«مەن جاقسى حابار جەتكىزەمىن» دەيدى «قازپوشتا» اكتسيونەرلىك قوعامنىڭ پوشتاشىسى ايمان دوسىمبەكوۆا. «قازپوشتاعا» كۇنىنە ورتا ەسەپپەن 120 مىڭداي ءتۇرلى-ءتۇرلى سالەمدەمە كەلىپ تۇسەدى ەكەن. ايمان دا سان ءتۇرلى حابارلاما, حاتتار, پوشتا جونەلتىلىمدەرىنىڭ 60-تان استامىن كۇندەلىكتى سۇرىپتاپ, يەلەرىنە تابىس ەتۋگە اسىعادى.
ادام بالاسى جاراتىلعالى اسا قاجەتتى نارسەنىڭ ءبىر-بىرىمەن حابار الماسۋ بولىپ تابىلادى. سول حاباردى جەتكىزۋدىڭ دە ءتۇرلى تاسىلدەرىن ويلاپ تاپتى. ەلدى مەكەننىڭ شەتىندەگى توبەنىڭ باسىنا وت جاعىپ تا حابار بەرىپ وتىردى. كەيىنىرەكتە ولاردىڭ ورنىن جاۋشىلار باستى. سۋىت جورتقان جاۋشىلار سالەمدەمەنى ءتيىستى ادامىنا اۋىزشا جەتكىزگەن. كەيىنىرەك قالا مەن دالانىڭ اراسىندا اتشابارلار دا وسى ىسپەن اينالىستى. ءبىر قىزىعى, پوشتا «mansio pozita» دەگەن لاتىن سوزىنەن شىققان ەكەن. قاي تىلدە ايتىلسا دا, بىردەن تۇسىنەتىن «پوشتا» دەگەن ۇعىمدى بىلدىرەدى. جالپى قاي ەلدە بولماسىن پوشتا جەلىسى بيزنەس جانە حالىق ءۇشىن ەلەكتروندىق ساۋدانى, كولىك-لوگيستيكالىق سەرۆيستى, قارجىلىق قىزمەتتەردى العا جىلجىتۋ ءۇشىن ءتيىمدى قۇرال بولىپ تابىلادى.
ايمان دوسىمبەكوۆا 1999 جىلدان بەرى استانالىق پوشتا قىزمەتىندە جۇمىس ىستەيدى. شيرەك عاسىر بويىنا وسى سالانىڭ بارلىق قىر-سىرىن ءتۇسىنىپ, وسى كەزەڭدەگى دامۋ ۇدەرىسى دە كوز الدىنان ءوتتى. ءوزى دە, وتباسىلى, بالالى بولىپ بىرگە ءوستى دەۋگە بولادى.
ايمان سياقتى بارلىق پوشتاشىلاردىڭ جۇمىسى تاڭعى 4-تەن باستالادى. كەڭسەگە كەلە سالا ءوز مىندەتىنە كىرەتىن مەكەمەلەر مەن سول مەكەنجايدىڭ تۇرعىندارىنىڭ اتىنا كەلىپ تۇسكەن حات-حابارلاردى سۇرىپتايدى. ولاردى رەت-رەتىمەن بۋىپ-ءتۇيىپ, قانداي ۇجىمعا, كىمگە كەلگەنىن ونىڭ مەكەنجايىن انىقتاپ جازىپ الىپ, ارنايى قاپشىققا سالىپ, جولعا شىعادى. تۋرا تاڭعى ساعات جەتى جارىمدا كولىك كۇتىپ تۇرادى. حات تاراتۋ تۇسكە دەيىن سوزىلادى. سونىمەن بارلىق حات يەلەرىنە تابىستاپ بولىپ, جۇمىس ورنىنا ورالىپ, اتقارىلعان جۇمىستىڭ ەسەبىن جازىپ وتكىزەدى. ودان كەيىن قولى بوس. جۇمىستان سوڭ ەكىنشى سىنىپتا وقيتىن ۇلىن مەكتەپتەن الىپ, ءۇي شارۋاسىنىڭ تىرلىگىنە كىرىسەدى. كۇيەۋى دە وسى مەكەمەدە جۇرگىزۋشى-ينكاسساتور بولىپ جۇمىس ىستەيدى. ەكەۋى بىرگە شاڭىراق كوتەرىپ بالالى بولدى. ەكى قىزىن ۇزاتتى, ولاردان كەيىنگى قىزى ساتپاەۆ اتىنداعى قازاق ۇلتتىق تەحنيكالىق ۋنيۆەرسيتەتىندە, تاعى ءبىر ۇلى كوكشەتاۋدا وقىپ ءجۇر.
جاقىندا وزدەرىندە دە قۋانىشتى جاعداي بولعالى تۇر. استانانىڭ ىرگەسىندەگى تالاپكەر اۋىلىنان جەر الىپ, جاڭادان تۇرعىزعان ءۇيى بىتۋگە تاياۋ. قونىس تويى دا الىس ەمەس.
– استانادا تۇرعانىمىزعا دا شيرەك عاسىر بولسا دا اعايىندارىمىزدىڭ ورتاسىندا بولعاندى قالادىق. تالاپكەردە 85 جاستاعى انام تۇرادى. ون جاندى ءبىزدىڭ اۋلەتتىڭ وزىنەن اپايىم مەن ءسىڭلىم دە وسى پوشتا قىزمەتىندە ءجۇر. ءبارىمىز جۇمىسىمىزدى ءوز دارەجەسىندە ورىندايمىز. كەيدە ءبىر جاعدايلارمەن حات تاراتا الماسام, ىزدەپ مەنى سۇراستىرىپ جاتادى. بايقاعانىم, قازىرگى ادامدار ەلەكتروندى پوشتادان گورى ناقتى پوشتا ارقىلى كەلەتىن حات-حابارعا قۋانىپ قالاتىن سياقتى. ادامدار ءۇشىن قولىنا كونۆەرت الىپ, ونىڭ ءىشىن اشىپ نە جازىلعانىن ءبىلۋدىڭ وزىندىك قۋانىشى بار سياقتى. بۇل ەرەسەكتەر ءۇشىن بۇرىنعى كەزدەگى حات الىسىپ حات جازىسۋدى ەسكە تۇسىرسە, قازىرگى جاعدايدا دا بايلانىستىڭ وسى ءتۇرىن ساعىناتىن بولار, – دەپ سىر تارتتى پوشتاشى. قىزمەتتىڭ تالابىنا قاراي, كەيبىر حاتتاردى حاتشىلارعا نەمەسە كەزەكشىلەرگە ەمەس, تەك يەسىنە قولما-قول تاپسىراتىن تۇرلەرى بولادى. ۇلكەن شەندى قىزمەتشىلەردىڭ دە ەسىگىن ەمىن-ەركىن اشىپ, حاتىن وتكىزەسىز. مەنىڭ كوڭىلىمنەن شىعاتىنى, پوشتا قىزمەتكەرلەرىنە عانا ەمەس, جالپى ادامدارعا دەگەن قارىم-قاتىناستىڭ مادەنيەتىن بايقايمىن. قالا كوشەلەرىنە تاڭ ازانىمەن حاتىمىزدى جەتكىزۋگە اسىعىپ بارا جاتقاندا, جول بويىنداعى بيىك ءزاۋلىم عيماراتتاردىڭ ىشىندەگى بيىك كابينەتتەردە سونداي ءىلتيپاتتى ادامدارعا قىزمەت ەتەتىنىمدى ءبىلىپ, شۇعىل حابارلاردى تەز جەتكىزۋگە تىرىسامىن. ءدال وسىنداي جىلىلىقتى تۇرعىنداردان دا بايقايمىز. توسىننان كەلگەن حات-حابارعا ولار دا قۋانىپ جاتادى. سولارعا قاراپ, ءبىزدىڭ قىزمەتىمىزدىڭ ماڭىزدى ءارى كەرەك ماماندىق ەكەنىنە كوزىمىز جەتىپ, مارقايىپ قالامىن, – دەپ ءسوزىن اياقتادى پوشتاشى. جىلى ءجۇزدى, اشىق مىنەزدى ايمان بىزدەردى دە قۋانتتى.
