ەلىمىزدە جىل باسىنان بەرى مەنينگيتكە شالدىققان 58 ادام تىركەلسە, ونىڭ 12-ءسى قايتىس بولعان. بۇل تۋرالى كەشە ورتالىق كوممۋنيكاتسيالار قىزمەتىندەگى بريفينگتە دەنساۋلىق ساقتاۋ ءمينيسترى ەلجان ءبىرتانوۆ مالىمدەدى. قۇزىرلى ۆەدومستۆو باسشىسىنىڭ ايتۋىنشا, اۋرۋعا قاتىستى احۋال تۇراقتى جانە حالىقتى جاپپاي ەگۋدىڭ قاجەتتىگى جوق.
مينيستر مەنينگيت دەرتىنىڭ كورسەتكىشتەرى قۇبىلىپ وتىراتىنىن مىسالعا كەلتىردى. «2013 جىلى 117 وقيعا تىركەلىپ, 18 ادام قايتىس بولدى. 2015 جىلى بۇل اۋرۋ 424 ادامعا جۇعىپ, 62 ادام ومىرمەن قوش ايتىستى. وتكەن جىلى 62 ناۋقاس تىركەلدى, 11-ءى كوز جۇمدى. بۇل ستاتيستيكانى دەرتتىڭ اسا قاۋىپتى بولعانى ءۇشىن كەلتىردىم. احۋال تۇراقتى دەگەنىم, سوڭعى 20 جىلداعى كورسەتكىش ورتاشا دەڭگەيگە جەتتى» دەپ ءتۇسىندىردى ول. ءمينيستردىڭ مالىمەتى بويىنشا, بۇل اۋرۋعا شالدىققانداردىڭ دەنى الماتى قالاسىنىڭ ۇلەسىنە تيەدى. جىل باسىنان بەرى مەنينگوكوككا ينفەكتسياسىن جۇقتىردى دەگەن كۇدىكپەن 80 ادام اۋرۋحاناعا جاتقىزىلىپ, سونىڭ ىشىندە 35-ىنەن اۋرۋ انىقتالماعان. 32-سىنەن انىقتالىپ, 6 ادام قايتىس بولعان.
رەسمي مالىمەت بويىنشا, بۇگىنگە دەيىن ەلىمىزدە 128 ادام اۋرۋحاناعا ءتۇسىپ, ونىڭ 82-ءسى جازىلعانى, 34-ءى ەم-دوم قابىلداپ, سونىڭ ىشىندە 7 ناۋقاس جانساقتاۋ بولىمىندە جاتقانى دا اشىق ايتىلدى. ەلجان ءبىرتانوۆ وسى جيىندا كارانتين جاريالاۋعا ەشقانداي نەگىز جوقتىعىن, ال حالىقتى جاپپاي ەگۋ ءتيىمسىز بولاتىنىن حابارلادى. زاڭ بويىنشا ۆاكتسينالاۋ تۋرالى شەشىمدى ينفەكتسيالار بويىنشا ۇلتتىق ۇيلەستىرۋ كوميتەتى قابىلدايدى. «بۇل كوميتەتتىڭ قۇرامىنا ەلدەگى بارلىق ينفەكتسيونيستەر مەن ەپيدەميولوگتار كىرەدى. جۋىردا وتكەن كوميتەت وتىرىسىندا ماماندار جاپپاي ەگۋگە شارا قابىلداۋعا ەرتە دەگەن شەشىم قابىلدادى. بۇل ءوز كەزەگىندە ءتيىمسىز بولادى» دەپ جالعادى ءسوزىن مينيستر. ونىڭ ايتۋىنشا, قازاقستاندا 330 ادام ەرىكتى تۇردە ەگىلگەن. اۋرۋدىڭ تارالۋ قاۋپى بار بولعاندىقتان, بالالار مەن ۇلكەندەرگە ادامدار كوپ شوعىرلاناتىن جەرلەرگە بارۋدى شەكتەگەن ءجون. جيىن سوڭىندا مينيستر جۇرتتى جەكەلەگەن ادامداردىڭ بايبالامىنا ەرمەۋگە شاقىردى.
