«استانا» كونتسەرت زالىندا قازاقتىڭ ءسوز ونەرى مەن ءداستۇرلى ساز ونەرىن قابىستىرعان «عاسىرلار جىرلايدى» كونتسەرتى ءوتتى. ەلوردانىڭ مەملەكەتتىك اكادەميالىق فيلارمونياسىنىڭ ديرەكتورى ساكەن ءابدىراحمانوۆتىڭ يدەياسىمەن ۇيىمداستىرىلعان كەشكە اتالمىش ۇجىمنىڭ حالىق ءانى ءبولىمىنىڭ ارتىستەرىمەن قاتار جەر-جەردەگى ونەرپازدار قاتىستى.
كونتسەرتتى تاماشالاعان كورەرمەن وتكەن-كەتكەن زامانداردى ءوز كوزىمەن كورىپ قايتقانداي بولدى. تاياۋدا عانا قر مادەنيەت سالاسىنىڭ ۇزدىگى اتانعان نۇراي تاناباەۆ جىراۋ بەينەسىندە, قارلىعاش نۇركەنوۆا ءاز انا رولىندە جينالعان قاۋىمدى تاريحتىڭ تۇڭعيىعىنا باتىردى. سونداي-اق, كەشتە ەلىمىزدىڭ ءار وڭىرىنە ءتان جىر-تەرمەلەر ورىندالدى.
ماسەلەن, قىزىلوردا وبلىستىق فيلارمونياسىنىڭ ارتىستەرى حالىقتى سىر سۇلەيلەرىمەن قاۋىشتىرعانداي اسەر ەتتى. شولپان بەيىمبەتوۆا, مايرا سارسەنباەۆا, مۇحامەدالى بەكبەيىسوۆ, ءادىلحان قۋانباەۆ, بەلگىلى جىراۋ الماس الماتوۆتىڭ شاكىرتى كۇنسۇلۋ تۇرىكپەن كەشەگى وتكەن نارتاي بەكەجانوۆتىڭ, قاراساقال ەرىمبەتتىڭ, كەتە ءجۇسىپتىڭ جىر-تەرمەلەرىمەن سۋسىنداتتى.
م.وسكىنباەۆ اتىنداعى ماڭعىستاۋ وبلىستىق فيلارمونياسىنىڭ ونەرپازدارى باعداۋلەت تولىبەكۇلى, ءانۋاربەك امانقوسوۆ, جەتكىزگەن سەيىتوۆ, قونىس يۋسۋپوۆ اقتاننىڭ «ايت دەسەڭدەر جاراڭدار», ارالباي وڭعاربەكۇلىنىڭ «ءسوز باسى», ناۋرىزبەك جىراۋدىڭ «كوزىڭدى اشىپ شىققانسىڭ» شىعارمالارىمەن كورەرمەننىڭ دەلەبەسىن قوزدىردى.
ءسۇيىنباي اتىنداعى الماتى وبلىستىق فيلارمونياسىنىڭ انشىلەرى ەربولات شالدىبەكوۆ پەن ماقپال توقتاعان قابان جىراۋدىڭ «ناقىل تەرمە» جانە جامبىلدىڭ «توگەيىن جىردى حالقىما» تۋىندىلارىمەن جەتىسۋدىڭ سالەمىن جولدادى.
استانا قالاسى مەملەكەتتىك اكادەميالىق فيلارمونياسىنىڭ قازاق وركەسترى (باس ديريجەرى جانە كوركەمدىك جەتەكشىسى – قر ەڭبەك سىڭىرگەن قايراتكەرى ايتقالي جايىموۆ) حالىق ءانى ءبولىمىنىڭ ارتىستەرى – جاقسىگەلدى ماياساروۆ, ءزۇلفيا بايمۇرزاەۆا, پەريزات تۇراروۆا, جازگۇل داڭىلباەۆا, سەكەن سىزدىق, جالعاس سۇلتان, دانيار مۇقان كەشتىڭ ءارىن كىرگىزدى. ەلوردالىق فيلارمونيا انشىلەرى «اقتانبەردىنىڭ تولعاۋى», جانىبەك كارمەنوۆتىڭ «ءومىر تولعاۋى», اسەمحان قوسباساروۆتىڭ «ءسۇيىنباي – اقىنداردىڭ بايتەرەگى», ءابزالي ەگىزباەۆتىڭ «ەرتەدە وتكەن حالىق دۇركىن-دۇركىن» شىعارمالارىمەن حالىقتى ويلاندىردى.
امانعالي قالجانوۆ
