استاناداعى ۇلتتىق مۋزەيدە ەلوردانىڭ 20 جىلدىق مەرەكەسى اياسىندا رەسەيدەگى ترەتياكوۆ گالەرەياسى توپتاماسىنان «حح عاسىردىڭ 50 جاۋھارى» اتتى كورمە اشىلدى.
بۇل ايتۋلى شارا ەلىمىزدە العاش ۇيىمداستىرىلىپ وتىر. وعان كەنەپ, مايلى بوياۋدان سالىنعان 50 كارتينا قويىلدى. كورمەنىڭ سالتاناتتى اشىلۋىنا قر مادەنيەت جانە سپورت ءمينيسترى ارىستانبەك مۇحامەديۇلى قاتىسىپ, شارانىڭ ەكى ەل اراسىنداعى مادەني دوستىقتىڭ ودان ءارى تەرەڭدەي تۇسۋىنە ىقپال ەتەتىنىنە سەنىم ءبىلدىردى. ودان كەيىن ءسوز العان ترەتياكوۆ گالەرەياسىنىڭ باس ديرەكتورى زەلفيرا ترەگۋلوۆا دا ءوزىنىڭ جىلى تىلەكتەستىگىن جەتكىزدى.
كورمە بارىسىندا كونستانتين كوروۆين, ابرام ارحيپوۆ, كونستانتين يۋون, پەتر كونچالوۆسكي, يليا ماشكوۆ, اريستارح لەنتۋلوۆ, پاۆەل كۋزنەتسوۆ, يگور گرابار, ميحايل نەستەروۆ, يسااك برودسكي, تاتيانا يابلونسكايا, يۋري پيمەنوۆ, دميتري جيلينسكي, ۆيكتور پوپكوۆ, تاير سالاحوۆ سەكىلدى وتكەن عاسىرداعى بەينەلەۋ ونەرىنىڭ تاريحىندا ونەگەلى ءىز قالدىرعان تالانتتى تۇلعالاردىڭ دۇنيەلەرى تانىستىرىلدى. ماسەلەن, ابرام ارحيپوۆتىڭ «شارۋا ايەل», كونستانتين كوروۆيننىڭ «باۋدا. گۋرزۋف», اركادي رىلوۆتىڭ «جاسىل شۋ», يليا ماشكوۆتىڭ «ماسكەۋ ازىق-تۇلىگى: نان», الەكساندر گەراسيموۆتىڭ «بالەت ءارتىسى لەپەشينسكايانىڭ پورترەتى» اتتى ەڭبەكتەرى كەلۋشىلەردى اسەرلى سەزىمگە بولەدى. اسىرەسە, كوپشىلىكتى تاتيانا يابلونسكايانىڭ ۇكىلى ۇمىتكە ۇمتىلعان جاسامپاز كۇشكە تولى «تاڭەرتەڭ» كارتيناسى تاڭعالدىردى.
وندا سۋرەتشى ءوزىنىڭ ون ۇشتەگى قىزى لەنانىڭ ەرتەمەن تۇرىپ جاتتىعۋ جاساپ جاتقانىن بەينەلەگەن. بۇل شىعارما بۇرىنعى كەڭەس داۋىرىندە وتە تانىمال بولدى. مەكتەپ وقۋلىعىنا كىردى, مۇقاباسى ءساندى جۋرنالدارعا باسىلدى. كارتينانىڭ ءبىزدىڭ ەلىمىزبەن دە ءبىر بايلانىسى بار. قانداي دەيسىز عوي. ايتالىق. الماتىلىق ارسەن بەيسەمبينوۆ دەگەن قازاق ازاماتى جاس كۇنىنەن وسى سۋرەتتى ۇناتىپ, بولمەسىنە ءىلىپ قويادى. وندا بەدەرلەنگەن جۇزىمدەي مولدىرەپ تۇرعان قىزعا عاشىق بولىپ قالادى. كەيىن ورتا مەكتەپتى بىتىرگەننەن كەيىن ماسكەۋدەگى ستروگانوۆ ۋچيليششەسىنە وقۋعا تۇسەدى. سوندا جۇرگەندە ءوزىنىڭ بالا كۇنگى عاشىعى, ياعني كارتيناداعى سۇلۋ قىز لەنامەن تانىسادى. اقىرى, سوعان ۇيلەنەدى. كورمەگە وسى تۋىندىنىڭ كەيىپكەرى ەلەنا بەيسەمبينوۆا دا قاتىسىپ, جۇرتشىلىقپەن كەزدەستى. «مەنىڭ ومىرلىك تاريحىمدا ماڭىزدى ءرولى بار كارتيناعا قاراپ, تالاي بالالار شىعارما جازدى. ارينە, ول مەنى قاناتتاندىردى. سوندىقتان بارىڭىزگە راقمەت! استانانىڭ 20 جىلدىق تويى قۇتتى بولسىن!» دەپ اقجارىلىپ تىلەگىن ءبىلدىردى.
ايتا كەتەيىك, تالاي تاريحتان سىر شەرتەر ونەر كورمەسى 10-ىنشى قىركۇيەككە دەيىن جالعاسادى.
زەرلەن ەركىنبەكۇلى,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى
