«قازاق ەلى» مونۋمەنتى الدىندا 1 مامىر – قازاقستان حالقى بىرلىگى كۇنىنە ارنالعان حالىقتىق سەرۋەن مەن مەرەكەلىك كونتسەرت ءوتتى. سالتاناتتى شارانى تاماشالاۋعا ارنايى كەلگەن مەملەكەت باسشىسى نۇرسۇلتان نازارباەۆ ەل تۇرعىندارىن بىرلىك مەرەكەسىمەن قۇتتىقتادى.
– قۇرمەتتى وتانداستار! سىزدەردى ءبىزدىڭ قازاقستاندىق برەند, حالقىمىزدىڭ بىرلىگى كۇنىمەن شىن جۇرەكتەن قۇتتىقتايمىن. توتاليتارلىق رەجيم كەزىندە قازاقتىڭ دالاسىنا 550 مىڭعا تارتا سولتۇستىك كاۆكازدىقتار, ميلليونعا جۋىق نەمىس پەن ۇيعىر, كارىستەر, ۋكرايندىقتار ەركىنەن تىس كوشىپ كەلدى. ولاردى مۇندا كەلگەن سوڭ قۇرىپ كەتەدى دەپ ەسەپتەسە كەرەك. بىراق ولاي بولعان جوق. جەرگىلىكتى قازاق حالقىنىڭ باۋىرمالدىلىعىنىڭ ارقاسىندا ءبىز جۇدىرىقتاي جۇمىلىپ, اياقتان تىك تۇردىق, تاۋەلسىز مەملەكەت قۇردىق. تاتۋلىقتىڭ ارقاسىندا ءبىز ءبىر باعىتتا, بىرىككەن كۇشپەن ءومىر ءسۇرىپ جاتىرمىز. بىرلىگىمىز ۇيلەسىپ, بارلىعىنا قول جەتكىزىپ كەلەمىز. بۇگىندە دامۋدىڭ داڭعىل جولىنا تۇستىك. جىل سايىن ادامداردىڭ ءومىرىن جاقسارتۋدى باستى نازاردا ۇستاپ, ءتۇرلى باعدارلامالاردى جاريا ەتتىك. مىسالى, مەنىڭ بەس باستامامدا جاس وتباسىلارىن باسپانامەن قامتۋ, تۇرعىن ءۇي شارتىن جاقسارتۋ, ەلدى گازداندىرۋ, سالىقتى تومەندەتۋ سياقتى جۇمىستار قولعا الىنۋدا. ءدال وسى جاۋاپكەرشىلىكتىڭ ارقاسىندا دامىعان 30 ەلدىڭ قاتارىنا كىرۋ مىندەتىن جۇكتەدىك. وسى جولدان تايماساق, ءالى دە تالاي بەلەستى باعىندىرامىز. ءبىز – ءبىرتۇتاس حالىقپىز, ءبىر-ءبىرىمىزدى قۇرمەتتەيمىز ءارى جاقسى كورەمىز, ورتاق كونستيتۋتسيا مەن زاڭدارعا باعىنامىز. ال تاتۋ بولۋ, دوس بولۋ, ءبىر-ءبىرىن قۇرمەتتەۋ – ول ۇلكەن باقىت. سول باقىتتى قادىرلەي بىلەيىك, اعايىن! – دەگەن نۇرسۇلتان نازارباەۆ بارشا حالىقتى ءاردايىم تاتۋ بولۋعا شاقىرىپ, ءار وتباسىعا باق-بەرەكە مەن اماندىق تىلەدى.
الاڭعا جينالعان جۇرتشىلىققا «رۋحاني جاڭعىرۋ – بىرلىك پەن تۇتاستىق نەگىزى» اتتى استانالىق ۇلتتىق-مادەني شىعارماشىلىق ۇجىم مەن مەملەكەتتىك اكادەميالىق فيلارمونيانىڭ ارتىستەرى, وتاندىق ەسترادا جۇلدىزدارى تەاترلاندىرىلعان قويىلىم ۇسىنىپ, ءان مەن كۇيدەن شاشۋ شاشتى. سونىمەن قاتار, كورەرمەن قاۋىم رەسەيدەن كەلگەن تۋرەتسكي حورىنىڭ ونەرىن تاماشالادى. مەرەكەلىك شارادا قازاق كۇرەسى, ارقان تارتىس, اسىق اتۋ سياقتى ۇلتتىق سپورت ويىندارى تورگە شىعىپ, كىر تاسىن كوتەرۋ مەن قول كۇرەستەن جارىس ۇيىمداستىرىلدى.
نۇرداۋلەت كاكىشتەگى
