استانادا حالىقارالىق دەڭگەيدەگى مەديتسينا, ءبىلىم بەرۋ مەكەمەلەرى جانە سول جاعالاۋدا زاماناۋي ۇلگىدەگى ساۋدا الاڭى, ياعني ۇلكەن بازارلار سالىنادى. بۇل تۋرالى «ەلوردا تىنىسى» راديوحابارىندا ءمالىم بولدى.
سول جاعالاۋدا ءىرى بازارلار سالىنادى
«ەلوردا تىنىسى» راديوحابارىنىڭ كەزەكتى قوناعى بولعان «Astana» اكك ۇك» اق باسقارما توراعاسىنىڭ ورىنباسارى باۋىرجان كانكين مەن «Kazakh Invest» ۇك» اق وڭىرلىك ديرەكتورى, استانا قالاسى اكىمىنىڭ ينۆەستيتسيا جونىندەگى كەڭەسشىسى ءمادينا كوكباەۆا ينۆەستيتسيالىق كليمات تاقىرىبىن قاۋزاپ, ەلورداداعى جۇزەگە اسىپ جاتقان جانە بولاشاقتىڭ ەنشىسىندەگى بىرقاتار جوبالار جايلى اڭگىمەلەدى.
«Astana» اكك ۇك» اق باسقارما توراعاسىنىڭ ورىنباسارى باۋىرجان كانكيننىڭ ايتۋىنشا, ەلوردانىڭ سول جاعالاۋىندا ەكى بازار سالىنادى. بۇل جوباعا ارنالعان جەر دە دايىن كورىنەدى.
– جالپى, استاناداعى بازارلار وڭ جاعالاۋداعى ءبىر ماڭدا ورنالاسقان عوي. ولاردىڭ بارلىعى بۇرىنعى, ياعني كەڭەس زامانىنىڭ ستيلىندە سالىنعان. سونىمەن قاتار ول جاققا ارنايى بارۋ ءۇشىن ءبىرشاما ۋاقىت كەتەدى. ونىمەن قوسا وندا كولىك كەپتەلىسى دە ءجيى بولادى. وسىنداي جايسىزدىقتاردى بولدىرماس ءۇشىن ەلوردانىڭ سول جاعالاۋىنىڭ ەكى بولىگىنە زاماناۋي ءىرى بازارلار سالۋ جوسپارلانۋدا. مىسالى, ەكى بازاردىڭ ءبىرى قورعالجىن تاس جولىنىڭ بويىندا, قاراوتكەل (يلينكا) ماڭىندا سالىنۋى مۇمكىن, – دەگەن ب.كانكين ەنشىلەرىندەگى 30 جوبانىڭ جىل سوڭىنا دەيىن بەسەۋىن جۇزەگە اسىرۋ جوسپارلارىندا تۇرعانىن اتاپ ءوتتى.
حالىقارالىق مەديتسينا, ءبىلىم مەكەمەلەرى قاجەت
ءوز كەزەگىندە ءمادينا كوكباەۆا الداعى ۋاقىتتا ەلوردادا حالىقارالىق دەڭگەيدەگى اۋرۋحانا مەن بالاباقشا, مەكتەپ سالىناتىنىن جەتكىزدى.
– شەتەلدىك ينۆەستورلاردى تارتۋداعى باستى ماسەلە – وسى, ياعني اۋرۋحانا, بالاباقشا, مەكتەپ. ينۆەستورلار دا ءبىزدىڭ ەلگە كەلمەس بۇرىن ەڭ اۋەلى وسىنى سۇرايدى. ءويتكەنى ولاردىڭ وتباسىنا بارلىق جايلىلىق قاجەت. شەتەلدىكتەر بۇل جاعىنا باسا ءمان بەرەدى. سوندىقتان زامان تالابىنا ساي, حالىقارالىق دەڭگەيدە قىزمەت كورسەتەتىن مەديتسينالىق مەكەمە, ءبىلىم بەرۋ ورتالىقتارىن سالۋدى جوسپارلاپ وتىرمىز, – دەگەن م.كوكباەۆا ءوزىنىڭ قىزمەتى جايلى دا ايتىپ ءوتتى. – مەنىڭ ينۆەستيتسيا سالاسىندا ازدى-
كوپتى تاجىريبەم بار. مىسالى, بۇرىن قر ينۆەستيتسيا جانە دامۋ مينيسترلىگىندە قىزمەت ىستەگەن بولاتىنمىن. ول كەزدەگى جۇمىسىمىز بۇكىل رەسپۋبليكانى قامتىعان ەدى. ياعني وزگە وڭىرلەردەگى جوبالاردى دا جۇزەگە اسىرۋ ءۇشىن ينۆەستورلاردى جۇمىلدىراتىنبىز. ال قازىر ماعان جۇكتەلگەن مىندەت – تەك قانا استانا اۋماعىنداعى جوبالاردى جۇزەگە اسىرۋعا كۇش سالۋ. بىراق ماعان وسى قىزىقتىراق سەكىلدى. ويتكەنى باسقا وڭىرلەردەگى جوبالاردىڭ جۇزەگە اسقانىن ەلوردادا وتىرىپ, سوڭىنا دەيىن باقىلاۋعا مۇمكىندىگىمىز بولمايدى. سوندىقتان دا ونى ۇنەمى كوزبەن كورمەگەندىكتەن, جوبانىڭ قانداي دەڭگەيدە جۇزەگە اسىپ جاتقانىنان بەيحابار بولاسىڭ. ال استاناداعى جوبالاردىڭ ءجونى بولەك. ونىڭ كەم-كەتىگى بولسا, سول بويىنشا ينۆەستورلارعا قول ۇشىن سوزۋعا مۇمكىندىك بار.
كرەاتيۆتى جوبالاردى كۇتەدى
ءسوز اراسىندا باۋىرجان كانكين «Astana» الەۋمەتتىك-كاسىپكەرلىك كورپوراتسياسى يدەياسى بار ادامداردىڭ قانداي بيزنەس-جوبالارىن جۇزەگە اسىرۋعا اتسالىساتىنىن جەتكىزدى.
– ءبىز يدەياشىل ادامداردى قولدايمىز.
ءبىزدىڭ ەنشىمىزدەگى جوبالاردىڭ ءبىرى – ەلوردا كوشەلەرىنە وتپەلى الاڭشالار سالۋ. ياعني, توبەسى مەن جان-جاعىنىڭ بارلىعى اينەكپەن جابدىقتالاتىن بۇل وتپەلى الاڭشالاردىڭ ەسىگى كەز كەلگەن ادامعا كۇندىز-ءتۇنى ايقارا اشىق بولادى. اشىق اسپان استىندا ەلوردالىقتار مەن قالا قوناقتارىنا ەمىن-ەركىن قىدىرىپ جۇرۋگە مۇمكىندىك جاسالادى. تەك وسىعان قىزىعۋشىلىق تانىتاتىن ينۆەستورلار تابىلسا, بۇل جوبانى جۇزەگە اسىرۋدىڭ اۋىلى الىس ەمەس
بىراق ۇسىناتىن جوبا بۇرىننان قولدانىستاعى ادەتتەگى بيزنەس ءتۇرى بولماۋى قاجەت. ماسەلەن, قاراپايىم كولىك جۋ كەشەنىن اشقىسى كەلەتىندەر بىزگە كەلمەي-اق قويسا دا بولادى. نەگە دەسەڭىز, مۇنداي جاعدايدا ءبىز ولارعا «كرىشا», «Olx.kz» سياقتى ءموبيلدى قوسىمشالاردان حابارلاندىرۋلاردى قاراۋعا كەڭەس بەرىپ, شىعارىپ سالامىز. ەگەر كولىك جۋ كەشەنىن ەمەس, جىلىجاي سالعىسى كەلەتىندەر بولسا, جوباسىن قاراۋعا بولادى. ءبىز تەك كرەاتيۆتى, جويقىن جوبالاردى كۇتەمىز. ونداي جاعدايدا, بىرىگىپ جۇمىس جاساۋعا ءاردايىم ءازىرمىز, – دەيدى ب.كانكين. – ءبىزدىڭ ەنشىمىزدەگى جوبالاردىڭ ءبىرى – ەلوردا كوشەلەرىنە وتپەلى الاڭشالار سالۋ. ياعني, توبەسى مەن جان-جاعىنىڭ بارلىعى اينەكپەن جابدىقتالاتىن بۇل وتپەلى الاڭشالاردىڭ ەسىگى كەز كەلگەن ادامعا كۇندىز-ءتۇنى ايقارا اشىق بولادى. ەشقانداي شەكتەۋ قويىلمايدى. اشىق اسپان استىندا ەلوردالىقتار مەن قالا قوناقتارىنا ەمىن-ەركىن قىدىرىپ جۇرۋگە مۇمكىندىك جاسالادى. تەك وسىعان قىزىعۋشىلىق تانىتاتىن ينۆەستورلار تابىلسا, بۇل جوبانى جۇزەگە اسىرۋدىڭ اۋىلى الىس ەمەس.
ەنشىلەس كومپانيالار مۇددەسى ورتاق
سونىمەن قاتار «Astana» اكك ۇك» اق باسقارما توراعاسىنىڭ ورىنباسارى ءسوز اراسىندا جۇزەگە اسىرىلعان جوبا تۋرالى دا اڭگىمەلەدى.
– «ASTANA TAXI» ينۆەستيتسيالىق جوباسىن اتاپ وتكىم كەلىپ تۇر. بۇل – زاڭدى اۆتوتاسىمالداۋشىلاردىڭ سانىن ارتتىرىپ, حالىقتىڭ ءجۇرىپ-تۇرۋ قاۋىپسىزدىگىن قامتاماسىز ەتۋ ماقساتىندا جۇزەگە اسقان جوبا. اتالمىش جوبانىڭ جۇزەگە اسۋىنا ەشقانداي قيىندىق تۋىنداعان جوق. تەك استانا قالاسى اۆتوموبيل جولدارى, جولاۋشىلار كولىگى باسقارمالارىمەن جانە باسقا دا بىرقاتار مەكەمەلەرمەن ءبىرشاما كەلىسسوزدەر جۇرگىزىلدى. وسىنىڭ ناتيجەسىندە «ASTANA TAXI» جۇرگىزۋشىلەرى Bus lane جولاعىمەن جۇرۋگە مۇمكىندىك الدى. سونىڭ ارقاسىندا اتالمىش تاكسي جۇرگىزۋشىلەرى جولاۋشىلاردى دىتتەگەن جەرىنە جىلدام جەتكىزىپ, ساپالى قىزمەت كورسەتۋدە. بۇل تۇرعىدا 300 سۋ جاڭا اۆتوكولىك ساتىپ الىنعان بولاتىن. بىراق ەگەر وسى تاكسي ارقىلى ناپاقاسىن تابۋعا نيەتتىلەر بولسا, جۇرگىزۋشىلەر ءوز كولىكتەرىمەن دە جۇمىسقا قابىلدانادى. تەك كولىكتەرى تالاپقا ساي بولۋى ءتيىس, – دەيدى ول.
راديوحابار بارىسىندا سپيكەرلەر كاسىپكەرلىك, بيزنەس سالاسىنداعى استانا قالاسى كاسىپكەرلىك جانە ونەركاسىپ, ينۆەستيتسيا جانە دامۋ باسقارمالارى سياقتى مەكەمەلەر مەن «AstanaInvest» قالالىق ينۆەستيتسيالار دامۋ ورتالىعى, «Astana» اكك ۇك» اق, «Kazakh Invest» ۇك» اق سىندى ەنشىلەس كومپانيالاردىڭ ءوزارا باسەكەلەس ەمەس ەكەنىن, كەرىسىنشە, ءبىر-ءبىرىنىڭ ورنىن تولىقتىرىپ وتىراتىنىن, مۇددەلەرى دە ورتاق ەكەنىن ايتتى.
نۇرداۋلەت كاكىشەۆ
