نۇر-سۇلتان قالاسىنىڭ اكىمى التاي كولگىنوۆ مەملەكەت باسشىسىنىڭ جارلىعىنا سايكەس ارىس قالاسىن قالپىنا كەلتىرۋ جۇمىستارىنا قاتىسقان دەنساۋلىق ساقتاۋ, ءبىلىم, كولىك, قۇرىلىس سالاسىنداعى ازاماتتاردى, قوعامدىق ۇيىمدار مەن استانالىقتاردى مەملەكەتتىك ناگرادالارمەن ماراپاتتادى.
التاي كولگىنوۆ جيىنعا قاتىسۋشىلاردى تاۋەلسىزدىك كۇنىمەن قۇتتىقتاپ, ەلىمىزدىڭ, قالامىزدىڭ يگىلىگى جولىندا اتقارىپ جۇرگەن ءارى جاۋاپتى, ءارى ىزگى ەڭبەكتەرىنە العىسىن ءبىلدىردى. «ءبىزدىڭ ەلوردامىز – تاۋەلسىزدىگىمىزدىڭ سيمۆولى. ەلباسىمىز نۇرسۇلتان ءابىشۇلى نازارباەۆتىڭ سارابدال ساياساتىنىڭ ارقاسىندا ەلوردامىز مەملەكەتىمىزدىڭ الەۋمەتتىك-ەكونوميكالىق جانە ساياسي جەتىستىكتەرىن ايشىقتايتىن جارقىن قالاعا اينالدى. قر پرەزيدەنتى قاسىم-جومارت كەمەلۇلى توقاەۆ تاۋەلسىزدىك جولىن جەتىستىكتەرمەن جالعاستىرىپ, جۇمىس اتقارۋىمىز كەرەكتىگىن اتاپ ءوتتى. قالامىزدىڭ, ەلىمىزدىڭ دامۋىنا ءاربىر ازامات ۇلەس قوسىپ وتىر. ەلوردامىز كۇنى-ءتۇنى تىنباي قار تازالاپ, ەڭبەك ەتەتىن كوممۋنالدىق قىزمەتتەردىڭ, ءاربىر ۇيگە جىلۋ جەتۋى ءۇشىن ەڭبەك ەتەتىن جەو قىزمەتكەرلەرىنىڭ, ادام ءومىرى ءۇشىن ءار ءسات سايىن كۇرەسەتىن دارىگەرلەردىڭ ارقاسىندا ءوسىپ-وركەندەپ, دامۋ ۇستىندە. ۇستازدار قاۋىمى, قۇرىلىسشىلار, ەلەكتريك, سانتەحنيكتەر, جۇرگىزۋشىلەر, ءاربىرىڭىزدىڭ ەرەن ەڭبەگىڭىز جاتىر. ءبىز سىزدەردىڭ ەڭبەكتەرىڭىزدى باعالايمىز, قۇرمەتتەيمىز» دەدى ەلوردا اكىمى.
«قۇرمەت» وردەنىمەن جوعارى ساناتتى دارىگەر قۋاتبەك عابدۋللين, ەڭبەك ارداگەرى مۇرات يرگيباەۆ, حيميا عىلىمدارىنىڭ دوكتورى راۋشان سارمۋرزينا ماراپاتتالدى. سۋمەن جابدىقتاۋ قىزمەتىنىڭ سلەسارى روبەرت رامازانوۆ ءىىى دارەجەلى «ەڭبەك داڭقى» وردەنىن الدى.
ارىس قالاسىن ەلەكترمەن جابدىقتاۋدا قالپىنا كەلتىرۋ, جوندەۋ جۇمىستارىنا قاتىسقان مارقۇم ەرمەك تيۋتيۋبەكوۆكە «ەرلىگى ءۇشىن» مەدالى بەرىلدى. ەرمەك تيۋتيۋبەكوۆ 2019 جىلى 8 تامىزدا ارىس-شىمكەنت تراسساسىندا بولعان جول-كولىك اپاتى سالدارىنان قايتىس بولعان ەدى.
بيىل ناۋرىز ايىندا قالادا بولعان ءىرى جول-كولىك وقيعاسى كەزىندە زارداپ شەككەندەرگە كومەك كورسەتكەن 24 جاسار الىبەك باقداۋلەت قۇرمەت گراموتاسىمەن ماراپاتتالدى. ءوزى دە قوعامدىق كولىكتە جۇرگىزۋشى بولىپ جۇمىس ىستەيتىن الىبەك سول كۇنى جولاۋشىلار ساپىندا بولعان ەدى. «يگىلىكتى ءىس جاساۋ ءۇشىن جوعارى قىزمەتتە وتىرۋ مىندەت ەمەس, «ءاربىر ادام – قوعام ءۇشىن پايدالى بولا الادى» دەيدى ول.
سونداي-اق بىرقاتار استانالىقتار «پاراسات» وردەنىمەن, «ەرەن ەڭبەگى ءۇشىن», «شاپاعات» توسبەلگىلەرىمەن, العىس حاتتارمەن ماراپاتتالدى. ماراپاتتاۋدىڭ سوڭىنان ەلوردا تۇرعىندارى مەن قوناقتارى ءۇشىن تاۋەلسىزدىك كۇنىنە وراي مەرەكەلىك كونتسەرت ۇيىمداستىرىلدى.
