ەلوردانىڭ 25 جىلدىعىنا وراي «Esil Music Time» اتاۋىمەن اشىق اسپان استىندا فەستيۆال ءوتتى. كونتسەرت بارىسىندا تاۋەلسىزدىك جىلدارىندا جازىلعان حيت اندەر مۋزىكالىق جاڭا فورمادا بەرىلدى.
فەستيۆالدىڭ ماقساتى – قازاقتىڭ ەسكى اندەرىنە جاڭا دەم بەرۋ, حالىقتىڭ قۇلاعىنا سىڭگەن سۇيىكتى اندەرمەن ادەمى اسەر جانە ەرەكشە كوڭىل كۇي سىيلاۋ. ونەر تۋىندىلارى ارقىلى قازاقستاندىق پاتريوتيزم مەن ۇلتتىق مادەنيەتكە دەگەن ءسۇيىسپەنشىلىكتى قالىپتاستىرۋ, قازاق تىلىنە دەگەن قۇرمەتتى اندەر ارقىلى وياتۋ.
فەستيۆال قاتىسۋشىلارى قازاقتىڭ بەلگىلى كومپوزيتورلارىنىڭ شىعارمالارىنا جاڭا ءومىر بەرۋگە تىرىسىپ, جاڭا زاماناۋي نۇسقادا ۇسىندى. اتاپ ايتقاندا, ەسكەندىر حاسانعاليەۆتىڭ «بوزتورعاي» ءانى, «مۋزارت» توبىنىڭ رەپەرتۋارىنداعى, باسقا دا تانىمال اندەر شىرقالدى.
كەشتە بەيبىت قورعان, الىشەر كارىموۆ, قازىبەك قۇرايىش, ەركەش حاسەن, مارحابا ءسابي, امىرە, Ayree, Sadraddin, Qanay, Kalifarniya, Rau, «دومينو» توبى, ديلناز احماديەۆا, ت. ب. بەلگىلى ەسترادا انشىلەرى ونەر كورسەتتى.
