كەشە «استانا وپەرا» تەاترىنداعى رەسەي حالىق ءارتىسى التىناي اسىلمۇراتوۆا جەتەكشىلىك ەتەتىن بالەت ترۋپپاسى كورەرمەنگە كلاسسيكالىق جانە مودەرن قويىلىمداردان قۇرالعان جاڭا باعدارلاما ۇسىندى.
– رەپەرتۋارىمىزدى ءداستۇرلى پا-دە-دەن جانە پا-دە-سيستەن باسقا قازىرگى زامانعى دۇنيەلەرمەن بايىتقىمىز كەلەدى. بۇل, ارينە, بەلگىلى ءبىر دارەجەدە تاۋەكەلدى قاجەت ەتەتىن, بىراق ءوزىن-ءوزى اقتايتىن قادام ەكەنىنە سەنەمىن. ويتكەنى, مۇنداي گالا-بالەتتەر ارتىستەردى جاڭا شىعارماشىلىق بەلەستەرگە جەتەلەيدى, ونىڭ ۇستىنە كوپشىلىك ءۇشىن توسىن نومىرلەردى تاماشالاعان ارقاشاندا قىزىق قوي. بۇل باعىتتا جۇيەلى جۇمىس جۇرگىزدىك. سونىڭ ارقاسىندا العا قويعان ماقساتىمىزعا جەتكەن سياقتىمىز, – دەيدى تىلشىلەرگە ماسەلەنىڭ ءمان-جايىن تۇسىندىرگەن ا.اسىلمۇراتوۆا.
كوركەمدىك جەتەكشىلەرىنىڭ ءۇمىت ۇدەسىنەن شىققان قازاقستاننىڭ ەڭبەك سىڭىرگەن قايراتكەرلەرى گاۋھار ۋسينا, ءمادينا باسپاەۆا, تايىر گاتاۋوۆ, حالىقارالىق بايقاۋلاردىڭ لاۋرەاتتارى سەرىك ناقىسبەكوۆ, ايگەرىم بەكەتاەۆا, باقتيار ادامجان, اسەل قۇسايىنوۆا, ەلدار سارسەمباەۆ جانە باسقا ساحنا تارلاندارى ادەتتەگىدەي تالانت بيىگىنەن تابىلدى.
كونتسەرتتى تاماشالاعان ەلوردالىقتار, اسىرەسە, ەتنيكالىق حورەوگرافيالىق «باقسى» كومپوزيتسياسىن ورىنداعان دوسجان تابىلدى, «شاحەرەزادا» بالەتىندە كلاسسيكالىق دۋەتتى بيلەگەن سانكت-پەتەربۋرگتەگى ماريا تەاترىنىڭ ءسوليسى اناستاسيا زاكلينسكايا مەن قازاقستاندىق جاندوس اۋباكىروۆتىڭ ورىنداۋشىلىق شەبەرلىكتەرىنە قوشەمەتپەن قول سوقتى.
تالعات باتىرحان
