ەلوردا تۇرعىندارىنىڭ دارىگەر قاۋىمىنا دەگەن ءىلتيپاتى, سونىمەن قاتار مۇقتاج ادامدارعا قولداۋ ءبىلدىرۋى ارتىپ كەلەدى.
استانالىقتاردىڭ نيەت-پيعىلىنان دا شىعار, باس قالانىڭ ورتالىق كوشەلەرىندە COVID-19 – عا قارسى كۇرەسكەن 40-تان اسا دارىگەردىڭ سۋرەتى بار بيلبوردتار پايدا بولدى. بۇل – مەديتسينا قىزمەتكەرلەرىنە پاندەميا كەزىندەگى قاجىرلى ەڭبەگى ءۇشىن كورسەتىلگەن قۇرمەت. وسىلايشا, شارا باستاماشىلارى دارىگەرلەرگە قاجىرلى ەڭبەگى مەن ىندەتپەن كۇرەستە ءومىرىن ساقتاپ قالعانى ءۇشىن العىس بىلدىرەدى.
بۇل ءىلتيپات قۇربان ايت كەزىندە تىپتەن ايقىن كورىندى. قالا تۇرعىندارى اراسىنان بەلسەنىپ شىققان ازاماتتار قايىرىمدىلىق شاراسىن وتكىزىپ, مەديتسينالىق مەكەمەلەرگە ىستىق تاعام تاراتتى. جەرگىلىكتى بيلىك رۇقسات ەتكەن ورىنداردا ءبىر مەزەتتە بىرنەشە قازانعا پالاۋ باسىلدى. ۇيىمداستىرۋشىلار مەرەكە بولعان سوڭ, قۇرباندىق مالىنىڭ ەتىن پايدالاندى. قۇرباندىق مالىنىڭ ەتى مەن باسقا دا ازىق-تۇلىك ونىمدەرىن اۋقاتتىلارمەن قاتار قاراپايىم ادامدار دا اكەلىپ بەرىپ جاتتى. دايىن اس تاماقتانۋعا ىڭعايلى بولۋى ءۇشىن ارنايى ىدىستارعا سالىندى. ونى اۋرۋحانا قىزمەتكەرلەرىنە جەتكىزىپ بەرۋ ىسىمەن ەرىكتى جاستار جانە بەلسەندى توپ مۇشەلەرى اينالىستى.
سونداي-اق بۇل كۇندەرى قالاداعى 1500 مۇقتاج ادامعا ىستىق تاماق تاراتىلدى. يگى ءىستىڭ سانيتارلىق تالاپقا ساي بولۋىن مەديتسينا قىزمەتكەرلەرى قاداعالاپ وتىر. اس دايارلاۋعا كانىگى اسپازدار, تاجىريبەلى ماماندار قاتىستى, اس-سۋ قالاداعى مەيرامحانالاردىڭ ءبىرىنىڭ اسحاناسىندا ازىرلەندى.
– جۇمىس اۋىر ەمەس. 4 اسپازىمىز, ەكى كومەكشىمىز بار. اس ءمازىرىن قالالىق اكىمدىكپەن بىرلەسە وتىرىپ جاسادىق. ءبىرىنشى اسقا سورپا, ەكىنشىسىنە قويۋ تاعام, وعان قوسا سالات ازىرلەنگەن. ونىڭ تۇتىنۋعا قاۋىپسىز ەكەنىن سانيتار دارىگەرلەر وسى جەردە تەكسەرىپ بارىپ, قورىتىندىسىن بەرەدى,– دەيدى اسپاز ايگۇل سارسەنباەۆا.
سانيتار دارىگەر داميرا نۇراننىڭ ايتۋىنشا, مۇقتاج جاندارعا تاراتىلاتىن تاعامدار بارلىق سانيتارلىق تالاپتار ساقتالا وتىرىپ ازىرلەنگەن. سانيتار ماماندار اس-سۋدىڭ ونىمدەرىن قۇرامىنان باستاپ, تاعام دايارلاۋشى جانە تاراتۋشى ادامداردىڭ ارنايى كيىمدەرىنە دەيىن تۇگەل قاداعالايدى. بارلىعىنا مەديتسينالىق كىتاپشا, بەتتۇمشالارىنىڭ بولۋى تالاپ ەتىلەدى. دايىن اس تەك وسىدان كەيىن عانا تۇتىنۋشىلارعا جول تارتادى.
– تەك قانا تاعام تاراتىپ قويماستان, جاعدايى تومەن وتباسىلاردى ەت ونىمدەرىمەن قامتاماسىز ەتىپ وتىرمىز. ەت تاراتۋعا 500-گە جۋىق ەرىكتىلەر مەن اۆتوەرىكتىلەر كومەكتەستى. ىستىق تاماقتى تاراتۋعا 200 ەرىكتى ۇلەس قوستى. قۇربان ايت مەركەسى كەزىندە دەمەۋشىلەر قولداۋىمەن ءۇش كۇندە 8100 ادامعا تاماق ۇلەستىرىپ ۇلگەردىك. ىستىق اس ءبىرىنشى كەزەكتە نۇر-سۇلتانداعى 12 ستاتسيوناردىڭ قىزمەتكەرلەرىنە جەتكىزىلەدى. بۇل تىزىمدە قارتتار مەن بالالار ءۇيى دە بار,– دەدى «استانا جاستارى» جاستار رەسۋرستىق ورتالىعى باسشىسىنىڭ ورىنباسارى ايان ەرمەنتاەۆ.
ءيا, بىلە بىلسەك, ادامداردىڭ جەكە باسى سياقتى, تۇتاس قوعامنىڭ دا قاسيەتى قىسىلتاياڭ شاقتاردا سىنالادى. سول كەزدە تاعدىر تەزىنە سىنباعاندار ودان بەتەر شىڭدالىپ, شيراي تۇسەدى, ال بوپسانى كوتەرە الماعاندار قۇردىمعا كەتەدى. ودان كەيىن قايتا تۇرىپ, ءومىر كوشىنە ىلەسۋلەرى نەعايبىل.
اتى جامان ىندەت قازاق ءۇشىن كۇردەلى سىن بولدى, وسىندايدا حالقىمىزدىڭ اۋىزبىرشىلىگىنىڭ نىعايا ءتۇسۋى, ءبىر-بىرىنە دەگەن باۋىرمالدىق سەزىمدەرىنىڭ ارتا تۇسكەنى قۋانتادى.
شالعاي اۋىلداردىڭ تۇرمىسى بەلگىلى, ەلدى مەكەندەردىڭ جەتپەي جاتقان «جوعى» كوپ. اسىرەسە اتالمىش ىندەت كەزىندە اۋىلداعى اعايىن ءدارى-دارمەككە وتە ءزارۋ بولىپ قالدى. وسى قىسىلتاياڭ شاقتا استانالىقتار تۋعان اۋىلداعى اعايىن-تۋمالارىنا دا قاجەتتى دارىلەرىن, باسقا دا كەرەك-جاراقتارىن تاۋىپ بەرىپ, سالەمدەمە جىبەرىپ جاتىر. حالقىمىزدىڭ «ىنتىماعى بەرىك ەلگە قايعى دا جولامايدى» دەگەن ناقىلى وسىندايدا ايتىلسا كەرەك. وسىناۋ اۋىرتپالىق كۇندەرى ۇلتىمىزدىڭ ۇنجىرعاسى ءتۇسىپ كەتپەي, كەرىسىنشە ەتەك-جەڭىن قامتاپ, ءبىر-بىرىنە دەگەن كومەك-قولعابىسىن ارتتىرۋى وتە قۋانىشتى جايت.
