قازاق ۇلتتىق ونەر ۋنيۆەرسيتەتىنىڭ ج.جاباەۆ اتىنداعى كونتسەرت زالىندا وسى وقۋ ورىننىڭ «ءداستۇرلى ءان» كافەدراسىنىڭ اعا وقىتۋشىسى, ءانشى-كومپوزيتور, قازاقستاننىڭ ەڭبەك سىڭىرگەن قايراتكەرى گۇلميرا سارينانىڭ «ءان قاناتىنداعى گۇل-كوكتەم» اتتى كونتسەرتى ءوتتى.
ءانشىنىڭ كوپتەن بەرى شاكىرتتەرىمەن بىرگە كونتسەرت بەرسەم دەگەن جوسپارى بار ەدى. سول ءساتتى جۇزەگە استى. كونتسەرتتىك باعدارلامادا حالىق اندەرى, حالىق كومپوزيتورلارىنىڭ اندەرى مەن كەش يەسىنىڭ اۆتورلىق اندەرى بولدى. ال وسى كونتسەرت ارقىلى شاكىرتتەرى ۇلكەن ساحناعا العاش قادام باستى دەپ ايتساق بولادى.
گۇلميرا سارينانىڭ ونەر جولىن باستاعانىنا وتىزدان جىلدان استى. سونىڭ نەگىزگىسى ەلوردامىز نۇر-سۇلتان قالاسىندا ءوتىپ كەلە جاتىر. بوي جەتكەن كەزدە سول كەزدەگى تسەلينوگراد قالاسىنا كەلىپ, پەداگوگيكالىق ينستيتۋتتا وقىدى. جەرگىلىكتى فيلارمونيادا, ق.قۋانىشباەۆ اتىنداعى قازاق مەملەكەتتىك اكادەميالىق دراما تەاترىندا, پرەزيدەنتتىك مادەنيەت ورتالىعىندا جۇمىس ىستەدى. ونەرى ورلەپ, كەيىننەن كومپوزيتورلىق قىرى اشىلدى. ءوزى دە وزىنە دەيىنگى كومپوزيتورلاردى قۇرمەت تۇتادى.
وسى كەشتىڭ ءبىر ءبولىمىن دە مايرا ۋاليقىزىنىڭ شىعارماشىلىعىنا ارنادى. سونداي-اق كونتسەرتكە «قورقىت» ەتنوانسامبلى قاتىستى.
گۇلميرا سارينا كەشىندە ەستى اندەرمەن كورەرمەندەردىڭ قۇلاق قۇرىشىن قاندىرىپ, جان سارايىن اشتى. ءۇش ىشەكتى دومبىرانىڭ شىعۋ تەگى اباي ەلىنەن تارقاتىلادى. گۇلميرا سول ەلدەن شىققان سوڭ وسى دومبىرانى دا مەڭگەرگەن. ءبىر ءاندى ول ءۇش ىشەكتى دومبىرامەن شىرقادى.
