ۇلتتىق مۋزەيدە ەلوردا اكىمدىگى مەن قازاقستان جازۋشىلار وداعىنىڭ استانالىق فيليالى جانە «التىن قازىنا» قوعامدىق بىرلەستىگىنىڭ ۇيىمداستىرۋىمەن قالا كۇنىنە وراي «ەۋرازيا استانالارىنىڭ قالامگەرلەرى» اتتى ەكى كۇندىك حالىقارالىق فورۋم ءوتتى.
بۇل ايتۋلى شارادا وتاندىق قالامگەرلەر مەن 20 ەلدەن كەلگەن اقىن-جازۋشىلار كوركەم ادەبيەتتىڭ وزەكتى ماسەلەلەرىن تالقىلادى.
فورۋمنىڭ اشىلۋىندا «نۇر-سۇلتان» قالاسىنىڭ اكىمى التاي كولگىنوۆ قاتىسىپ, اقىن-جازۋشىلارعا ىزگى لەبىزىن ءبىلدىردى.
– بۇگىندە باس قالامىز الەمدىك ەكونوميكا, ءدىن, ساياسات, مادەنيەت جانە عىلىم وكىلدەرى باس قوسىپ, ماڭىزدى شەشىمدەر قابىلدايتىن ورىنعا اينالدى. بۇگىنگى ءىس-شارانىڭ ءوتۋى – سونىڭ ايعاعى. ساۋلەتى مەن داۋلەتى كەلىسكەن ەلوردامىزدىڭ رۋحاني قالىپتاسۋىنا زيالى قاۋىم وكىلدەرى ايتارلىقتاي ۇلەسىن قوسۋدا. زاڭعار جازۋشى مۇحتار اۋەزوۆ «ادەبيەت – اردىڭ ءىسى» دەگەن ەكەن. ادەبيەت سالاسىنىڭ وركەندەۋى, وقىرماندار قىزىعىپ وقيتىن كوركەم ەڭبەكتەردىڭ جازىلۋى – ءبىز ءۇشىن اسا قاجەت دۇنيە. بۇگىنگى فورۋمدا الەمدىك ادەبيەتتىڭ جاي-كۇيى, تىلدىك ماسەلەلەر مەن قالامگەرلەرگە وزەك بولىپ جۇرگەن دۇنيەلەر وي-تالقىسىنا تۇسەدى دەپ سەنەمىن. سوندىقتان الىس جانە جاقىن شەتەلدەن كەلگەن اقىن-جازۋشىلارعا قازاق ەلىنىڭ جۇرەگى – نۇر-سۇلتان قالاسىنا قوش كەلدىڭىزدەر دەمەكپىن!» دەدى ەلوردا باسشىسى.
سونداي-اق جيىندا پرەزيدەنت كەڭەسشىسى مارات سقاقوۆ, مادەنيەت جانە سپورت ءمينيسترى اقتوتى رايىمقۇلوۆا, قازاقستاننىڭ حالىق جازۋشىسى, ەڭبەك ەرى ولجاس سۇلەيمەنوۆ, بەلگىلى جازۋشى, مەملەكەتتىك سىيلىقتىڭ يەگەرى اكىم تارازي ءسوز الىپ, فورۋمعا قاتىسۋشىلارعا ساتتىلىك تىلەدى.
جيىن ەكى پلەنارالىق وتىرىسقا ءبولىنىپ, قالامگەرلەر «الەمدىك ادەبيەت: ستەرەوتيپتەن ارىلۋ» جانە «مەگوپوليستەر ءومىرى: پروزاداعى كورىنىستەر» اتتى تاقىرىپتا وي قوزعادى. قازاقستان جازۋشىلار وداعىنىڭ ءبىرىنشى حاتشىسى ۇلىقبەك ەسداۋلەت قازاق اقىندارىنىڭ انتولوگياسىن يسپان تىلىنە اۋدارعان يسپانيا پەن-كلۋبىنىڭ باس حاتشىسى حۋستو حورحە پادرونعا حالىقارالىق «الاش» سىيلىعىن تاپسىردى.
