جۋىردا ۇكىمەت ۇيىندە قر پرەمەر-ءمينيسترى باقىتجان ساعىنتاەۆتىڭ توراعالىق ەتۋىمەن, پرەزيدەنت اكىمشىلىگىنىڭ باسشىسى اسەت يسەكەشەۆتىڭ قاتىسۋىمەن مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا كورسەتىلگەن تاپسىرمالاردى ورىنداۋ ماسەلەلەرى بويىنشا كەڭەيتىلگەن وتىرىس ءوتتى.
پرەمەر-مينيستر باقىتجان ساعىنتاەۆ وتىرىستى اشا وتىرىپ, مەملەكەت باسشىسىنىڭ بيىلعى جولداۋى حالىق اراسىندا ۇلكەن قولداۋعا يە بولعانىن ايتتى. «ۇكىمەتتىڭ نەگىزگى مىندەتى – تاياۋ كەلەشەكتە اتالعان مىندەتتەردى ىسكە اسىرۋ; وڭىرلەرگە بولىنەتىن قاراجاتتاردىڭ جەتكىلىكتى كولەمى; قاجەتتى شەشىمدەردى جىلدام قابىلداۋ. حالىق بۇگىن اتالعان تاپسىرمالاردىڭ ورىندالۋىن كۇتپەۋى كەرەك, حالىق اتقارىلعان جۇمىستىڭ ناتيجەسىن كورۋى كەرەك» دەدى ول.
قر پرەزيدەنتى اكىمشىلىگىنىڭ باسشىسى ءا.يسەكەشەۆ مەملەكەت باسشىسى ءوز جولداۋىندا ۇكىمەت قىزمەتىنىڭ باستى باسىمدىعى رەتىندە قازاقستاندىقتاردىڭ ءال-اۋقاتىن انىقتاعانىن ەسكە سالدى. ول ەكى قۇرامداۋىشتان تۇرادى: حالىق كىرىسىنىڭ ءوسىمى مەن الەۋمەتتىك قىزمەتتەر ساپاسىنان, ءومىر سۇرۋگە جايلى ورتا مەن قاۋىپسىزدىكتەن تۇراتىن ءومىر ساپاسىنىڭ ارتۋى. بۇدان وزگە, پرەزيدەنت قىس مەزگىلىنە, ەگىن جيناۋ ناۋقانىنا, ازىق-تۇلىك ونىمدەرى مەن كومىر باعاسىنىڭ نەگىزسىز ءوسۋ جاعدايىنا جانە قوعامدىق-ساياسي جاعدايدان كورىنەتىن قازاقستاندىقتاردىڭ كوڭىل كۇيىنە قاتىستى باسقا دا ماسەلەلەردى باقىلاۋدا ۇستايتىن بولادى.
ءوز كەزەگىندە ۇكىمەت مۇشەلەرى مەملەكەت باسشىسى العا قويعان مىندەتتەردى ىسكە اسىرۋ جونىندەگى جوسپارلارى تۋرالى باياندادى. ماسەلەن, 2019 جىلعى 1 قاڭتاردان باستاپ ەڭ تومەنگى جالاقى 1,5 ەسەگە ءوسىپ, 28 مىڭ تەڭگەدەن 42,5 مىڭ تەڭگەگە كوبەيەدى. مۇنىڭ ناتيجەسىندە 1,3 ملن ازاماتتىڭ ەڭبەكاقىسى وسەدى. بۇعان قوسا, 275 مىڭ ازاماتتىق قىزمەتكەردىڭ ەڭبەكاقىسى ورتا ەسەپپەن 35 پايىزعا ۇلعايادى. بۇل – ءبىلىم بەرۋ جانە دەنساۋلىق ساقتاۋ سالاسىنىڭ قىزمەتكەرلەرى.
ەڭبەك جانە حالىقتى الەۋمەتتىك قورعاۋ ءمينيسترى م.ابىلقاسىموۆا مەملەكەت باسشىسىنىڭ ەڭ تومەن جالاقى مولشەرىن 1,5 ەسەگە ءوسىرۋ بويىنشا تاپسىرماسىن ورىنداۋ ماقساتىندا 2019 جىلعى 1 قاڭتاردان باستاپ «2019-2021 جىلدارعا ارنالعان رەسپۋبليكالىق بيۋدجەت تۋرالى» قر زاڭىنىڭ جوباسىنا ءتيىستى وزگەرىستەر ەنگىزىلەتىنىن ايتتى. «ەڭ تومەنگى جالاقى مولشەرىن ايقىنداۋ ادىستەمەسى وزگەرەتىن بولادى, ول ەڭ تومەنگى كۇنكورىس دەڭگەيىمەن قابىسپايدى. مەملەكەت باسشىسىنىڭ تاپسىرماسىنا سايكەس, 2019 جىلعى 1 قاڭتاردان باستاپ بيۋدجەتتىك ۇيىمداردا جۇمىس ىستەيتىن 275 مىڭ ازاماتتىق قىزمەتكەردىڭ ەڭبەكاقىسى وسەدى. ولار ءۇشىن جالاقى ءوسىمى ورتا ەسەپپەن 35 پايىزدى قۇرايدى» دەدى م.ابىلقاسىموۆا. بۇدان وزگە, ەڭ تومەنگى جالاقىنىڭ ارتۋىنا بايلانىستى جۇمىسپەن قامتىلعان حالىقتىڭ سالىق جۇكتەمەسى ازايىپ, بارلىق جالدامالى جۇمىسكەرلەردىڭ تابىسىنان سالىقتىق شەگەرىمدەر ۇلعايادى. 6 ملن-نان استام جالدامالى قىزمەتكەردىڭ سالىق جۇكتەمەسى تومەندەتىلەدى. جالپى العاندا, ەڭ تومەنگى جالاقىنىڭ ءوسۋى ەكونوميكانىڭ بارلىق سەكتورلارىندا تومەن جالاقى الاتىن 1,3 ملن ادامنىڭ ەڭبەكاقىسىنىڭ وسۋىنە اكەلەدى.
الداعى ۋاقىتتا مەملەكەت باسشىسىنىڭ جولداۋىن وڭىرلەردە ءتۇسىندىرۋ جۇمىستارى باستالادى. بۇعان قوسا, 20 قازانعا دەيىن جولداۋدى اقپاراتتىق قولداۋ ماقساتىندا ۇكىمەت مۇشەلەرىنىڭ باسشىلىعىمەن مەملەكەتتىك ورگانداردىڭ جانە ءتۇرلى ۇيىمداردىڭ وكىلدەرىنەن تۇراتىن رەسپۋبليكالىق اقپاراتتىق توپتار وڭىرلەرگە ساپارعا شىعادى.
