جاقىندا ءبىزدىڭ باسىلىمدا ءبىر اۆتوردىڭ ماقالاسى جاريالاندى. سونى ايتپاق بولىپ اعامىزعا قوڭىراۋ شالدىم. ءبىر كەزدە ول كىسى: «اينالايىن, بۇل ءوزى گازەت ساتپايتىن قالا. مەن ونى قايدان ىزدەپ تابامىن؟ ۇيىمە ەكى-ءۇش سانىن اكەپ بەرسەڭ, باتامدى بەرەر ەدىم» دەپ ءوتىنىش ايتتى. ارينە, ۇلكەن كىسىگە سول ساتتە ايتقان دۇنيەسىن اپارىپ بەردىم. ريزا بولىپ ول قالدى. بىراق مەنى سول اعانىڭ «بۇل ءوزى گازەت ساتپايتىن قالا» دەگەنى ويلاندىردى. شىندىعىندا, باس شاھاردان جاڭا جارىق كورگەن گازەت-جۋرنالداردى ساتىپ الىپ وقيىن دەسەڭىز, شامالى جەردەن ونى تابا المايسىز. اسىرەسە, قازاق باسىلىمدارى قاسقالداقتىڭ قانىنداي قات.
ءوز باسىم انا تىلىمىزدە جارىق كورەتىن گازەتتەردى سەنبى كۇنى ادەيى بارىپ استانالىق بازاردىڭ قاسىنداعى «التى الاش» دۇڭگىرشەگىنەن ساتىپ الامىن. ءدال وسىنداي دۇڭگىرشەك ابىلاي حان داڭعىلى بويىنداعى «جىبەك جولى» ايالداماسى ماڭىندا ورنالاسقان. ودان كەيىن اباي كوشەسىندەگى «قازپوشتا» مەكەمەسىنەن بارىپ الۋعا بولادى. ال سول جاعالاۋدا گازەت-جۋرنال ساتاتىن ورىن جوق. «كەرۋەن» ساۋدا-ويىن-ساۋىق ورتالىعىندا بولىپ ەدى, ول جابىلىپ قالدى.
كەيدە وتكەن كۇندەر ەرىكسىز ەسكە تۇسەدى. ءبىز وقىعان توقسانىنشى جىلداردىڭ اياق كەزىندە اقمولادا «قازباسپاسوز» دەپ اتالعان دۇڭگىرشەك ءار ايالدامانىڭ جانىندا تۇراتىن. سودان قالاعان باسىلىمىڭىزدى تاباسىز. كەيىن ولاردىڭ ءبارى كوزدەن بۇل-بۇل ۇشتى.
قازىر عالامتور الەمى قارىشتادى. كەز كەلگەن گازەت-جۋرنالدىڭ جەكە سايتى, ەلەكتروندىق نۇسقاسى بار. ءوزىم جۇمىسقا كەلگەندە سولاردى ءبىر شولىپ شىعامىن. ال وعان ادامداردىڭ ءبارىنىڭ قولى جەتە مە؟ بۇ جاعىنان كومپيۋتەر سىرىن بىلمەيتىن قاريالارعا قيىن-اق. ولار
گازەتتى قولعا الىپ, ءيىسىن سەزىپ وقىعىسى كەلەدى. سوندا ول كىسىلەر نە ىستەۋ كەرەك؟ وسىنى ويلاپ جاتقان بىرەۋ بار ما؟
