قىزمەتتىك بورىشىن اتقارۋ ۇستىندە كورسەتكەن ەرجۇرەكتىگى مەن جانقيارلىعى ءۇشىن اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ «وحوتزووپروم» ءوب» رمقك ورتالىق وڭىرلىك فيليالىنىڭ ينسپەكتورى مارقۇم ەرلان نۇرعاليەۆ پەن ونىڭ ارىپتەسى پەتر نيتسىك III دارەجەلى «بارىس» وردەنىمەن ناگرادتالدى.
وسىناۋ اقجولتاي اقپاراتتى كەشە akorda.kz سايتى تاراتتى. پرەزيدەنت بۇل قاۋلىعا 31 قاڭتار كۇنى قول قويىپتى.
ەستەرىڭىزگە سالساق, 13 قاڭتاردا Toyota Land Cruiser كولىگىندەگى بەلگىسىز ادامدار ينسپەكتورلار ەرلان نۇرعاليەۆ پەن پەتر نيتسىككە قارسىلىق تانىتىپ, ولاردى سوققىعا جىعىپ, ارتىنشا ءىز جاسىرعان. اۋىر جارالانعان ەكى ينسپەكتوردى كەيىن وزگە ارىپتەستەرى تاۋىپ الىپ, ولاردى استاناداعى №1 قالالىق اۋرۋحاناعا جەتكىزگەن. ءبىر تاۋلىكتەن ارتىق ەس-ءتۇسسىز جاتقان ەرلان نۇرعاليەۆ 15 قاڭتار كۇنى قايتىس بولعان ەدى.
جەر بەتىندە جويىلىپ بارا جاتقان كيەلى اڭ اقبوكەندەردى جانىن سالا قورعايمىن دەپ براكونەرلەردىڭ قولىنان قازا تاپقان ەرلان نۇرعاليەۆتىڭ ەرلىگى تۋرالى جانە قاراقشىلاردىڭ ءتيىستى دەڭگەيدە جازالانۋى كەرەكتىگى جايلى ارىپتەسىمىز تولەن تىلەۋباي «ەكى اياقتى ايۋانمەن ارپالىس» اتتى تاقىرىپپەن گازەت بەتىندە تالاي مارتە باستاما كوتەرگەن بولاتىن.
بەيبىت كۇندە تابيعاتتى قورعاۋ جولىندا جانىن قيعان ەرلان نۇرعاليەۆتىڭ ەرەن ەرلىگى تۋرالى ماقالالار الداعى ۋاقىتتا اعىلشىن, نەمىس, يسپان, پولياك تىلدەرىنە دە اۋدارىلىپ, الەمدىك ءباسپاسوز بەتتەرىندە جاريالانباق.
