«قازاقستان» ورتالىق كونتسەرت زالىندا استانا قالاسى اكىمدىگىنىڭ قولداۋىمەن دۇرىلدەپ وتكەن «گاككۋ اۋەندەرى» كونتسەرتىندە «گاككۋ» تەلەارناسىنىڭ كورەرمەندەرى داۋىس بەرۋ ارقىلى ۇزدىك دەپ تانىعان قازاقستاندىق انشىلەر ارنا اتىنان ماراپاتتالدى.
گاككۋ دەگەندە قازاقتىڭ حالىق كومپوزيتورى ۇكىلى ىبىرايدىڭ شوقتىعى بيىك ءانى, وسىدان تۋرا 80 جىل بۇرىن ماسكەۋدە وتكەن قازاق مادەنيەتى مەن ونەرىنىڭ ون كۇندىگىندە حالقىمىزدىڭ بۇلبۇل ءانشىسى كۇلاش بايسەيىتوۆانىڭ وسى ءاندى شىرقاپ, تالعامپاز جۇرتتى تامساندىرعانى ەسكە تۇسەدى. قازىر زامان باسقا, كورەرمەن دە وزگەردى. شىنايى ونەر تۋىندىلارىنىڭ اراسىندا جەڭىل-جەلپى دۇنيەلەر كوپ كەتىپ جاتادى. «گاككۋ» تەلەارناسىنىڭ كونتسەرتىندە دە وسىنداي جايتتار ورىن الماي قويمادى. ۇلى ابايدىڭ «ءاننىڭ دە ەستىسى بار, ەسەرى بار, تىڭداۋشىنىڭ قۇلاعىن كەسەرى بار…», «قۇر ايعاي باقىرعان» دەگەنى سياقتى اندەر جانە بىزگە «بەتتى باستىم, قاتتى ساستىم» سەزىمىن كەشتىرگەن تۋىندىلار دا كەزدەستى.
ءبىر قۋانتارلىعى, اشىلعانىنا كوپ بولا قويماعان تەلەارنا «گاككۋ» سىندى تاريحي ءاندى ارقاۋ ەتىپ, جۇمىس ىستەپ كەلە جاتىر. بەلگىلى ءبىر بەينەكليپ قويىلاردىڭ الدىنداعى ۇزىلىستەردە دە بۇل ءان اۋەنىن ۇسىنىپ ءجۇر. تارقاتىپ ايتقاندا, «گاككۋ» ءانى تەلەارنانىڭ سۇيەنەر تىرەگى ىسپەتتەس تۋىندى. الايدا, شوۋ-بيزنەستىڭ دە ءوز زاڭى بار. اتالمىش ارنا سوعان سۇيەنۋگە ءماجبۇر. ونىڭ اشىلۋىنىڭ نەگىزگى ماقساتى دا – قازاقستاندىق دارىندى ورىنداۋشىلاردى قولداۋ, ولارعا بويىنداعى ونەرىن دامىتاتىن الاڭ ۇسىنۋ, سول ارقىلى وتاندىق مۋزىكانى العا جىلجىتۋ. بىراق, «كۇرىشتىڭ ارقاسىندا كۇرمەك سۋ ىشەدى». اسىل مەن جاسىقتى ايىراتىن باياعى كوركەمدىك كەڭەستەر قايتا قۇرىلمايىنشا, بۇگىنگى ەستراداداعى جاعداي وسىلاي جالعاسا بەرەتىن دە شىعار…
«گاككۋ» تەلەارناسى وسىنداي اۋقىمدى كونتسەرتتى ءبىرىنشى رەت ۇيىمداستىرماعانىن ايتا كەتەيىك. بىلتىر ارنا شاقىرعان انشىلەر الماتىدا 60 مىڭ ادامدى جيناپ, فەستيۆال وتكىزدى.
ال, ەلورداداعى كەش بيىلعى 18 مامىر كۇنى ءوتتى. بۇل – حالقىمىزدىڭ تالانتتى پەرزەنتى باتىرحان شۇكەنوۆتىڭ تۋعان كۇنى. كونتسەرتتە ءبىر ءسات باتىرحاننىڭ جانە تاياۋدا دۇنيەدەن وزعان بەلگىلى مۋزىكانت بولات سىزدىقوۆتىڭ اسىل بەينەلەرى ەسكە الىنىپ, ءالي وقاپوۆ ولاردىڭ رۋحىنا ارناپ ءان شىرقادى.
جالپى, كەشتە وتىزعا تارتا ءانشى ونەر كورسەتتى. ولاردىڭ اراسىندا بيىل حيت اندەردىڭ ءبىرى بولىپ وتىرعان تورەعالي تورەالى مەن ەركە ەسماحاننىڭ «اللو» ءانى كورەرمەن ۇناتقان تۋىندىلار جانە باسقا اندەر ايتىلدى. قايرات نۇرتاستىڭ ساحناعا شىققانى جينالعاندارعا ۇلكەن سىي بولدى. بۇدان وزگە, بەيبىت قۇشقاليەۆ, جانار دۇعالوۆا, سەرىك يبراگيموۆ, ماقپال يسابەكوۆا, كامشات جولدىباەۆا, ايقىن, ساندا, بۇركىت پەن ايشا, ايدانا مەدەنوۆا, باسقا دا كوپتەگەن انشىلەر ءان سالدى. وسى جىلى قايرات باەكەنوۆ پەن «فورمات» توبىنىڭ ساحناعا شىققانىنا 10 جىل, «رينگو» توبىنىڭ قۇرىلعانىنا 10 جىل, ءمادينا سادۋاقاسوۆانىڭ ونەردە ءجۇرگەنىنە 20 جىل تولىپ وتىر. وسى انشىلەرگە دە كورەرمەندەر قول شاپالاقتاپ, تەلەارنا اتىنان سىيلىقتار تارتىلدى.
امانعالي قالجانوۆ
