س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە قر پارلامەنت ءماجىلىسىنىڭ اگرارلىق ماسەلەلەر جونىندەگى كوميتەتىنىڭ «اگرووندىرىستىك كەشەندى تسيفرلاندىرۋ. ونىڭ قازىرگى احۋالى, كەدەرگىلەر مەن پەرسپەكتيۆالارى» اتتى تاقىرىپتا كوشپەلى وتىرىسى ءوتتى.
الدىمەن پارلامەنت ءماجىلىسىنىڭ دەپۋتاتتارى جوعارى وقۋ ورداسىنداعى گەولوگيالىق اقپاراتتىق جۇيەلەر ورتالىعىن كوردى. بۇل تەحنولوگيا توپىراق پەن تۇقىمنىڭ ءتۇرلى دەرتتەر مەن زيانكەستەرگە شالدىعۋ جاعدايىن ءدال انىقتاپ, استىق ءتۇسىمىن الدىن الا بولجاۋعا مۇمكىندىك بەرەدى. سونداي-اق, ول ءاربىر جەر پايدالانۋشى ءوز مىندەتىن قالاي ورىنداپ جاتقانىن باقىلاۋعا جاعداي جاساپ, جەر ينسپەكتورلارىنىڭ قولىن ۇزارتادى. اسىرەسە, گەرمانيالىق ارىپتەستەرمەن بىرلەسىپ ىسكە اسقان ەگىنشىلىك ورتالىعى حالىق قالاۋلىلارىنىڭ قىزىعۋشىلىعىن تۋعىزدى.
كوشپەلى وتىرىس بارىسىندا ۋنيۆەرسيتەت رەكتورى اقىلبەك كۇرىشباەۆ عالىمدارىنىڭ وسى باعىتتاعى جەتىستىكتەرىنە توقتالدى. ونىڭ اي-
تۋىنشا, عارىشتىق زوند-
تاۋ تەحنولوگياسىن قولدانۋ جەر پايدالانۋ پروتسەسىن باقىلاۋعا, جەر تۋرالى زاڭداردى ساقتاۋعا قول جەتكىزەدى. توپىراق جاعدايى مەن سيپاتى ءجونىندەگى ساندىق بازا قۇرۋ, ونىڭ اۋا رايى مەن تابيعات اسەرىنەن قالاي ءوزگەرەتىندىگىن انىقتاپ, ءتيىستى اگروتەحنيكالىق شارالار قولدانىپ, مينەرالدىق تىڭايتقىشتار مەن تۇقىمدى ءتيىمدى پايدالانۋعا مۇمكىندىك بەرەدى.
سەمينارعا قر پارلامەنتى ءماجىلىسى توراعاسىنىڭ ورىنباسارى ۆلاديمير بوجكو باستاعان دەپۋتاتتار قاتىسىپ, اگروونەركاسىپ سالاسىن جەتىلدىرۋ جايىنداعى ءوز وي-
لارىن ورتاعا سالدى. ءبۇكىلالەمدىك بانكتىڭ اۋىلشارۋاشىلىق ماسەلەلەرى جونىندەگى جەتەكشى ەكونوميسى دەۆيد نيلسون بايانداما جاسادى.
– مەملەكەت باسشىسىنىڭ «اگرارلىق سالا ەل ەكونوميكاسىنىڭ درايۆەرى بولۋعا ءتيىستى» دەگەنى بارشاعا بەلگىلى. ال بۇل مىندەتتى ورىنداۋعا اۋىل شارۋاشىلىق سالاسىن بىلىكتى عالىمدار مەن ماماندارمەن تولىق قامتاماسىز ەتكەندە عانا قول جەتكىزۋگە بولادى. قازاقستاندىق اگروونەركاسىپتى تولىققاندى دامىتۋ ءۇشىن بىزگە دە دامىعان ەلدەر ۇلگىسى بويىنشا عىلىمي-زەرتتەۋ ۋنيۆەرسيتەتىن قۇرۋ قاجەت. تەك سول كەزدە عانا تەحنولوگيالاردى تىكەلەي وندىرىسكە ترانسفەرتتەۋگە بولادى. الايدا ءبىزدىڭ بۇل تۋرالى باستامامىز تولىق قولداۋ تاۋىپ وتىر دەپ ايتۋ قيىن. بۇگىنگى باسقوسۋ اگرارلىق سالانىڭ پروبلەمالارىن تۇبەگەيلى شەشۋگە باعىتتالعان العاشقى قادام بولادى دەگەن ۇمىتتەمىن, – دەپ ءسوزىن قورىتىندىلادى وقۋ ورداسىنىڭ باسشىسى اقىلبەك كۇرىشباەۆ.
ازامات ەسەنجول
