ەلوردانىڭ جاسىل جەلەگى بۇرىنعىسىنان دا كوركەيىپ, جايقالا تۇسپەك. بيىلدىڭ وزىندە 20 مىڭعا تارتا اعاش-تال ەگىلەدى. سونىمەن بىرگە, «استانا-جاسىلقۇرىلىس» قالا كوشەلەرىنە ءسان بەرەتىن گۇلدەردىڭ تۇرلەرىن دە, سانىن دا كوبەيتىپ وتىر. 
ولاردىڭ ىشىندە شىرايگۇل, تاگەتەس, كەربەزگۇل, ابەليا, ۇلپەك, سالپيگلوسسيس سياقتى بىرجىلدىق گۇلدەردىڭ 50 ءتۇرى بار. مۇنىمەن قوسا, قالا كوگالدارىندا ايىلقياق, سارانا, راۋشان سياقتى كوپجىلدىق گۇلدەردىڭ 30-دان استام ءتۇرى وتىرعىزىلادى.
سونداي-اق, ەلوردادا كوپجىلدىق گۇلدەردەن, بۇتالار مەن راۋشانداردان تۇزىلگەن سان الۋان گۇلزارلار – ميكسبوردەرلەر جاسالادى.
قالا كوركىن كەلتىرۋشى دەكوراتيۆتى جاسىل مۇسىندەر قالا تۇرعىندارى مەن قوناقتارىنىڭ كوزايىمىنا اينالىپ كەلەدى. ەلوردانىڭ مەرەيتويى اتالىپ وتەتىن وسى جازدا قالا كوشەلەرىندە گۇلدەن ورىلگەن ءپىل, بارىس پايدا بولىپ, قىران قۇس پەن اققۋ بەينەسى قاتار قوناقتاماق.
بۇدان بولەك, اسەم گۇلدەر گۇلزارلار, الاڭدار جانە اۋلالاردى اباتتاندىرۋدىڭ نەگىزگى ەلەمەنتتەرىنە اينالادى.
