قر تۇڭعىش پرەزيدەنتى – ەلباسى كىتاپحاناسىندا يرانداعى يسلام رەۆوليۋتسياسى جەڭىسىنىڭ 40 جىلدىعىنا ارنالعان «يران كالليگرامماسى» اتتى كورمە ءوتتى.
بۇل ءمانى بار شارانى ەلباسى كىتاپحاناسى «مادەنيەت ارقىلى ۇنقاتىسۋ» حالىقارالىق جوباسى اياسىندا قازاقستانداعى يران يسلام رەسپۋبليكاسىنىڭ ەلشىلىگىمەن بىرلەسىپ ۇيىمداستىردى.
كورمەگە يراندىق سۋرەتشى سايد حۋشمانەشتىڭ 40-قا جۋىق كارتيناسى قويىلدى. بۇل قىلقالام شەبەرى بارلىق عۇمىرىن كالليگرامما ونەرىنە ارناپ كەلە جاتىر. وسى تۋرالى كىتاپ تا جازعان. سۋرەتشىنىڭ جۇمىستارىندا كوركەمدىلىگى مەن مازمۇندىلىعى ءساتتى ۇيلەسىم تاپقان. اۆتور وسى كورمەگە ءۇش جىلداي دايىندالىپتى.
شارا بارىسىندا ەلىمىزگە العاش تابان تيگىزىپ وتىرعان سايد حۋشمانەشتىڭ ءوزى ءسوز الىپ, كەلۋشىلەرگە ريزاشىلىعىن ءبىلدىردى.
«مەن ءوزىم وسى ونەرمەن 27 جىلدان بەرى اينالىسامىن. وسى جىلدار ىشىندە قابىلەتىمدى ۇشتاپ, تەحنيكامدى جەتىلدىردىم. وسىدان ون جىل بۇرىنعى تۋىندىلارىم مەن قازىرگى جۇمىستارىم ءبىر-بىرىنە ۇقسامايدى. بۇگىن سىزدەرگە ۇسىنعان توپتاما دا تازحيبپەن بەزەندىرىلگەن ءارى يراندىق كلاسسيكالىق جانە ءداستۇرلى كالليگرافياعا جاتقىزىلاتىن «ناستاليك» جازۋى قولدانىلعان بىرنەشە كارتينالارىمدى اكەلدىم» دەدى ول.
