ەلباسى استاناداعى كولىك-لوگيستيكالىق ورتالىعىندا, ءۇي قۇرىلىسى كومبيناتىندا جانە «تۇلپار-تالگو» زاۋىتىندا بولدى. ەلباسىمەن بىرگە پرەزيدەنت اكىمشىلىگىنىڭ باسشىسى ادىلبەك جاقسىبەكوۆ جانە استانا اكىمى اسەت يسەكەشەۆ بولدى.
استانا كولىك-لوگيستيكاسى – يندۋستريالدىق باعدارلاما اياسىندا سالىنعان بىرەگەي ورتالىق. بۇل ورتالىق ازيانى بىلاي قويعاندا, كاۆكاز بەن ءسىبىر اۋماعىنداعى ەڭ ءىرى كولىك-لوگيستيكالىق حاب بولىپ سانالادى. مۇندا كەدەندىك تاۋارلار ەكى-ءۇش ساعات كولەمىندە راسىمدەلەدى. بۇرىن وعان ءۇش تاۋلىك ۋاقىت كەتەدى ەكەن. سونداي-اق, بۇل ورتالىقتا حالىقارالىق جانە رەسپۋبليكالىق جۇك تاسىمالىنا قىزمەت كورسەتۋ, تاۋارلار ساقتايتىن قويما جانە باسقا قىزمەتتەر دە كورسەتىلەدى. قويمادا كليماتتىق جانە سالقىنداتۋ ءبولىمى جۇمىس جاسايدى. بەس شاقىرىمدىق تەمىرجول تۋرا قويمانىڭ الدىنا دەيىن تارتىلعان. مۇنىڭ ءوزى ايماقتارعا, قالالارعا قويمادا ساقتالعان تاۋاردى تەز تاسىمالداۋعا مۇمكىندىك بەرەدى. الداعى شىلدە ايىنان باستاپ ورتالىقتا «يس استانا-1» اقپاراتتىق جۇيە پيلوتتىق جوباسى ەنگىزىلمەكشى. مۇنى ەلىمىزگە بۇۇ ۇسىنىپ وتىرعان كورىنەدى. وسى جوبا قولدانىسقا ەنگەندە, كەدەندىك راسىمدەردى ءبىر ساعاتتىڭ ىشىندە جۇزەگە اسىرۋعا مۇمكىندىك تۋادى. وسىنىڭ ءبارى اينالىپ كەلگەندە ەلورداداعى بيزنەستىڭ دامۋىنا, سىرتقى ساۋدا اينالىمىنىڭ ارتۋىنا سەپتەسەدى. جۇك اينالىمىنىڭ كولەمى 20 پايىزعا ارتسا, ەلوردالىق بيۋدجەت 25-30 ملرد تەڭگەگە وسەتىن بولادى.
بۇدان سوڭ ەلباسى «GLB» ءۇي قۇرىلىسى كومبيناتى جۇمىسىمەن تانىستى. «شار قۇرىلىس» كومپانياسى بازاسىندا بوي كوتەرگەن بۇل يننوۆاتسيالىق كاسىپورىن استانانىڭ يندۋستريالدى پاركىندە ورنالاسقان. ونىڭ قۇرىلىسىنا 30 ملرد تەڭگەدەن استام قارجى جۇمسالعان. قازاقستاندا مۇنداي ءوندىرىستىڭ بالاماسى جوق. كاسىپورىندا تۇرعىن ۇيلەردىڭ قابىرعالارى ورتاسىنا جىلۋ ۇستاعىش ماتەريال سالىنعان تەمىربەتونداردان قۇراستىرىلادى. سونداي-اق, ءۇيدىڭ قابىرعالارىن ارلەۋ, ءىشىن جانە سىرتىن بەزەندىرۋ دە وسىنداعى 8 تسەحتا جۇزەگە اسادى. ءتىپتى, ەسىك, تەرەزەسىمەن قوسا جاسالادى. اۆتوماتتاندىرىلعان قۇرىلعىلار گەرمانيادان, اۆستريادان اكەلىنگەن.
– ول قۇرىلعىلارمەن جۇمىس جاساۋ ءۇشىن ارنايى ماماندار وقىتىلىپ, دايىندالعان. قازىر وندىرىستە بەس جۇزگە جۋىق ادام جۇمىس ىستەيدى. كاسىپورىن تولىق قۋاتىنا كوشىپ, ەكى اۋىسىمدا جۇمىس جاساعاندا, 1200 ادام جۇمىسپەن قامتىلادى. زاۋىتتىڭ وندىرىستىك قۋاتى «نۇرلى جول» مەملەكەتتىك تۇرعىن ءۇي باعدارلاماسىن جۇزەگە اسىرۋعا مۇمكىندىك بەرەدى. ءۇي قۇرىلىسى كومبيناتىنىڭ جاڭا زامانعى جوعارى تەحنولوگيالى ستاندارتتارمەن جاسالعان ءۇي قابىرعالارى جانە باسقا ونىمدەرىن پايدالانا وتىرىپ, كوپ قاباتتى تۇرعىن ۇيلەردىڭ قۇرىلىسىن بۇرىنعىسىنان ەكى-ءۇش ەسە جىلدام سالۋعا بولادى, – دەپ ءتۇسىندىردى ەلباسىنا «GLB» جشس باس ديرەكتورى جاننا بەكتەمiروۆا.
ءوندىرىس ورنىنىڭ جالپى اۋماعى 15 گەكتار جەردى الىپ جاتىر. وسى جەردەگى وندىرىستە تەك قانا جەرگىلىكتى شيكىزات پايدالانىلادى. كاسىپورىن قازىردىڭ وزىندە جىلىنا 250 مىڭ شارشى مەتر تۇرعىن ءۇي تۇرعىزۋعا قابىلەتتى. الەۋەتتى جابدىقتاۋشىلاردان قوماقتى تاپسىرىستار دا تۇسە باستاپتى.
پرەزيدەنت نۇرسۇلتان نازارباەۆ يندۋس-تريالدى پاركتەگى «تۇلپار-تالگو» زاۋىتىنا بارعاندا جاڭادان قۇراستىرىلعان ۆاگونداردى ارالاپ, ساپاسىمەن جەتە تانىسىپ شىقتى. بۇل ۆاگونداردىڭ بۇرىنعىسىنان وزگەشەلىگى – ونىڭ اۋقىمى كەڭەيتىلگەن, بيىكتىگى دە بۇرىنعىسىنان ءسال جوعارى. سونىڭ ناتيجەسىندە كۋپەلەر دە, اجەتحانا جانە باسقا بولمەلەر دە كەڭىگەن. بۇرىن جولاۋشىلار ونىڭ تارلىعىنا, ىڭعايسىزدىعىنا كوپ شاعىم ايتاتىن. ەندى ونىڭ ءبارى رەتكە كەلگەن سىڭايلى. ماسەلەن, بيىكتىگى 22,4 سم-گە كوتەرىلسە, ەنى 25 سم-گە كەڭەيتىلگەن. جاتىن ورىنداردىڭ ۇزىندىعى 7 سم-گە ۇزارعان. «تۋريست» دەپ اتالاتىن جاڭا ۆاگون جاساۋ كەزىندە مۇمكىندىگى شەكتەۋلى مۇگەدەك جانداردى دا ەستەن شىعارماعان. ۆاگون ىشىندەگى ءۇش كۋپە مۇگەدەك جاندارعا لايىقتالىپ جابدىقتالعان. ايتا كەتەر جاي, مۇنداي وزگەرىستەر بيلەتتىڭ قۇنىنا اسەر ەتىپ وتىرعان جوق.
بيىل جىل اياعىنا دەيىن «قازاقستان تەمىر جولى» كومپانياسى وسىنداي 149 كەڭ ۆاگونداردى قولدانىسقا ەنگىزگەلى وتىر. ساپاسى اناعۇرلىم جاقسارعان ۆاگوندار 50-60 گرادۋس ايازعا دا شىدامدى.
– زاۋىتتىڭ جۇمىسىمەن جاقىن تانىسىپ شىقتىم. بارلىعى دا تالاپقا ساي. يندۋس-تريالدى پارك وتە جوعارى قارقىنمەن دامىپ كەلەدى. ساعاتىنا 160 شاقىرىم جىلدامدىقپەن جۇرەتىن «تۇلپار-تالگو» پويىزى بۇرىن ءۇش كۇن جۇرەتىن جولدى ەكى-ءۇش ەسەگە قىسقارتۋعا مۇمكىندىك بەرىپ وتىر. ۆاگونداردىڭ ءىشى كەڭ, جولاۋشىلارعا بارلىق جاعداي جاسالعان. جولعا كەتەتىن ۋاقىتتىڭ قىسقارۋى ەكونوميكامىزعا دا وتە پايدالى, – دەدى مەملەكەت باسشىسى.
مەڭدوللا شامۇراتوۆ
