استانا قالاسىنىڭ كوممۋنيكاتسيالار قىزمەتى الاڭىندا «گەپاتيتكە قارسى كۇرەس: اۋرۋدىڭ الدىن الۋ جولدارى» تاقىرىبىندا استانا قالاسى گەپاتولوگيا ورتالىعىنىڭ باسشىسى كۇنسۇلۋ شامسيۆاليەۆا ءباسپاسوز ءماسليحاتىن وتكىزدى.
استانادا وسى جىلدىڭ جارتىجىلدىق قورىتىندىسى بويىنشا سوزىلمالى ۆيرۋستىق گەپاتيتتەر, باۋىر تسيرروزى, باۋىر ترانسپلانتاتسياسى ەم-شارالارىنان وتكەن 7563 پاتسيەنت ەسەپتە تۇر. ال دۇنيەجۇزىلىك دەنساۋلىق ساقتاۋ ۇيىمى قازاقستاندى ورتالىق ازيا مەن تمد-دا گەپاتيتكە قارسى كۇرەس باعدارلامالارىن ورىنداۋدا كوشباسشىلاردىڭ ءبىرى دەپ تانيدى.
ەلىمىزدە ۆيرۋستىق گەپاتيتتەردىڭ الدىن الۋ جۇمىستارى كەشەندى تۇردە جۇزەگە اسىرىلادى. ياعني, ەڭ الدىمەن ۆيرۋس كوزدەرىنە, تارالۋ جولدارى مەن فاكتورلارىنا, ينفەكتسيا جۇقتىرۋعا بەيىم حالىققا كومەك كورسەتىلەدى.
1998 جىلدان باستاپ ۆ گەپاتيتىنە قارسى حالىقتى ۆاكتسيناتسيالاۋ باعدارلاماسى جۇمىس ىستەيدى. سابيلەر ومىرگە كەلگەن العاشقى كۇندەرىنەن-اق پەرزەنتحانادا ۆ ۆيرۋستىق گەپاتيتىنە قارسى ينفەكتسيادان قورعايتىن ۆاكتسينا الادى. گەپاتيتتىڭ الدىن الۋ جونىندەگى شارالار كەشەنىنە قازاقستانداعى ۇلتتىق ەكپە كۇنتىزبەسىنە سايكەس جۇرگىزىلەتىن بەلسەندى يممۋنداۋ-ۆاكتسيناتسيا دا كىرەدى. ەكپەلەر ەمحانالاردىڭ ەگۋ كابينەتتەرىندە تەگىن جۇرگىزىلەدى.
