ەلورداداعى جاستار سارايىندا كەزەكتى بوس جۇمىس ورىندارى جارمەڭكەسى ءوتتى. «ەڭبەك موبيلدىلىگى ورتالىعى» ۇيىمداستىرعان جارمەڭكەگە 80-گە جۋىق جۇمىس بەرۋشى قاتىسىپ, 700-دەن استام بوس جۇمىس ورنىن ۇسىندى.
جۇمىسسىز ازاماتتاردى, پروباتسيا قىزمەتىندە ەسەپتە تۇرعان ادامداردى, NEET ساناتىنداعى جاستاردى جۇمىسپەن قامتۋعا جاردەمدەسۋدە بوس جۇمىس ورىندارى جارمەڭكەسى ءتيىمدى. مۇندا قۇرىلىس, ءبىلىم, مەديتسينا, ساۋدا, كولىك-لوگيستيكا, قارجى سالاسىنىڭ كومپانيا وكىلدەرى كەلىپ, كاسىپورىننىڭ مۇمكىندىگىن تانىستىرىپ, بىلىكتى كادرلاردى الۋعا مۇمكىندىگى بار.
«بيىل جىل باسىنان بەرى مانساپ ورتالىعىنىڭ باستاماسىمەن 8 ءىرى جالپىقالالىق بوس ورىندار جارمەڭكەسى وتكىزىلدى. بۇگىنگى ءىرى جارمەڭكە – بيىلعى سوڭعى ءىس-شارا. قالادا 27 شاعىن بوس ورىندار جارمەڭكەسى دە وتەدى. جىل سوڭىنا دەيىن سونداي 3 جارمەڭكەنى ۇيىمداستىرۋ جوسپارلانىپ وتىر. بۇل جولعى ءىس-شاراعا 78 كومپانيا 773 ۆاكانسيا ۇسىندى. مۇندا جۇمىس ورىندار ىشىندە قىزمەت كورسەتۋ سالاسىندا بوس جۇمىس ورنى باسىم. جارمەڭكە جۇمىس بەرۋشى مەن جۇمىس ىزدەپ جۇرگەن ادامعا ۇلكەن مۇمكىندىك بەرەدى. قاجەتتى جۇمىس ىزدەپ جۇرگەن ادام ءوزىنىڭ تۇيىندەمەسىن بىرنەشە جۇمىس بەرۋشىگە ۇسىنىپ, تىكەلەي تىلدەسسە, جۇمىس بەرۋشى دە جارمەڭكە كەزىندە وزدەرىنە قاجەتتى ماماندارىن تەز تابادى» دەدى مانساپ ورتالىعىنىڭ باسشىسى باعيلا ورىنبەتوۆا.
جارمەڭكەدە جۇمىس ۇسىنعان كومپانيا وكىلدەرى قاتارىندا «وتباسى بانك» اق, «تسەنتر يپوتەكي استانا» جشس, «QazaqZher» جشس, «استانا تازالىق» جشس, «بانك تسەنتركرەديت» اق, «Clean City NC» جشس, «استىق لوگيستيك» جشس, «Magnum» ساۋدا جەلىسى, سونداي-اق قالالىق ءبىلىم بەرۋ ۇيىمدارى جانە باسقا دا كوپتەگەن جۇمىس بەرۋشى كومپانيالار قاتىستى. سولاردىڭ قاتارىندا استانا قالاسىنىڭ پوليتسيا دەپارتامەنتى بار. پوليتسيا قىزمەتكەرى رۇستەم بولاتوۆ جۇمىس ىزدەۋشىلەرگە ىشكى ىستەر ورگاندارىنا قىزمەتكە كىرۋ ءتارتىبى, سونداي-اق ماتەريالدىق قامتاماسىز ەتۋ جانە الەۋمەتتىك كەپىلدىكتەر تۋرالى بارلىق قاجەتتى اقپارات بەرىلەتىنىن ايتتى.
«بوس ورىندار جارمەڭكەسىنە پوليتسيا دەپارتامەنتى تۇراقتى تۇردە قاتىسىپ كەلەدى. نەگىزىنەن, بوس ورىندار پوليتسيا قىزمەتكەرى, جۇرگىزۋشى, پاترۋلدىك پوليتسەي, جىلدام قيمىلدايتىن ارنايى جاساققا ىرىكتەۋ جۇرگىزىلۋدە. قالالىقتار اراسىندا بۇل قىزمەتكە ورنالاسۋعا سۇرانىس كوپ. نەگىزگى ەسكەرىلەتىن تالاپتاردىڭ قاتارىندا جۇمىس ىزدەۋشىنىڭ جاسى 35-تەن اسپاۋى ءتيىس, ورتا ارناۋلى نەمەسە جوعارى ءبىلىمىنىڭ بولۋى قاجەت. مەملەكەتتىك قىزمەتتەن تەستەن جانە ارنايى مەديتسينالىق تەكسەرىستەن ءوتىپ, دەنە شىنىقتىرۋ بويىنشا سىناقتاردى تاپسىرعاندار جۇمىسقا قابىلدانادى» دەدى ول.
ءوز تۇيىندەمەسىن ۇسىنعاندار اراسىندا جاستاردىڭ دەنى باسىم بولدى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تۋريزم جانە سەرۆيستىك قىزمەت كورسەتۋ ماماندىعىنىڭ بويىنشا وقىپ جۇرگەن جالعاس ابىلايحان بىلاي دەدى:
«وسى جىلى ءبىتىرۋشى تۇلەك بولعاننان كەيىن, جۇمىستى, بىرىنشىدەن, ءوز ماماندىعىم بويىنشا قاراستىرىپ جاتىرمىن. ياعني قىزمەت كورسەتۋ سالاسىنداعى جۇمىس وزىمە قىزىق. بىرنەشە كومپانياعا ءوزىمدى ۇسىندىم. جاستارعا ارنالعان بوس جۇمىس ورىندارى جارمەڭكەسىنە وسىعان دەيىن دە قاتىستىم».
جارمەڭكە بارىسىندا «ەڭبەك موبيلدىگى ورتالىعىنىڭ» ماماندارى «جاستار پراكتيكاسى», «العاشقى جۇمىس», «ۇرپاقتار كەلىسىمشارتى» باعدارلامالار كاسىپتىك وقىتۋ جانە «enbek.kz» پورتالىمەن جۇمىس ىستەۋ بويىنشا كەڭەس بەرۋ, قايتا دايارلاۋ, جۇمىس ىزدەۋ تەحنولوگياسى جانە قوسىمشا كاسىبي ءبىلىم بەرۋ مۇمكىندىكتەرى تۋرالى كەڭەس بەرىلدى.
