استانادا ينجەنەرلەر مەن عالىمداردىڭ «بولاشاقتىڭ ەنەرگياسى: يننوۆاتسيالىق ستسەناريلەر جانە ولاردى جۇزەگە اسىرۋ ادىستەرى» اتتى دۇنيەجۇزىلىك كونگرەسى باستالدى. ەحرو كورمەسى اياسىندا وتەتىن 2 كۇندىك شاراعا الەمنىڭ 50 ەلىنەن شەتەلدىك 300 عالىم استاناعا ارنايى ات باسىن بۇرىپ وتىر. تانىمال تۇلعالار قاتارىندا نوبەل سىيلىعىنىڭ لاۋرەاتتارى دا بار.
كونگرەستىڭ سالتاناتتى اشىلۋىندا مەملەكەت باسشىسى نۇرسۇلتان نازارباەۆتىڭ قۇتتىقتاۋ ءسوزىن قازاقستان ۇلتتىق جاراتىلىستانۋ عىلىم اكادەمياسىنىڭ پرەزيدەنتى, اكادەميك نۇرتاي ابىقاەۆ وقىپ بەردى. قۇتتىقتاۋ سوزىندە ەلباسى ينجەنەرلەر مەن عالىمداردىڭ استانادا باس قوسقانىنا قۋانىشتى ەكەنىن اتاپ ءوتتى. سونداي-اق, ول اتالعان فورۋمنىڭ تاقىرىبى حالىقارالىق «ەكسپو-2017» مامانداندىرىلعان كورمەسىنىڭ يدەياسىمەن ۇندەس ەكەنىن ايتقان.
– ءبىزدىڭ ەل قازىرگى زامانعى ەكولوگيالىق ۇردىستەردىڭ ماڭىزىن تۇسىنە وتىرىپ, «جاسىل ەكونوميكا» قاعيدالارىنا سايكەس اۋقىمدى تەحنولوگيالىق جاڭعىرۋدى بىرتىندەپ جۇزەگە اسىرۋدا. بۇگىندە قورشاعان ورتانى قورعاۋ, ەنەرگيا ۇنەمدەيتىن ەكونوميكاعا كوشۋ جانە تابيعي رەسۋرستاردى ۇنەمدى پايدالانۋ بولاشاقتىڭ اقىلعا قونىمدى بىردەن-ءبىر پاراديگماسى بولىپ سانالادى. ورنىقتى دامۋدىڭ بەرىك ينستيتۋتسيونالدىق نەگىزدەرىن «جاسىل ەكونوميكا» سالاسىنداعى كەڭ كولەمدى حالىقارالىق ديالوگ پەن ىنتىماقتاستىق ارقىلى عانا قۇرۋعا بولادى. وسى باعىتتاعى عىلىمي يدەيالار مەن تاجىريبەلەر جونىندە جان-جاقتى وي ءبولىسۋ بۇكىل جەر شارىندا ەكولوگيالىق تۇرعىدان تازا ەنەرگەتيكانىڭ قالىپتاسۋىنا سەپتىگىن تيگىزەدى, – دەدى پرەزيدەنت.
فورۋمدا ونەرتاپقىش عالىمداردىڭ وزدەرى ويلاپ تاپقان تۋىندىلار كورمەگە قويىلدى. ماسەلەن, جۇرتتى ق.ي.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ پروفەسسورى ءجۇزباي قاسىمبەكوۆتىڭ جوباسى قىزىقتىردى.
– «ەكسپو-2017» حالىقارالىق مامانداندىرىلعان كورمەسىنە ۇسىنىپ وتىرعان شاعىن گەس-ءتىڭ شارۋالار ءۇشىن پايداسى مول. جاڭا تەحنولوگيالىق جوبانى قازاقستان رەسپۋبليكاسى مەن بۇكىلالەمدىك ينتەللەكتۋالدىق مەنشىك ۇيىمى ارقىلى پاتەنتتەپ الدىم. سوڭعى جىلدارعى شاحتالى قۇدىقتار مەن ۇڭعىمالاردى تازالاۋعا ارنالعان قۇرال-جابدىقتاردى جامبىل جانە الماتى وبلىستارىندا وندىرىسكە ەنگىزۋگە بايلانىستى جالپى ەكونوميكالىق تيىمدىلىك 2456,0 مىڭ تەڭگەنى قۇرادى. جالپى شاعىن گەس-ءتىڭ ارقاسىندا شارۋالار قىرۋار قارجىنى ۇنەمدەپ قالۋىنا بولادى. سوندىقتان بولسا كەرەك, بۇل جوباعا دەگەن قىزىعۋشىلىق جوعارى, – دەيدى ول.
بۇگىن اياقتالاتىن كونگرەستە 300-دەن استام باياندامالار وقىلىپ, 80-نەن اسا عىلىمي تانىستىرىلىمدار جاسالادى. سونداي-اق جۇزەگە اسىرىلعان يننوۆاتسيالىق جوبالاردىڭ ماكەتى نەمەسە بەينەماتەريالدارى ۇسىنىلادى. ەستەرىڭىزگە سالا كەتەيىك, WSEC-2017 ينجەنەرلەر مەن عالىمداردىڭ دۇنيەجۇزىلىك كونگرەسى ورتالىق ازيا بويىنشا تۇڭعىش رەت ۇيىمداستىرىلىپ وتىر.
سەرىك جولداسباي
