سارىارقا اۋدانىنىڭ اكىمى ارمان تۇرلىبەك كەزەكتى ەسەپتىك كەزدەسۋىن جەڭىس داڭعىلى, ماسكەۋ, م.اۋەزوۆ, ءا.جانگەلدين كوشەلەرىنىڭ شەگىندە تۇرىپ جاتقان تۇرعىندارمەن وتكىزدى.
اۋدان اكىمى الدىمەن وتكەن جىلدىڭ قورىتىندىلارىن, اتقارىلعان ىستەردىڭ اۋقىمىنا توقتالدى. جينالعان كوپشىلىكتىڭ ساۋالدارىنا كوشپەس بۇرىن, ارمان تۇرلىبەك الەۋمەتتىك جەلىنى بەلسەندى پايدالاناتىنىن, ونىڭ تۇرعىندارمەن ۇنەمى بايلانىستا بولۋىنا سەپتىگى تيەتىنىن ايتتى. ايتا كەتسەك, اكىم ءوزىنىڭ جەكە ۇيالى ءنومىرىن جاريا ەتىپ, تۇرعىنداردان 5000-نان اسا قوڭىراۋ قابىلداعان. WhatsApp سەكىلدى تانىمال مەسسەندجەر ارقىلى 10 266 سمس-حابارلاما تۇسكەن.
سارىارقا اۋدانى اپپاراتىندا Telegram مەسسەندجەرىنەن («سارىارقا اكىمدىگى», «اۋداننىڭ قۇقىقتىق ءتارتىبى», «اۋدان پيك-ءى») قوعامدىق باقىلاۋدى قامتاماسىز ەتۋ ءۇشىن جانە تۇرعىندارمەن كەرى بايلانىس ءۇشىن ءۇش چات اشىلعان. وتكەن جىلى وسى Telegram ارقىلى 9092 ءوتىنىش قارالعان. ودان باسقا, Facebook پاراقشاسىن دامىتىپ, Instagram-دا رەسمي پاراقشا اشىلىپ وتىر.
«اتالمىش ديالوگ الاڭى بىزگە دە, تۇرعىندارعا دا اۋداننىڭ وزەكتى ماسەلەلەرىن شەشۋگە كومەكتەسەدى. بارلىق ارىز-وتىنىمدەر تالداۋدان وتەدى, ءمۇمكىندىگىنشە تەز ارادا شارا قولدانىپ جاتامىز. تۇرعىنداردان كەلىپ تۇسكەن «جول كارتاسىنا تاپسىرىس» بىزگە بارلىق پروبلەمانى وڭتايلى شەشۋگە جاردەمىن تيگىزدى» دەدى ارمان تۇرلىبەك.
بۇل بۇقارامەن بايلانىستى وڭتايلاندىراتىن تاسىلدەردىڭ كوپتەگەن ماسەلەلەردىڭ شەشىلۋىنە نەمەسە وعان قاتىستى جاۋابىن الۋعا اسەرى مول. ەندىگى جەردە تالابى بار تۇرعىن اكىمدى ىزدەپ تابانىن توزدىرمايدى.
ايتسە دە, اۋدان تۇرعىندارىنىڭ اكىممەن جەكە كەزدەسۋىنە دە حالىق كوپ جينالىپ, جىلى تىلەكتەرىمەن بولىسۋگە اسىقتى. جيىنعا كەلگەن كوپشىلىك ءبىر اۋىزدان اۋدان اپپاراتىنىڭ جۇمىسىنا وڭ باعا بەردى. قالادا ءومىر ءسۇرۋ قاۋىپسىز, قولايلى قالاعا اينالىپ كەلەدى. اباتتاندىرۋ, قالانى كوركەيتۋ جۇمىستارى العا باسقان. اۋدان باسشىسىنىڭ جۇمىسىن ءار سالاعا بولىنگەن قارجىنىڭ قايدا قالاي جۇمسالىپ جاتقانىن دا الەۋمەتتىك جەلىلەر ارقىلى تانىسۋعا بولادى. مۇنىڭ ءوزى جەرگىلىكتى اتقارۋشى ورگاندار مەن حالىقتىڭ اراسى جاقىنداي تۇسكەنى دە وڭ قادام ەكەنىن ءبىلدىردى.
ءبىر بايقاعانىمىز, اۋداننىڭ ءار جەرىندە وتكەن وسىنداي جيىنداردا پيك جۇمىستارىنا كوڭىلى تولمايتىنى ايتىلۋدا. ارينە, زاڭدىلىق بويىنشا, ونىڭ باسشىلارىن سايلاۋ – تەك تۇرعىنداردىڭ قۇزىرەتىندەگى نارسە. دەگەنمەن, تۇرعىنداردىڭ قولى جەتپەگەن, ءسوزى وتپەگەن كەيبىر باسقارۋشى كومپانيالاردىڭ جۇمىسىنا اكىمدىكتىڭ ارالاسۋىن ءوتىندى.
ءبىر جاقتان العاندا مۇنداي كەزدەسۋلەر حالىقتىڭ بەلسەندىلىگىن ارتتىرىپ, اينالاسىندا, ناقتى تۇرىپ جاتقان جەرىندەگى بولىپ جاتقان جايتتارعا بەيجاي قاراماۋعا ۇيرەتەدى. بۇل تەك قانا اۋدان اكىمىنىڭ ەسەبى ەمەس, بىرلەسە وتىرىپ, ءتۇيىنى كۇردەلى ماسەلەلەردى دە جۇيەلى شەشۋگە ارنالعان الاڭ رەتىندە دە قالا باسقارۋ داستۇرىنە ەنىپ كەلەدى.
ايگۇل ۋايسوۆا
