استانا اكىمى باقىت سۇلتانوۆتىڭ باستاماسىمەن, اكىمدىك پەن «قازاقستان عارىش ساپارى» اق-تىڭ بىرلەسىپ ۇيىمداستىرۋىمەن Mega Silk Way ساۋدا, ويىن-ساۋىق ورتالىعىندا «قازاقستاننىڭ عارىش جولى» اتتى كورمە اشىلدى.
كورمەنىڭ اشىلۋ سالتاناتىنا قالا اكىمىنىڭ ورىنباسارى ەرمەك امانشاەۆ پەن ەسىل اۋدانىنىڭ اكىمى تولەگەن زاكاريانوۆ جانە قر قورعانىس جانە اەروعارىش ونەركاسىبىنىڭ ۆيتسە-ءمينيسترى مارات نۇرعوجين, قوس عارىشكەر توقتار اۋباكىروۆ پەن ايدىن ايىمبەتوۆ قاتىستى.
قازاقستاننىڭ عارىشتىق قىزمەت سالاسىن ناسيحاتتاپ, وتاندىق عارىش ونەركاسىبىنىڭ جەتىستىكتەرىن تانىستىرۋ, كوپشىلىكتىڭ زاماناۋي عارىش تەحنولوگياسىنا دەگەن قىزىعۋشىلىعىن ارتتىرۋ ماقساتىندا اشىلعان كورمەگە عارىش تاقىرىبىنا ارنالعان جادىگەرلەر مەن قازاق عارىشكەرلەرىنىڭ ءومىربايانى, اتقارعان قىزمەتتەرى تۋرالى ستەندتەر قويىلدى. سونىمەن قاتار بۇل جەردەن قازاقتىڭ ءۇشىنشى عارىشكەرى, حالىق قاھارمانى, قر اسكەري اۋە كۇشتەرىنىڭ گەنەرال-مايورى ايدىن ايىمبەتوۆتىڭ «سويۋز» تما-16M كەمەسىنەن جەرگە قونعان ءپاراشيۋتتى عارىش كاپسۋلاسى, عارىشكەردىڭ سكافاندرى, KazEOSat-1 جانە KazEOSat-2 جەردى قاشىقتىقتان باقىلاۋ سپۋتنيكتەرىنىڭ ماكەتتەرىن دە كورۋگە بولادى.
– وسى كورمەدەگى ەرەكشە جادىگەرلەردى قالا تۇرعىندارى مەن قوناقتارىنىڭ قىزىعا تاماشالايتىنىنا سەنىمدىمىن. شاراعا عارىشكەرلەرىمىزدىڭ وزدەرىنىڭ قاتىسۋى دا كورمەنىڭ ماڭىزىن ارتتىرىپ وتىر. كورمەگە استانادان بولەك بىرقاتار وڭىردەن دە وقۋشىلار كەلۋدە. مۇنداعى باستى ماقسات – جاسوسپىرىمدەردىڭ عارىش سالاسىنا دەگەن قىزىعۋشىلىعىن وياتۋ, – دەدى ەرمەك امانشاەۆ كورمەنىڭ اشىلۋ سالتاناتىندا.
ال قازاقتىڭ تۇڭعىش عارىشكەرى, كەڭەس وداعىنىڭ باتىرى, قر اسكەري اۋە كۇشتەرىنىڭ گەنەرال-مايورى توقتار اۋباكىروۆ بۇل كورمە ەڭ الدىمەن جاسوسپىرىمدەر ءۇشىن ۇيىمداستىرىلىپ وتىرعانىن, ولار ءۇشىن مۇنىڭ ماڭىزى زور ەكەنىن ايتتى.
Mega Silk Way سوو-داعى بۇل كورمەنى كەلەر جىلدىڭ 31 ناۋرىزىنا دەيىن تاماشالاۋعا بولادى.
