استانا قالاسى اكىمدىگىنىڭ ونلاين ءباسپاسوز قىزمەتىندە iQala قىزمەت كورسەتۋ ورتالىعىنىڭ جۇمىسى تۋرالى بريفينگ بەردى. سپيكەرلەر رەتىندە قالالىق تسيفرلاندىرۋ جانە مەملەكەتتىك قىزمەت باسقارماسى مەملەكەتتىك قىزمەتتەردى اۆتوماتتاندىرۋ ءبولىمىنىڭ باسشىسى دىنمۇحامبەت حاسەنوۆ پەن iQala قالالىق قىزمەت ورتالىعىنىڭ ديرەكتورى بوتاگوز مۋستافينا قاتىستى.
قازىر بۇكىل الەم قىزمەت كورسەتۋ سالالارىن تسيفرلاندىرىپ, حالىقتىڭ ءومىر سۇرۋىنە ىڭعايلى جاعداي تۋىنداتۋدا. «اقىلدى قالا» قىزمەتىن ۇيلەستىرۋ تۇرعىندار ءۇشىن بارىنشا قولايلى ەتۋگە جانە تۋريستەر ءۇشىن تارتىمدى قىلۋعا مۇمكىندىك بەرەدى. سونداي جوبانىڭ ءبىرى – iQala.
– ورتالىقتىڭ ىڭعايلىلىعىن وندا كورسەتىلگەن قىزمەت تۇرلەرىنەن اڭعارۋعا بولادى. 2019 جىلدىڭ ماۋسىم-جەلتوقسان ايىندا ورتالىق 3701 قىزمەت كورسەتكەن بولسا, 2020 جىلى بۇل كورسەتكىش – 69560, 2021 جىلى 148586 جەتتى. جىل باسىنان بەرى كەلۋشىلەر 125000 قىزمەت الدى.
iQala ورتالىعى 140-تان استام قىزمەت ءتۇرىن كورسەتەدى. ونىڭ ىشىندە جىلجىمايتىن مۇلىك يەسى اۋىسقان جاعدايدا, كوممۋنالدىق مەكەمەلەرىمەن شارتتى جاساۋ, تەحنيكالىق جانە بىرىڭعاي تولەم شارتىن الۋعا سۇرانىس جوعارى ەكەنىن كورىپ وتىرمىز.
استانا قالاسىنىڭ اكىمدىگى مەن «ازاماتتارعا ارنالعان ۇكىمەت» مەملەكەتتىك كورپوراتسياسى» كە اق بىرلەسە, كوممۋنالدىق قىزمەت ءتۇرىن ەلەكتروندى فورماتقا كوشىردى. ەندى iQala ورتالىعىنىڭ كەڭسەسى مەن پورتالى ارقىلى ەلوردا تۇرعىندارى جىلۋ, اۋىز سۋ, ەلەكتر ەنەرگيا, تۇرمىستىق قاتتى قالدىقتاردى شىعارۋ قىزمەتىنە كەلىسىمشارتتى جاساي الادى, – دەيدى دىنمۇحامبەت حاسەنوۆ.
قازىر استانالىقتار تاراپىنان گازداندىرۋ ىسىنە سۇرانىس ارتتى. وسىعان بايلانىستى iQala-عا «قازترانسگاز ايماق» اق-تىڭ قىزمەت تۇرلەرى ەنگىزىلدى. تابيعي گازدان بولەك, ورتالىق گاز جۇيەسىمەن كەلىسىمشارتقا وتىرۋ قىزمەتى تسيفرلاندىرىلدى.
– ەل اۋماعىندا استانا العاش بولىپ iQala ورتالىعىن قۇرىپ, مونوپوليالىق كومپانيالار مەن كوممۋنالدىق كورسەتىلەتىن قىزمەتتەردى ۇسىناتىن ۇيىمداردىڭ قىزمەتىن ءبىر جەرگە شوعىرلاندىرىپ, ءبىر تەرەزە قاعيداسى بويىنشا قىزمەت ەتۋدە.
جۇيەنى اۆتوماتتاندىرۋ جانە تسيفرلاندىرۋ, اشىقتىق جانە جاريالىقتى ۇستانۋ ورتالىق قىزمەتىنىڭ ساپاسىن ارتتىردى.
مامىر ايىنان باستاپ iQala ورتالىعى سارىارقا اۋدانى, ءازىربايجان مامبەتوۆ كوشەسىندەگى №24 مەكەنجايى بويىنشا حالىققا قىزمەت ەتەدى. بۇل باعىتتا قوعامدىق كولىك كوپتەپ جۇرەتىندىكتەن, قالا تۇرعىندارىنا ىڭعايلى, – دەدى ورتالىق ديرەكتورى.
iQala – الەۋمەتتىك جوبا. ونىڭ قىزمەتى ەكى باعىتتا جۇرەدى. ءبىرىنشىسى ونلاين قىزمەت ns.gov.kz ارقىلى جۇزەگە اسسا, ەكىنشىسى تۇرعىندار فرونت-وفيسكە كەلىپ, تىكەلەي كونسۋلتاتسيالىق-كەڭەس قىزمەتىن الادى.
