جاقىندا وتەتىن نۇر-سۇلتان قالاسى ءماسليحاتىنىڭ كەزەكتى سەسسياسىندا جەرگىلىكتى اتقارۋشى بيلىك تاراپىنان تۇرعىن ءۇي-كوممۋنالدىق شارۋاشىلىق سالاسىندا تۇرعىندارعا جايلى قالالىق ورتانى قالىپتاستىرۋ جانە دامىتۋ ءىسى قارالادى. سونىڭ قارساڭىندا ءماسليحات دەپۋتاتتارى بىرقاتار ماڭىزدى نىسانداردى ارالادى. الدىمەن ەلوردانى گازداندىرۋ جوباسىمەن تانىسىپ, ءتيىستى جۇمىستار كەستەگە ساي جۇرگىزىلىپ جاتقانىنا كوز جەتكىزدى.
بۇل جوبا ءۇش كەزەڭگە بولىنگەن. قازىر ءبىرىنشى كەزەڭ جۇمىستارى اتقارىلىپ جاتىر. وسى جىلدىڭ اياعىنا دەيىن گاز قۇبىرى 1-جەو جانە 3-جەو-عا تارتىلادى. ال 2-جەو بويىنشا جۇمىستار كەلەسى جىلى اياقتالادى. 3-جەو-نى 2021 جىلى پايدالانۋعا بەرۋ جوسپارلانىپ وتىر. الدىمىزداعى جىلدىڭ جىلىتۋ ماۋسىمى باستالعانشا گاز «كوكتال» شاعىن اۋدانىنا كەلۋى ءتيىس. قالاعا گاز كەلگەندە ءار تۇرعىن ءۇيدىڭ الدىنا ەسەپتەگىش قۇرال ورناتىلادى. وعان 2,2 ملرد تەڭگە ءبولىندى.
«استانا-اەك» اق بالانسىندا 54 مىڭنان استام شارتتى بىرلىك ەلەكترجەلىلەرى بار. بىراق قازىر كاسىپورىن 77 مىڭ بىرلىك جەلىلەرىنە قىزمەت كورسەتەدى. باسقارما توراعاسى سەرىك بالقىشەۆتىڭ ايتۋىنشا, ارتىق جەلىلەردى بالانسقا الۋ ءۇشىن بىرقاتار ماسەلەلەردى شەشۋ كەرەك. ەڭ الدىمەن شتاتتى كەڭەيتۋ قاجەت بولادى. ياعني, تاعى 100 ادامدى جۇمىسقا قابىلداۋ كەرەك.
قالاداعى ەلەكترجەلىلەردىڭ 60 پايىزى جەردىڭ استىمەن جۇرگىزىلدى. قازىر كابەلدەردىڭ جارىلۋى سەكىلدى اپاتتىق جاعدايلار ءجيى ورىن الىپ جاتىر. ونىڭ سەبەبى, وسى كۇندەرى قۇرىلىس كومپانيالارى جەر قازۋ جۇمىستارىن جۇرگىزگەندە ەنەرگەتيكتەرمەن دە, بايلانىسشىلارمەن دە كەلىسۋگە مىندەتتى ەمەس. ەنەرگەتيكتەر قالالىق ءماسليحات دەپۋتاتتارىنا بۇرىنعى جۇيەنى, ياعني بۇل جۇمىستاردى كەلىسىپ ىستەۋدى قايتارۋدى سۇرادى.
كۇيشى دينا, 44 مەكەنجايىندا تۇرعىن ءۇي قورىن جاڭعىرتۋ بويىنشا جۇمىستار جۇرگىزىلدى. كوپپاتەرلى ۇيگە تۇتاستاي كۇردەلى جوندەۋ جاسالدى. قاسبەتى مەن شاتىرى, پودەزدەر جاڭالاندى. جەرتولەدەگى سۋمەن جانە جىلۋمەن قامتاماسىز ەتۋ جۇيەلەرى زامانعا ساي ۇنەمدەۋگە مۇمكىندىك بەرەتىن قوندىرعىلارعا اۋىستىرىلدى.
ال ق.ساتباەۆ, 25 مەكەنجايىندا پيك جاقسى جۇمىس ىستەپ جاتىر. پيك مۇشەلەرىنىڭ قاتارىنا ءۇيدىڭ بەلسەندى تۇرعىندارى سايلاندى. مۇنداعى بار ماسەلەلەر جىلدام شەشىلىپ جاتىر. تەحنيكالىق قىزمەت كورسەتۋ ءۇشىن شارشى مەتردەن 35 تەڭگەدەن جينالىپ, اعىمداعى جوندەۋ جۇمىستارى جاسالدى, پودەزدەرگە بەينەكامەرالار ورناتىلدى.
نىسانداردى ارالاۋدىڭ قورىتىندىسىندا ءماسليحات دەپۋتاتتارى ۇسىنىستارىن ايتتى. انىقتالعان ماسەلەلەر الدىمەن ءماسليحاتتىڭ تۇراقتى كوميسسيالارىنىڭ وتىرىسىندا قارالادى. ودان كەيىن سەسسياعا شىعارىلادى.
