يزرايلدە كونسۋلدىق ەسەپكە الىنباعان 400-دەن استام قازاقستاندىق بولۋى مۇمكىن. بۇل تۋرالى سىرتقى ىستەر ءمينيسترىنىڭ رەسمي وكىلى ايبەك سمادياروۆ مالىمدەدى.
«7 قازاندا يزرايلدەگى اسكەري-ساياسي جاعدايدىڭ شيەلەنىسۋىنە بايلانىستى قازاقستاننىڭ سىرتقى ىستەر مينيسترلىگىندە جەدەل شتاب قۇرىلىپ, شەتەلدەگى توتەنشە جاعدايلار كەزىندەگى ءىس-قيمىل الگوريتمىن دەرەۋ ورىنداۋعا كىرىستى. سىرتقى ىستەر مينيسترلىگىندە جانە قازاقستاننىڭ تەل-اۆيۆتەگى ەلشىلىگىندە يزرايل اۋماعىنداعى قر ازاماتتارى مەن ولاردىڭ ەلىمىزدەگى تۋىستارى ءۇشىن جەدەل جەلى اشىلدى. وسى ەكى كۇن ىشىندە وتانداستارىمىزدان 500-دەن اسا قوڭىراۋ ءتۇسىپ, ولارعا جاۋاپ بەرىلدى. قازىر قازاقستاننىڭ يزرايلدەگى ەلشىلىك-كونسۋلدىق ەسەبىندە 77 ازامات تىركەلگەن. ونىڭ ىشىندە ەلشىلىك قىزمەتكەرلەرى مەن ولاردىڭ وتباسى مۇشەلەرى بار» دەدى ايبەك سمادياروۆ.
رەسمي اقپارات بويىنشا, ءيزرايلدىڭ جوعارى وقۋ ورىندارىندا قازاقستاننىڭ 5 ستۋدەنتى وقيدى. سونداي-اق 30-عا جۋىق قازاقستاندىق جەرگىلىكتى ءتۇرلى مەديتسينالىق مەكەمەلەردە تاعىلىمدامادان ءوتىپ جاتىر. بارلىعى – 112 ادام. «تەل-اۆيۆتەگى ديپلوماتتارىمىز يزرايلدەگى قازاقستان ازاماتتارىمەن تۇراقتى بايلانىستا جانە ولارمەن جەدەل ءىس-قيمىل جاساۋ ماقساتىندا مەسسەندجەردە چات قۇردى. قازىر يزرايلدە تۇراتىن 200-گە جۋىق قازاقستان ازاماتى قوسىلعان. بۇل چاتتا وتانداستارىمىز وزدەرىنىڭ تۇراتىن جەرى تۋرالى اقپارات بەرىپ, ديپلوماتتارمەن تۇراقتى بايلانىس ورناتتى» دەدى ءسىم رەسمي وكىلى.
ونىڭ ايتۋىنشا, يزرايلدە قازا بولعان, زارداپ شەككەن, كەپىلگە الىنعان قازاقستاندىقتار تۋرالى اقپارات تۇسپەگەن. ەندى قازاقستان ەلشىلىگى Air Astana اۋەكومپانياسىمەن بىرلەسىپ, قازاقستانعا ورالۋعا نيەت بىلدىرگەن ازاماتتاردىڭ ءتىزىمىن جاساۋ, سونداي-اق ولاردى قاۋىپسىز جەرگە جەتكىزۋ بويىنشا پىسىقتاۋ جۇمىستارىن جۇرگىزىپ جاتىر. وسى ۋاقىتقا دەيىن قازاقستانعا ورالۋعا 118 ازامات نيەت بىلدىرگەن. «1-2 كۇن ىشىندە ۇكىمەت دەڭگەيىندە تەل-اۆيۆكە جىبەرىلەتىن رەپورتاتسيالىق رەيستى ۇيىمداستىرۋ ماسەلەسى پىسىقتالىپ جاتىر. قازاقستاننىڭ تەل-اۆيۆتەگى ەلشىلىگىنىڭ بولجامى بويىنشا يزرايلدە كونسۋلدىق ەسەپكە تۇرماعان 400-دەن استام قازاقستاندىق بولۋى مۇمكىن» دەدى ايبەك سمادياروۆ.
