قۋان, قازاق! 71-ءشى كانن فەستيۆالىنىڭ ەڭ ۇزدىك اكتريساسى بولىپ قازاق قىزى سامال ەسلياموۆا اتاندى. قانداسىمىز ەلىمىزدىڭ تۋماسى, دارىندى رەسەيلىك رەجيسسەر سەرگەي دۆورتسەۆويدىڭ «ايكا» پسيحولوگيالىق دراماسىندا قىرعىز ەميگرانتىنىڭ ءرولىن سومداپ, «التىن پالما جاپىراعىنا» لايىق دەپ تانىلدى.
بۇرىن-سوڭدى ەسىمى ەلگە بەيتانىس بولعان اكتريسانىڭ كىندىك قانى تامعان جەر – سولتۇستىك قازاقستان وبلىسى اققايىڭ اۋدانىنداعى ارالاعاش اۋىلى. ول پەتروپاۆلداعى ونەر كوللەدجىن تامامداعاننان كەيىن رەسەيدىڭ تەاتر ونەر ۋنيۆەرسيتەتىندە (گيتيس) ءبىلىم الۋعا بەل بۋادى. كينو الەمىن تاڭداعان سامال ەسلياموۆا بۇعان دەيىن «قىزعالداق» فيلمىندە باستى ءرولدى سومداعان. تۋىندى 2008 جىلى كانن فەستيۆالىندە «ەرەكشە كوزقاراس» بايقاۋىنىڭ باس جۇلدەسىن, جاس ادىلقازىلاردىڭ جۇلدەسىن جانە فرانتسيا ءبىلىم مينيسترلىگىنىڭ جۇلدەسىن جەڭىپ العان ەكەن.
ساراپقا سالىنعان فيلمدەردىڭ اراسىندا كوش باستاعان «ايكا» ءفيلمى 7 جىل بويى تۇسىرىلگەن. كانن فەستيۆالىنىڭ قىزىل كىلەمىنە قازاقتىڭ ويۋلى كويلەگىن كيىپ شىققان سامال ەسلياموۆا فرانتسيا ءتورىندە حالقىمىزدىڭ اتىن اسقاقتاتتى دەپ بىلەمىز.
ەڭ ۇزدىك اكتريسانىڭ ءوزىمەن حابارلاسقانىمىزدا, سامال بۇگىن استانادا باق وكىلدەرىنە ارنالعان ءباسپاسوز ءماجىلىسى وتەتىنىن مالىمدەدى.
ەسكە سالساق, بۇعان دەيىن ەلىمىزدىڭ ءتول تۋىندىسى, رەجيسسەر ابدوللا قارساقباەۆتىڭ «مەنىڭ اتىم قوجا» ءفيلمى 1967 جىلى وتكەن كانن فەستيۆالىنىڭ ارنايى جۇلدەسىنە يە بولعان.
