23 ماۋسىم – مەملەكەتتىك قىزمەتشىلەر كۇنى. بيىل ەلىمىزدە كاسىبي مەرەكە ونىنشى رەت اتالىپ وتەدى. ايتۋلى كۇننىڭ تاريحى بىرىككەن ۇلتتار ۇيىمىنان باستاۋ الادى. 2002 جىلدىڭ 20 جەلتوقسانىندا بىرىككەن ۇلتتار ۇيىمىنىڭ باس اسسامبلەياسى 23 ماۋسىمدى بۇۇ-نىڭ مەملەكەتتىك قىزمەتشىسى كۇنى دەپ جاريالاۋ قارارىن قابىلداپ, وعان مۇشە ءار مەملەكەتتى دە وسىعان بايلانىستى ءبىر كۇندى بەلگىلەۋگە شاقىردى. ەڭبەگى تەرەڭ بىلىكتىلىكتى, ۇلكەن جاۋاپكەرشىلىك پەن توزىمدىلىكتى تالاپ ەتەتىن مامان يەلەرىن مەرەكە قارساڭىندا سوزگە تارتىپ, اتقارىپ جاتقان جۇمىستارى مەن مەملەكەتتىك قىزمەت جايلى وي-پىكىرىن سۇراپ بىلدىك.
ءبيبىنۇر قوجاحمەتوۆا, استانا قالاسى بويىنشا مەملەكەتتىك كىرىستەر دەپارتامەنتى بەرەشەكتەرمەن جۇمىس باسقارماسى ءوندىرىپ الۋ ءبولىمىنىڭ جەتەكشى مامانى:
– ەلگە قىزمەت ەتۋ – بالا ارمانىم. قىزمەتكە ورنالاسۋىما اكەمنىڭ اسكەري سالادا, انامنىڭ مەملەكەتتىك قىزمەتتە جۇمىس ىستەۋى اسەر ەتكەن بولار دەيمىن. مەملەكەتتىك قىزمەتكە دەگەن ۇمتىلىس پەن ىشكى سەنىمىمنىڭ ارقاسىندا قىزمەتشىلەر اراسىنداعى بايقاۋدان وڭ ناتيجە الىپ, 2022 جىلدان بەرى قىزمەتتەمىن.
جاس قىزمەتكەر رەتىندە ەلىمىزدىڭ گۇلدەنۋىنە ءوز ۇلەسىمدى قوسىپ جۇرگەنىمدى ماقتان تۇتامىن. مەملەكەتتىك قىزمەت – بۇل تۇراقتىلىق جانە بولاشاققا دەگەن سەنىم. مەن ءوز جولىمدى دۇرىس تاڭدادىم دەپ ناقتى ايتا الامىن.
دارحان وتىزباەۆ, ينۆەستيتسيالار جانە كاسىپكەرلىكتى دامىتۋ باسقارماسى ساۋدا جانە قىزمەت كورسەتۋ سالاسىن دامىتۋ ءبولىمىنىڭ ءبولىم باسشىسى:
– الەم ەلدەرىنىڭ دامۋ جولىندا مەملەكەتتىك قىزمەتتىڭ قوسار ۇلەس سالماعى ەرەكشە ەكەنى ايدان انىق. ادالدىق, ادىلدىك, ءوز جۇمىسىنا دەگەن جاۋاپكەرشىلىك, ازاماتتاردىڭ سەنىمىن تۋعىزۋ – ءاربىر مەملەكەتتىك قىزمەتكەردىڭ مىندەتى. وسى قاعيدالاردى نەگىزگە الا وتىرىپ, مەن جۇمىسىمدى مەملەكەتتىك قىزمەتپەن بايلانىستىرامىن دەپ ءاۋ باستان-اق شەشتىم.
2015 جىلى «استانا – جاڭا قالا» ارنايى ەكونوميكالىق ايماعىن اكىمشىلەندىرۋ باسقارماسى يننوۆاتسيالىق جانە ينۆەستيتسيالىق دامىتۋ ءبولىمىنىڭ باس مامانى رەتىندە جۇمىسقا قابىلداندىم. ءار جىلدارى وسى باسقارمانىڭ ءتۇرلى بولىمىندە قىزمەت اتقاردىم.
مەملەكەتتىك قىزمەتشىلەردىڭ ەڭ باستى مىندەتى – حالىققا ادال قىزمەت ەتۋ. ءاربىر مەملەكەتتىك قىزمەتشى وسى قاعيدانى ەشۋاقىتتا ۇمىتپاۋى ءتيىس. حالىققا جاقىن بولىپ, كەز كەلگەن جاعدايدا «قارا قىلدى قاق جاراتىن» ءادىل بولۋى قاجەت. ولار ەلدىڭ مۇددەسىن ءبىرىنشى ورىنعا قوياتىن, تەز ءارى دۇرىس شەشىم قابىلداي الۋى مىندەتتى. سەبەبى الەۋمەتتىك-ەكونوميكالىق, قوعامدىق-ساياسي احۋالدىڭ تۇراقتىلىعى تىكەلەي مەملەكەتتىك قىزمەتكە بايلانىستى. ناقتى ايتاتىن بولساق, ۇلت مارتەبەسىن كوتەرەتىن, ەل ابىرويىن اسقاقتاتاتىن مەملەكەتتىك قىزمەتكەر بولۋ – جاۋاپتى مىندەت. ويتكەنى ول قاي كەزدە دە بيلىكتىڭ بيىك بەينەسىن, ىسكەرلىك قابىلەتىن كورسەتەدى.
ءبىرجان ۇزاقباي, مەديتسينالىق جانە فارماتسەۆتيكالىق باقىلاۋ كوميتەتى استانا قالاسى بويىنشا دەپارتامەنتى مەديتسينالىق قىزمەتتى سەرتيفيكاتتاۋ جانە ليتسەنزيالاۋ ءبولىمىنىڭ باسشىسى:
– مەن ەڭبەك جولىمدى كۆازيمەملەكەتتىك سەكتوردا – «شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىندا» باستادىم. كوممەرتسيالىق ەمەس اكتسيونەرلىك قوعامدا ءۇش جىل جۇمىس ىستەگەننەن كەيىن, مەندە مەملەكەتتىك قىزمەتكەر بولۋ مۇمكىندىگى تۋدى. سول كەزدە مەن ەلىمىزدىڭ دەنساۋلىق ساقتاۋ جۇيەسىن دامىتۋعا ۇلەس قوسقىم كەلدى. ناتيجەسىندە 2021 جىلدىڭ قاڭتار ايىنان باستاپ قازىرگى ۋاقىتقا دەيىن مەديتسينالىق جانە فارماتسەۆتيكالىق باقىلاۋ كوميتەتىنىڭ استانا قالاسى بويىنشا دەپارتامەنتىندە جۇمىس ىستەيمىن.
مەملەكەتتىك قىزمەتكەر – ەلدىڭ مۇددەسى ءۇشىن ءوز كۇشىن, ۋاقىتىن اياماي, ەڭبەك ەتەتىن تۇلعا. جاس قىزمەتكەر بولسام دا, ەلىمنىڭ الپاۋىت مەملەكەتتەرمەن يىق تەڭەستىرە الۋىنا قىزمەت ەتىپ جۇرگەنىمە, ءوزىمنىڭ تامشىداي بولسىن ۇلەسىمدى قوسىپ جۇرگەنىمە قۋانامىن. مەن ءۇشىن مەملەكەتتىك قىزمەت, باعا جەتپەس تاجىريبەدەن بولەك, جەكە قاسيەتتەرىمدى دامىتۋعا, ەڭ باستىسى جاقسىلىق جاساۋعا يتەرمەلەيدى.
اسلان تورەحان, ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسى استانا قالاسى بويىنشا دەپارتامەنتى ستاتيستيكالىق اقپاراتتى پايدالانۋشىلارمەن جۇمىس باسقارماسىنىڭ باس مامانى:
– مەنىڭ مەملەكەتتىك قىزمەتكە كەلۋ جولىم ايتۋلى كەزەڭنەن, 2021 جىلعى «حالىق ساناعىنان» باستالدى. العاشقى قىزمەتىم «ۇلتتىق ساناقتارعا دايىندىق جانە وتكىزۋ جونىندەگى ۋاكىلى» بولدى. ودان سوڭ ستاتيستيكا سالاسىمەن تانىسىپ, مۇنداعى جۇمىستىڭ ماڭىزىن ءتۇسىندىم. 2022 جىلى ستاتيستيكالىق اقپاراتتى پايدالانۋشىلارمەن جۇمىس باسقارماسىنا جەتەكشى مامان بولىپ تاعايىندالىپ, ءوز جۇمىسىما بار كۇش-جىگەرىمدى سالدىم. جەمىسى ۇزاق كۇتتىرمەدى, قازىرگى تاڭدا سول باسقارمادا باس مامان بولىپ قىزمەت اتقارامىن. بۇل ارمانىما قاراي ءبىر قادام جاقىن بولعانىمدى بىلدىرەدى. دەگەنمەن دە ۇيرەنۋدەن, ءوزىمدى جەتىلدىرۋدەن جالىقپايمىن. بۇل ءوزىمدى باسقالارعا ۇلگى رەتىندە كورسەتۋگە دە سەپتىگىن تيگىزەدى دەگەن سەنىمدەمىن. سەبەبى مەملەكەتتىك قىزمەتكەر تەك جۇمىس ورنىندا عانا ەمەس, سونىمەن قاتار, قوعام اراسىندا دا ءوزىن ۇلگى رەتىندە كورسەتىپ, مەملەكەتتىك قىزمەتتىڭ بەدەلىن وڭ جاعىنان كورسەتۋى قاجەت. مەملەكەتتىك قىزمەت – بۇل مەملەكەت پەن حالىق اراسىنداعى قاتىناستى بايلانىستىرۋشى كوپىر.
وقۋ بىتىرگەن جاستارعا مەملەكەتتىك قىزمەتتى ۇسىنار ەدىم. سەبەبى الار تاجىريبەسى مول قىزمەت دەپ بىلەمىن. جان-جاقتى دامۋعا مۇمكىندىك بەرەدى, تارتىپكە باعىنۋعا, ەلدىڭ دامۋى ءۇشىن ەڭبەك ەتۋگە باعىتتايدى. اسىرەسە بۇگىندە مەملەكەتتىك قىزمەتتە جاستار ءۇشىن بارلىق مۇمكىندىك قاراستىرىلعان. سوندىقتان بارشا جاستى مەملەكەتتىك قىزمەتتى تاڭداۋعا شاقىرامىن!
ارايلىم كانگۋشەكوۆا, استانا قالاسى باس ديسپەتچەرلىك باسقارماسى ۇيىمداستىرۋ-كادرلىق جانە قۇقىقتىق جۇمىس ءبولىمىنىڭ باس مامانى:
– مەن مەملەكەتتىك قىزمەتتە 8 جىلعا جۋىق ەڭبەك ەتىپ كەلەمىن. جالپى قوعام ءۇشىن ساپالى قىزمەت كورسەتۋ – ءاربىر مەملەكەتتىك قىزمەتشىنىڭ مىندەتى. كەز كەلگەن مەملەكەتتىڭ جەتىستىگى مەن گۇلدەنۋى مەملەكەتتىك قىزمەتشىلەردىڭ ءتيىمدى جانە كاسىبي جۇمىس ىستەپ, قىزمەت ەتۋىنە نەگىزدەلەدى. حالىقتىڭ سەنىمى دە مەملەكەتتىك قىزمەتشىنىڭ مەملەكەتتىك قىزمەتتى قانشالىقتى ساپالى كورسەتەتىنىنە قاراپ نىعايادى. كۇن وتكەن سايىن مەملەكەتتىك قىزمەتشىلەرگە قويىلار تالاپ تا, جۇكتەلەتىن جاۋاپكەرشىلىكتىڭ اۋقىمى دا كەڭەيىپ كەلەدى. مەملەكەتتىك قىزمەتتەگى ءاربىر ادام ءوز جۇمىسىنىڭ ماڭىزىن سەزىنىپ, ەلىمىزدىڭ دامۋ جولىندا ءوز ءىزىن قالدىرۋى ءتيىس دەپ ويلايمىن.
