اقپاراتتاندىرۋ مەن جاھاندانۋ داۋىرىندە, الەمنىڭ كوپتەگەن ەلدەرىندە ۇلتتىق سانانىڭ ىدىراۋى جانە ونىڭ ءبىرتۇتاس ستاندارتتارعا اينالۋ ۇدەرىسى كەزىندە اسسامبلەيا قىزمەتى ەتنوستاردىڭ تەڭ بىرلىگىنىڭ ۇلگىسى. وتكەن جىلدىڭ قازان ايىندا وتكەن قازاقستان حالقى اسسامبلەياسى كەڭەسىنىڭ وتىرىسىندا ەل پرەزيدەنتى قاسىم-جومارت توقاەۆ: «شىندىعىندا, اسسامبلەيا قازاقستان حالقى بىرلىگىن نىعايتۋدىڭ پارمەندى قۇرالىنا اينالىپ جانە بارلىق ازاماتتاردى ورتاق مەملەكەتتىلىك يدەياسى توڭىرەگىندە بىرىكتىرە الدى» دەدى.
ەلوردالىق اسسامبلەيانىڭ تاريحى سوناۋ وتكەن عاسىردىڭ 90-جىلدارىنداعى ونداعان ەتنومادەني ورتالىقتاردان باستالىپ, قازىر ونىڭ قاتارىندا 21 ەتنومادەني بىرلەستىك ەنگەن بولاتىن. بۇگىندە 56 شىعارماشىلىق ۇجىم, 10 ەتنولينگۆيستيكالىق مەكتەپ, 7 قوعامدىق كەلىسىم كەڭەسى, 11 جاستار قاناتى, مەدياتسيا كابينەتى, عىلىمي-ساراپتامالىق توپ, انالار كەڭەسى, «جاستار اسسامبلەياسى» قالالىق شتابى, اقساقالدار كەڭەسى, «پاراسات» قايىرىمدىلىق قىزمەتىن ۇيلەستىرۋ ورتالىعى, «انالار اماناتى» قولونەر ورتالىعى, «مامىلە», سيتۋاتسيالىق پىكىرسايىس كلۋبى, «جىر ورتالىعى» «ANK Live» تىكەلەي ەفير ستۋدياسى مەن جۋرناليستەر كلۋبى جۇمىس ىستەيدى.
كورەيلەردىڭ «بۋددانىڭ بەتى مۇسىنشىگە بايلانىستى» دەگەن ءسوزى بار. دەمەك, ەلوردالىق اسسامبلەيانىڭ بەت-بەينەسىن جايشىلىقتا جۇمىسى كورىنبەيتىن, بىراق بەيبىت ومىردەگى ناتيجەسى ەل بىرلىگى مەن قوعامدىق كەلىسىمدە كورىنەتىن قاراپايىم ادامدار جاسايدى. بۇل – ولاردىڭ ىنتا-جىگەرى مەن ىزگىلىك قۋاتىن, ءوز ەتنوسىنىڭ وزىندىك ەرەكشەلىگىن ساقتاۋعا دەگەن ۇمتىلىسىن, ءوزىن-ءوزى قازاقستان رەسپۋبليكاسىنىڭ ازاماتتارى – قازاقستاندىقتار رەتىندە تانۋدىڭ جوعارى دەڭگەيىمەن جۇرەتىن ەتنومادەني بىرلەستىكتەر. 2019 جىلدان باستاپ ەلوردالىق قحا وبلىستىق اسسامبلەيالار ءۇشىن ۇلگىلى تيپتىك كورسەتكىشتەرگە قول جەتكىزۋگە باعىتتالعان قازاقستان حالقى اسسامبلەياسىنىڭ نۇر-سۇلتان قالاسىنداعى دامۋ باعدارلاماسىن ىسكە اسىرۋ بويىنشا جۇمىس جۇرگىزۋدە. بۇل – ءوز ىسىنە شىن بەرىلگەن پاتريوتتارىنىڭ كۇندەلىكتى تىنىمسىز ەڭبەگى. ەلوردانىڭ 20 جىلدىق مەرەيتويىندا ەتنو-مادەني بىرلەستىكتەر سىيعا العان دوستىق ءۇيى تەك اسسامبلەيانىڭ عانا ەمەس, ەلوردانىڭ ساۋلەتتى عيماراتتارىنىڭ قاتارىنا قوسىلىپ, حالىقارالىق جانە وڭىرارالىق ىنتىماقتاستىقتىڭ ناعىز ەتنومادەني, الەۋمەتتىك, اقپاراتتىق-ادىستەمەلىك ورتالىعىنا اينالدى.
دوستىق ءۇيى قىزمەتىنىڭ نەگىزگى باعىتتارىنىڭ ءبىرى – ءىس-شارالاردى ۇيىمداستىرۋ, ءداستۇرلى حالىقتىق مەرەكەلەر, فەستيۆالدار, كونتسەرتتەر, دوڭگەلەك ۇستەلدەر, كورمەلەر مەن سەمينارلار وتكىزۋ. 2021 جىلى شامامەن 252 ءىس-شارا ۇيىمداستىرىلدى, ونىڭ ىشىندە 36-ى رەسپۋبليكالىق جانە 9-ى حالىقارالىق دەڭگەيدە ءوتتى. ەتنومادەني بىرلەستىكتەردىڭ شىعارماشىلىق الەۋەتى دە ارتىپ كەلەدى. سانى ەلۋدەن استام شىعارماشىلىق ۇجىمداردىڭ بەسەۋى – «چەن ريۋ» كورەي حورى, «رازدوليە» كازاكتار ءانسامبلى, ن.ليتوشكو اتىنداعى ۋكراين حورى, «ۆايناح» شەشەن-ينگۋش ءانسامبلى, «دۋسلىك» تاتار-باشقۇرت ءانسامبلى «حالىقتىق» اتاعىن الدى. قالالىق اسسامبلەيانىڭ باسىم باعىتى – وسكەلەڭ ۇرپاقتى وتانسۇيگىشتىك پەن تولەرانتتىلىق رۋحىندا تاربيەلەۋ, وعان ەتنولينگۆيستيكالىق مەكتەپتەردىڭ قىزمەتى ىقپال ەتۋدە. ەلورداداعى 10 ەتنولينگۆيستيكالىق مەكتەپتە 460-قا جۋىق وقۋشى ءبىلىم الۋدا. جاستاردىڭ دا الەۋەتى دامىپ كەلەدى: ەتنو-مادەني بىرلەستىكتەر نەگىزىندە 11 جاستار قاناتى جۇمىس ىستەيدى, «جاستار اسسامبلەياسى» رەسپۋبليكالىق جاستار قوزعالىسىنىڭ قالالىق شتابى جۇمىس ىستەيدى, ونىڭ اياسىندا كوپتەگەن الەۋمەتتىك ماڭىزدى الەۋمەتتىك جوبالار جۇزەگە اسىرىلۋدا, جاس كوشباسشىلارعا دا قولداۋ كورسەتىلەدى.
قايىرىمدىلىق پەن قازاقستان حالقى اسسامبلەياسى – بولىنبەيتىن ۇعىمدار. كومەك, مەيىرىمدىلىك, ءوزارا قۇرمەت – حالقىمىزدىڭ ۇرپاقتان-ۇرپاققا جالعاسىپ كەلە جاتقان باستى قۇندىلىقتارى. دوستىق ۇيىندەگى «پاراسات» قايىرىمدىلىق قىزمەتىن ۇيلەستىرۋ ورتالىعى ەتنو-مادەني بىرلەستىكتەردىڭ كاسىپكەرلەرىمەن بىرلەسە وتىرىپ, مۇقتاج جاندارعا قاجەتتى كومەك كورسەتۋ باعىتىندا تۇراقتى جۇمىس جاساۋدا. ماسەلەن, «ءبىز بىرگەمىز!», «يگى ىستەر مارافونى», «30 يگى ءىس» اكتسيالارى اياسىندا جىل باسىنان بەرى 50 قايىرىمدىلىق اكتسياسى ءوتىپ, 5800 ادامعا كومەك كورسەتىلدى.
ءپاتريوتيزمنىڭ ومىرشەڭ ءرولى كەز كەلگەن مەملەكەت ءۇشىن ايقىن, بىراق قازاقستان ءۇشىن بۇل شىن مانىندە ونىڭ تاۋەلسىزدىگىن, بىرەگەيلىگىن, قۋاتىن, ىزگىلىگى مەن وركەندەۋىن قامتاماسىز ەتەتىن ەڭ ماڭىزدى فاكتورى. تاۋەلسىزدىگىمىزدى تۇعىرلى ەتكەن ۇرپاقتاردىڭ بۇگىنگى جالعاسى دا «بىرلىك – بىرلىكتە» قاعيداسىنىڭ قادىرىن تۇسىنەدى, قوعامداعى تاتۋلىق پەن كەلىسىمنىڭ باعاسىن بىلەدى. ەندەشە, قازاقستان رەسپۋبليكاسى تاۋەلسىزدىگىنىڭ وسىناۋ ماڭىزدى قۇندىلىعىن ساقتاۋ, ارتتىرۋ جانە بولاشاق ۇرپاققا جەتكىزۋ قازاقستان حالقى اسسامبلەياسىنىڭ ورتاق مىندەتى.
بايان اسىلبەكوۆا
