قازىرگى تاڭدا ەلوردا ەرىكسىز تاڭداي قاقتىراتىن تاماشا ساۋلەتىمەن عانا ەمەس, جايقالعان جاسىل جەلەگىمەن دە كوز تارتادى. ارقا توسىندە قونىس تەپكەن استانامىزدى وسىدان جيىرما جىل بۇرىن ناعىز گۇلدى شاھارعا اينالادى دەسە, ەشكىم سەنە قويماس ەدى. سوندىقتان ونىڭ بۇگىنگىدەي گۇلورداعا اينالۋى شىنىمەن دە تامشىلاپ توگىلگەن تەر مەن ەرەكشە شىعارماشىلىق ەڭبەكتىڭ جەمىسى ەكەنى انىق.
بيىل باس قالاداعى 162288 شارشى مەترگە 8 جارىم ميلليوننان استام گۇل ەگىلەدى دەپ جوسپارلانعان. ونىڭ ىشىندە, الماتى اۋدانى بويىنشا – 50436 شارشى مەتر, ەسىل اۋدانى بويىنشا – 80999 شارشى مەتر, سارىارقا اۋدانى بويىنشا – 16155 شارشى مەتر, ال بايقوڭىر اۋدانى بويىنشا 14698 شارشى مەتر جەر قىزىلدى-جاسىلدى گۇلمەن كومكەرىلەدى. بۇل كورسەتكىشتىڭ شيرەگىنەن استامى, ناقتىراق ايتار بولساق, 2102750 گۇل كوكتەم ايلارىندا وتكەن جالپىقالالىق اكتسيا بارىسىندا وتىرعىزىلدى.
نۇر-سۇلتانداعى گۇل شارۋاشىلىعى سالاسىنا قاتىستى جۇمىستاردىڭ شامامەن جارتىسىنان استامىن «استانا كوگالداندىرۋ قۇرىلىسى» مەكەمەسى جۇرگىزەدى. ەلوردانى ەرتەگىدەگىدەي ەرەكشە شاھارعا اينالدىرۋدا بۇل ۇيىمنىڭ سىڭىرگەن ەڭبەگى زور. قالانىڭ كوپ جەرىندە كوزىڭە شالىناتىن ۇلتتىق ويۋ پىشىنىندەگى گۇل تەكشەلەرى دە – وسى ۇيىم قىزمەتكەرلەرىنىڭ ەڭبەگى.
اتالعان مەكەمە ديرەكتورىنىڭ ورىنباسارى بيبىگۇل بەكتەمىسوۆانىڭ ايتۋىنشا, ەلوردادا ەگىلەتىن گۇلدەردىڭ جارتىسىنان استامى – بىرجىلدىق گۇلدەر. مۇنىڭ سەبەبى استانانىڭ قاتاڭ كليماتىنا بايلانىستى بولسا كەرەك.
– بۇگىندە جەرگىلىكتى تابيعاتقا جەرسىنگەن 30 شاقتى گۇل تۇقىمى بار. ونىڭ ىشىندە شىرايگۇلدىڭ (پەتۋنيا) قىزىلدى-جاسىلدى 11 ءتۇرى مەن بارقىتگۇلدىڭ (تاگەتەس) 4 ءتۇرى كەڭ تارالعان. ولاردى ناعىز «استانالىق» گۇلدەر دەپ ايتساق بولادى. بويى دا, ءوسىمى دە بىركەلكى ءارى ىستىق-سۋىققا ءتوزىمدى, – دەيدى ول.
اتالعان كاسىپورىن گۇلدەردى ارنايى جىلىجايدا وسىرەدى ەكەن. بىرجىلدىق گۇلدىڭ ورتاشا باعامى – 70 تەڭگە, ال كوپجىلدىق گۇل 1500-2000 تەڭگە ارالىعىندا باعالاناتىن كورىنەدى. سونداي-اق گۇل ساۋداسىندا وزگە وڭىرلەرگە دە تاپسىرىس بەرەدى.
قازىردە ەلوردالىقتار مەن قالا قوناقتارى اقوردادان «حان شاتىر» ورتالىعىنا دەيىن بىرنەشە شاقىرىمعا سوزىلاتىن سۋلى دا نۋلى جەلەكجول بويىنداعى گۇلدەر تىزبەگىن جاعالاي سەرۋەندەپ تاماشالاۋىنا بولادى. سونداي-اق باسقا دا داڭعىلدار مەن كوشەلەردىڭ, عيماراتتاردىڭ, ساياباقتار مەن سكۆەرلەردىڭ اۋماعىنداعى گۇل مۇيىستەرى دە جەتەرلىك.
