتاباەۆ (تەنور), تەاتر سوليستەرى – قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق, حالىقارالىق بايقاۋلاردىڭ لاۋرەاتتارى ايزادا كاپونوۆا, بەيىمبەت تاڭارىقوۆ قاتىستى. سونىمەن قاتار تالانتتى جاس ۆوكاليستەر – ە.راحماديەۆ اتىنداعى حالىقارالىق بايقاۋدىڭ لاۋرەاتتارى ۇلپان اۋباكىروۆا, المات ىزبامبەتوۆ, ەربول مۇقانوۆ, حالىقارالىق بايقاۋلاردىڭ لاۋرەاتى ەرمەك قاسىم ونەر كورسەتتى. حورعا باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ جەتەكشىلىك ەتتى, فورتەپيانو پارتياسىن حالىقارالىق بايقاۋلاردىڭ لاۋرەاتى راۋشان بەسكەمپىروۆا ورىندادى.
«ەركەعالي راحماديەۆتىڭ شىعارماشىلىق قۋاتى قازاقستاندىق مۋزىكانتتاردىڭ كەيىنگى بۋىنىنا شابىت سىيلاپ, قاناتتاندىردى. كورنەكتى كومپوزيتور جىلدار بويى جيناعان ءبىلىم مەن تاجىريبەسىن ارىپتەستەرى, شاكىرتتەرىمەن ءبولىستى. ءوز شىعارمالارىن ءتۇسىندىرىپ, جاس انشىلەرمەن جەكە جۇمىس ىستەدى. ماسەلەن, ماعان جانە مەدەت شوتاباەۆ, ازامات جىلتىركوزوۆ سىندى ارىپتەستەرىمە تۋىندىنى ساحنالاعاندا ءبىراز اقىل-كەڭەس بەردى. سول ءبارىمىز «قامار-سۇلۋ» وپەراسىنىڭ ساحنالانۋىنا تىكەلەي قاتىسقان ەدىك. ەركەعالي راحماديەۆ جازعان تۋىندىلار – كەلەر ۇرپاققا بيىك بەلەس, ەسكىرمەس ونەگە. ونىڭ سازدى مۋزىكاسى جۇرەگىمىزدە شىرقالاتىن بولادى» دەيدى جۇپار عابدۋللينا.
امانعالي قالجانوۆ
