الداعى 14, 15 جانە 19 ماۋسىم كۇندەرى «استانا وپەرا» تەاترىنىڭ ساحناسىندا ا.اداننىڭ «جيزەل» بالەتىنىڭ پرەمەراسى وتەدى. عاجايىپ اسەرگە تولى شىعارمادان زۇلىمدىق پەن ءمولدىر ماحاببات ارپالىسقان شىنايى الەمدى كورەسىز.
بۇل قويىلىم مادەنيەت جانە سپورت مينيسترلىگىنىڭ قولداۋىمەن كورەرمەنگە جول تارتىپ وتىر. سپەكتاكلدى دايىنداۋعا ءبىراز ونەر ادامدارىنىڭ ماڭداي تەرى توگىلگەن. سولاردىڭ ىشىندە قويۋشى بالەتمەيستەر, رەسەيدىڭ حالىق ءارتىسى التىناي اسىلمۇراتوۆانى, قازىرگى زاماننىڭ اتاقتى ستسەنوگرافى ەتسيو فريدجەريو مەن «وسكار» سىيلىعىنىڭ يەگەرى, سۋرەتشى فرانكا سكۋارچاپينو جانە ديريجەر ارمان ورازعاليەۆتى ەرەكشە ايتۋعا بولادى.
«بۇل – مەنىڭ ەڭ سۇيىكتى بالەتىمنىڭ ءبىرى. سوندىقتان ونى جوعارى باعالايمىن. شىعارمانىڭ جەلىسى ىقشام, كوڭىلگە قونىمدى. ءوزىم سپەكتاكلدە دەكوراتسيالار, كوستيۋمدەر, بۋتافوريا دا ۇيلەسىمدى بولعانىن قالايمىن. ءبىز بۇل قويىلىمدى م.پەتيپانىڭ ءداستۇرلى حورەوگرافياسىنا نەگىزدەدىك. وسى دارىندى تۇلعانىڭ ارقاسىندا اتالعان بالەت ەكى عاسىر بويى الەم ساحناسىنان تۇسكەن ەمەس. ءبىز بۇل تۋىندىعا سونشالىقتى وزگەرىستەر ەنگىزگەن جوقپىز. وسىنداعى رومانتيكالىق اسەمدىكتى كورەرمەنگە تولىق جەتكىزگىم كەلدى» دەيدى التىناي اسىلمۇراتوۆا.
