نۇر-سۇلتان قالاسىنىڭ اكىمى التاي كولگىنوۆ ەلوردا تۇرعىندارىنا كارانتيننەن كەيىن ەپيدەميولوگيالىق احۋالدىڭ قالاي وزگەرەتىنىن ايتىپ, ەسكەرتۋ جاسادى.
«ءبىز كارانتيننەن كەيىنگى ەپيدەميولوگيالىق جاعدايدىڭ قالاي بولارىنا تالداۋ جاسادىق. بولجامعا سايكەس, احۋال بىردەن جاقسارىپ كەتپەيدى. جۇقپالى-رەسپيتارلىق ۆيرۋستىق ينفەكتسيالار (جرۆي) ماۋسىمىن ەسكەرسەك, جىلداعىداي مەديتسينالىق مەكەمەلەرگە اۋىرتپالىق تۇسەدى. قازىردىڭ وزىندە دايىندىق جۇمىستارىن جۇرگىزىپ جاتىرمىز. ەمحانا, اۋرۋحانالارعا قوسىمشا كومەك كورسەتىلدى. 600-دەن استام فلۋومەتر, 500-گە جۋىق وتتەگى كونتسەنتراتورى, 500-گە جۋىق ارنايى توسەك-ورىن, وكپەنى جاساندى جەلدەتۋ جانە كت اپپاراتتارى الىندى. الداعى ۋاقىتتا جەدەل جاردەم كولىكتەرى دە جەتكىزىلەدى. ەكى اپتا ىشىندە قالاعا 110 توننادان استام ءدارى-دارمەكتەر جەتكىزىلدى» دەپ جازدى قالا باسشىسى instagram پاراقشاسىندا بۇل جۇمىستاردىڭ جۇيەلى تۇردە جۇرگىزىلەتىنىن ەسكەرتىپ.
اكىمنىڭ ايتۋىنشا, قاجەت بولعان جاعدايدا بارلىق 16 ينفەكتسيالىق ستاتسيوناردا توسەك-ورىندارى قايتا اشىلادى. سپورتتىق عيماراتتار مەن باسقا دا بىرقاتار نىساندار كەز-كەلگەن ساتتە ناۋقاستاردى قابىلدايتىن ورىنداردى دايىنداي الادى.
التاي كولگىنوۆ قاتاڭ كارانتين شارالارىنىڭ احۋالدى تۇراقتاندىرۋعا مۇمكىندىك بەرگەنىن اتاپ ايتتى. «جاسىراتىنى جوق, قالا تۇرعىندارى العاشقى كارانتيننەن كەيىن سانيتارلىق نورمالاردى ساقتامادى. بۇل كەرى اسەرىن تيگىزىپ, ىندەتكە شالدىققانداردىڭ سانى كۇرت ءوستى. دارىگەرلەر مەن مەديتسينالىق ۇيىمدار مۇمكىندىگىنشە بارىن سالىپ جۇمىس ىستەدى. كارانتين شارالارى عانا جاعدايدى تۇراقتاندىرۋعا مۇمكىندىك بەردى» دەدى اكىم.
سونداي-اق, رەسمي مالىمەت بويىنشا, ينفەكتسيالىق ستاتسيونارلارداعى توسەك-ورىنعا سۇرانىس شىلدە ايىنىڭ باسىنان 99 پايىزدان 18,5 پايىزعا دەيىن تومەندەگەن. باس قالاداعى 16 ستاتسيوناردىڭ بەسەۋى جابىلدى. ولاردا جاتقان بارلىق ناۋقاستار جازىلىپ شىقتى. كۆي ماسەلەلەرى بويىنشا جەدەل جاردەم شاقىرۋ سانى 9,5 ەسەگە جۋىق تومەندەپ, تاۋلىگىنە 500-دەن 53-كە دەيىن ازايدى. ستاتسيونارلاردا پنەۆمونيامەن اۋىراتىن ناۋقاستاردىڭ سانى 6 ەسە قىسقاردى. №1 جانە №2 قالالىق بالالار اۋرۋحاناسى تامىز ايىنىڭ باسىنان بەرى بۇرىنعى رەجيمدە جۇمىس ىستەي باستادى. ەرتەڭنەن باستاپ قالالىق ەمحانالار جوسپارلى قابىلداۋدى جالعاستىرادى. «بىراق ىندەتتى جۇقتىرۋ قاۋپى جويىلدى دەۋگە ءالى ەرتە. ينفەكتسيانى توقتاتۋ ءۇشىن ساقتىق شارالارى مەن سانيتارلىق نورمالاردى بارىنشا ساقتاۋ قاجەت» دەپ ەسكەرتتى التاي كولگىنوۆ.
