سارىارقا اۋدانىندا گاز تۇتىنۋشىلار سانى كۇننەن كۇنگە ارتىپ جاتىر. قازىر وسى اۋدان اۋماعىنداعى «كوكتال-1», «كوكتال-2» جانە «اگروقالاشىق» تۇرعىن الاپتارىنا كوگىلدىر وتىن تولىقتاي تارتىلدى. بىراق وسى كۇندەرى گازدىڭ قاتىپ قالۋ جاعدايلارى كەزدەسىپ وتىر.
– گازدى تەك ءبىر جىل كولەمىندە عانا پايدالانىپ وتىرمىز. بۇعان بايلانىستى پروبلەمالار وسى سەبەپتەن تۋىندادى. ياعني, ءتيىستى تاجىريبەمىز جوق. جاقىندا «كوكتال-1» تۇرعىندارىمەن جۇزدەسۋدە وسى ماسەلەنى «ينتەرگاز» كومپانياسىنىڭ باسشىسى قوستاناي جانە قىزىلوردا وبلىستارىنىڭ تاجىريبەسى نەگىزىندە ءتۇسىندىردى. سول وڭىرلەرگە دە گاز كەلگەندە 1,5-2 جىل بويى وسىنداي ماسەلەلەر بولعان. بۇل قالىپتى جاعداي ەكەن, – دەيدى بۇل تۋرالى سارىارقا اۋدانىنىڭ اكىمى ەسەت بايكەن.
ونىڭ ايتۋىنشا, پروبلەمالىق اۋماقتارعا كوندەنسات جيناۋشىلار ورناتىلدى. بۇل قۇرىلعى شكافتاردان تۇرادى. بىرنەشەۋىن ورناتقان سوڭ گازدىڭ كەلمەۋ وقيعالارى قايتالانبادى.
– قازىر بەسىنشى شكاف بويىنشا دايىندىق جۇمىستارى جۇرگىزىلىپ جاتىر. ءبىر شكافتان 350 ۇيگە گاز تاراتىلادى. كوندەنسات جيناۋشى قۇرىلعىنى ورناتپاس بۇرىن بۇل تۋرالى تۇرعىندارعا حابارلايمىز. وسى جۇمىس كەزىندە ۇيگە جىلۋ كەلمەيدى. تۇرعىن ەگەر ءۇيدى جىلىتاتىن كومىر جوق دەسە, كومىر بەرەمىز. بىزدە قازىر شۇباركول كومىرىنىڭ ءبىراز قورى بار. شكافتاردى ورناتۋدى باستاردا سونى ەسكەرىپ, كومىر قورىن جاسادىق. قازىرگە دەيىن تۇرعىندارعا 40 تونناداي بەردىك. بۇل جۇمىس بويىنشا جەدەل شتاب قۇرىلدى. وعان «قازترانسگازايماق», «ينتەرگاز» كومپانيالارى, «اليا-سەرۆيس» مەردىگەرلىك ۇيىمى, قالالىق وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى, سارىارقا اۋدانى اكىمدىگىنىڭ وكىلدەرى كىردى, – دەيدى ە.بايكەن.
اكىمنىڭ سوزىنشە, گازبەن پروبلەمالار شىعا باستاعاندا اپاتتىق جاعدايدا جوياتىن ءبىر عانا بريگادا جۇمىس ىستەدى. قازىر وسىنداي بريگادالار سانى بەسكە جەتكىزىلدى. بۇعان قوسا, ارناۋلى تەحنيكا سانى كوبەيتىلدى.
جالپى سارىارقا اۋدانىندا 7 مىڭنان استام ءۇي گازعا كوشۋى كەرەك. قازىرگە دەيىن 1100 ابونەنت وعان قوسىلدى. بولجام بويىنشا جىل اياقتالعانشا اۋداندا كوگىلدىر وتىندى 1500 ابونەنت پايدالاناتىن بولادى.
– اۋدان اۋماعىندا كومىردى پايدالاناتىندار ءالى دە كوپ. قازىر سارىارقا اۋدانىنىڭ قويمالارىندا 2 مىڭ توننادان استام كومىر بار. نەگىزىنەن, بۇل قاراعاندى شاحتالارىنان, «قاراجىرا», «بوگاتىر», «مايكوبە» كەنىشتەرىنەن جەتكىزىلدى. ءبىزدىڭ اۋدانعا شۇباركول كومىرى اپتاسىنا ءبىر رەت 300 توننا كولەمىندە جەتكىزىلەدى. ەكى-ءۇش كۇن ىشىندە ول ءوتىپ كەتەدى, – دەيدى سارىارقا اۋدانىنىڭ اكىمى.
