يزرايل ماماندارىمەن تاجىريبە الماستى
يزرايلدەگى ەڭ ءىرى مەديتسينالىق كەشەندەردىڭ ءبىرى – حايم شيبا مەديتسينا ورتالىعىنىڭ ءبىر توپ ماماندارى استانا قالاسى قوعامدىق دەنساۋلىق ساقتاۋ باسقارماسىنىڭ باستاماسىمەن كونسۋلتاتسيا بەرۋ جانە ادىستەمەلىك كومەك كورسەتۋ, اكۋشەرلىك جاعدايداعى توتەنشە جاعدايلار بويىنشا شەبەرلىك ساباقتارىن وتكىزۋ ماقساتىندا ەلورداعا كەلدى.
وسى ورتالىقتىڭ تاڭداپ الىنۋىنىڭ ءبىر سەبەبى, مۇندا جىلىنا 12 مىڭعا جۋىق بالا دۇنيەگە كەلەدى ەكەن. وسى كەشەننىڭ اكۋشەرلىك-گينەكولوگيا ءبولىمىنىڭ مەڭگەرۋشىسى, پروفەسسور يارون ءرابينوۆيچتىڭ ايتۋىنشا, سوڭعى 16 جىلدا بۇل كلينيكادا انالار ءولىمى وقيعاسى تىركەلمەگەن.
وسىنداي جەتىستىكتەرگە قول جەتكىزە بىلگەن يزرايلدىق دارىگەرلەر بۇقارالىق اقپارات وكىلدەرىمەن دە كەزدەسۋگە ۋاقىت تاپتى. شەتەلدىك ماماندار قالانىڭ پەريناتالدىق ورتالىقتارىندا بولىپ, جۇمىسىمەن تانىسىپ, اسەرلەرىمەن ءبولىستى. پەريناتالدىق ورتالىقتاردا قىزمەت ەتىپ جاتقان ارىپتەستەرىنىڭ بىلىكتىگىن لايىقتى باعالاپ, عيماراتتاردىڭ زاماناۋي تەحنولوگيالارمەن جابدىقتالعان بازاسىمەن تانىستى. ايتسە دە, قول جەتكەن جەتىستىكتەرگە توقمەيىلسىپ قاراۋعا بولمايتىنىن, ءاردايىم زاماناۋي تەحنولوگيالاردى مەڭگەرىپ, دارىگەرلەر بىلىكتىگىن ارتتىرا بىلگەندە عانا جۇيەنىڭ ودان ارى كەمەلدەنە بەرەتىنىن ايتتى. كەرىسىنشە بولعان جاعدايدا, سالادا توقىراۋ باستالاتىنى جاسىرىن ەمەس. ساراپشىلار جالپى الەمدىك ستاتيستيكالىق مالىمەتتەرمەن سالىستىرا كەلە, ەلوردا قوعامدىق دەنساۋلىق ساقتاۋ سالاسىنىڭ اكۋشەرلىك جانە گينەكولوگيا جۇيەسىندەگى وڭ ناتيجەلەرىن العا تارتتى.
ولار سوڭعى ايلاردا بولعان جاس تۋعان انالاردىڭ قازاسىنا قاتىستى پىكىرلەرىن ءبىلدىردى. «ءبىز رەسمي قورىتىندى شىعارىپ, باعاسىن بەرەتىن ارنايى كوميسسيا ەمەسپىز. دەگەنمەن سوڭعى وقيعالار تۇرعىسىندا ءوز پىكىرىمىزدى بىلدىرمەس بۇرىن, ءدال وسىنداي جاعداي ورىن العاندا, ءوزىمىز نە ىستەر ەدىك, جاس انالاردىڭ ءومىرىن ساقتاپ قالا الاتىن با ەدىك دەگەن سۇراق قويدىق. وكىنىشكە قاراي, ناۋقاستاردىڭ اۋرۋ تاريحىمەن تانىسا كەلە, بىزدە دە باسقاشا بولۋى مۇمكىن ەمەس ەدى دەگەن توقتام جاسادىق» دەيدى قوناقتار.
باستىسى, مۇنداي وقيعالاردى بولدىرماۋ كەرەك. ول ءۇشىن مىندەتتى تۇردە پروفيلاكتيكا جۇمىستارىن جۇرگىزىپ, ايەلدەردىڭ ءوز دەنساۋلىعىنا الەۋمەتتىك جاۋاپكەرشىلىگى – بوسانۋ ۇستىندە قازا بولدىرماۋدىڭ بىردەن-ءبىر جولى دەگەن ورتاق ويلارىمەن بولىسكەن شەتەلدىك ماماندار ەلوردا ءدارىگەرلەرىنىڭ ءبىلىكتىگىنە جوعارى باعاسىن بەردى.