قوعامدا بەلسەندى ايەلدەر كوپ. سولاردىڭ ءبىرى ءارى بىرەگەيى – نازگۇل ماقجان. بىرەگەي دەيتىن سەبەبىمىز, ەنەرگەتيكا سالاسىندا بيزنەسىن باستاعان كەلىنشەك از ۋاقىتتىڭ ىشىندە ءوز ءىسىن دوڭگەلەتىپ ۇلگەردى. بيىل نازگۇل سەيىتقوجاقىزى باسقاراتىن «Astels» جشس كاسىپورىنى ەنەرگەتيكا سالاسى بويىنشا ەلىمىزدەگى ەڭ ۇزدىك 10 كومپانيانىڭ قۇرامىنا ەندى.
نازگۇل ماقجان – اقمولا ءوڭىرىنىڭ تۋماسى. ماماندىعى – زاڭگەر ءارى ەكونوميست. قاراپايىم وتباسىنان شىققان ول ەڭبەك جولىن جارناما مەنەدجەرى قىزمەتىنەن باستاپ, «كوكشەتاۋ» گازەتىندە جۋرناليست, ودان كەيىن قر ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنىڭ اقمولا وبلىسى بويىنشا دەپارتامەنتىندە ارنايى جاساقتالعان ءبولىمنىڭ جەدەل ۋاكىلى بولىپ ەڭبەك ەتتى.
«بۇل جەردە 5 جىلداي جۇمىس ىستەدىم. مويىندايمىن, ءوز قىزمەتىمدى دۇرىس اتقارعانىممەن, مۇندا ۇزاق ۋاقىت ىستەي المايتىنىمدى ۇقتىم. بار ويىم كاسىپپەن اينالىسۋ بولدى. كەيىن قازاقستان كوممۋنيستىك حالىق پارتياسى ءباسپاسوز قىزمەتىنىڭ جەتەكشىسى بولدىم. ساياسي ۇيىمنىڭ وڭ ءيميدجىن قالىپتاستىرا ءجۇرىپ, كاسىپ اشۋ تۋرالى ويىمدى ءپىسىپ-جەتىلدىردىم. ناتيجەسىندە بيزنەسكە بەت بۇرىپ, ەنەرگەتيكا سالاسىندا قابىلەتىمدى سىناپ كورگىم كەلدى» دەيدى كاسىپكەر.
ارينە, بيزنەس باستاۋ وڭاي ەمەس. نازگۇل بۇعان دەيىن باسپاحانا سالاسىندا ءوزىن ابدەن شىڭداعان. كاسىبىن بەلگىلى ءبىر دەڭگەيگە جەتكىزگەننەن كەيىن ءوزىن جاڭا قىرىنان تانىعىسى كەلىپ, التى اي بويى قولىنان كەلەتىن بارلىق بيزنەس باستامالاردى ساراپتايدى. سوڭىندا تىڭ سالاعا بەت بۇرعاندى ءجون كورەدى. «مەندە بيزنەس جوسپارلار كوپ بولدى. الدىمەن ءبارىن زەرتتەپ شىقتىم. قاي سالادا باسەكە كوپ, قاي جوبا تابىس اكەلەدى, قانداي كاسىپ سۇرانىسقا يە ەكەنىنە تالداۋ جۇرگىزدىم. ءسويتىپ, 2015 جىلى كاسىپكەرلىككە بەت بۇردىم. ازداپ جيناعان قاراجاتىم بولدى. جانىمداعى سەنىمدى ادامدارمەن اقىلداسا كەلە, شەتەلدىك بەلدى كومپانيامەن ارىپتەستىك ورناتۋ ءۇشىن كەلىسسوز جۇرگىزدىك. ناتيجەسىندە وڭتۇستىك كورەيالىق «LSIS» كومپانياسى ءبىزدىڭ ۇسىنىسىمىزدى قابىل الدى. ولار بىزگە قازاقستان اۋماعىندا وكىل بولۋ قۇقىعىن بەردى. ءسويتىپ, ارىپتەستىك اياسىندا بىرلەسكەن جوبالار قۇرىپ, استانادا ەنەرگەتيكا سالاسىنداعى ۆاكۋمدى اجىراتقىش ءوندىرىسىن شىعارۋدى باستادىق» دەيدى نازگۇل ماقجان.
ايتا كەتكەن ءجون, اتالمىش كومپانيا – دۇنيە ءجۇزى بويىنشا ەلەكترمەن قامتاماسىز ەتۋ, اۆتوماتتاندىرۋ جانە جاسىل تەحنولوگيا سالالارىنىڭ كوشباسشىسى. سوندىقتان مۇنداي ءىرى ۇيىممەن بايلانىس ورناتۋدا مىقتى ستراتەگيالىق جوسپار مەن قارىم-قابىلەت كەرەك-اق.
بۇگىندە نازگۇل باسقاراتىن كاسىپورىن كەرنەۋى 10 كۆ-تىق AVL-1200 اتتى قازاق برەندى بولىپ تابىلاتىن ۆاكۋمدى اجىراتقىش وندىرۋمەن اينالىسادى. ءىرى تۇتىنۋشىلارىنىڭ قاتارىندا ايماقتىق ەلەكتر جەلىلىك كومپانيالارى, استانا ەلەكتروتەحنيكالىق زاۋىتى, قاراعاندى, پاۆلودار, ەكىباستۇز, كوكشەتاۋ, الماتى قالالارىنىڭ كاسىپورىندارى بار. ال ساپاسىنا كەلسەك, وتاندىق ءونىم الەمگە تانىمال Siemens, ABB, Shnyider سەكىلدى بالامالارىمەن بىردەي. حالىقارالىق IEC ستاندارتتارىنا ساي كەلەتىن ءونىمنىڭ قۇنى نارىقتاعى باعادان 30%-عا ارزان.
بيزنەستە ورلەۋ بولعاننان كەيىن, قۇلدىراۋ دا بولادى. كاسىپكەر العاشقى كەزدەرى ەكونوميكالىق قيىندىقتاردىڭ بولعانىن جاسىرمادى. تەڭگەنىڭ قۇلدىراۋىمەن سايكەس كەلگەن بيزنەس جوسپارلار باستاپقىدا ەشقانداي پايدا اكەلمەگەن كورىنەدى.
«مويىندايمىن, ءىستى باستاعان ۋاقىتتا شىعىنىمەن ەستە قالدى. بىراق ءبىز ستراتەگيالىق جوسپارىمىزدى قايتا قارادىق. تاۋەكەل ەتتىك. سەنىمدى قىزمەتكەرلەرىمنىڭ قولداۋىمەن بۇل قيىندىقتاردى دا ارتتا قالدىردىق. قازىر ماماندارىمىزدى كومپانيا ەسەبىنەن بىلىكتىلىگىن ارتتىرۋ ءۇشىن شەتەلگە ءجيى جىبەرەمىز» دەيدى نازگۇل ماقجان.
جاسىراتىنى جوق, ەنەرگەتيكا سالاسىندا كوبىنە تەك ەر كىسىلەردىڭ اتى اتالادى. بىراق نازگۇل ەكى-ءۇش جىلدىڭ ىشىندە الىپ كاسىپورىنداردىڭ باسشىلارىمەن كەزدەسىپ, سەنىمدەرىن اقتاعان. كەلىسسوز جۇرگىزۋدە ساۋاتتى مامان ەكەنىن كورسەتۋمەن قاتار, ايەل ادام رەتىندە كاسىبي قولداۋ بىلدىرەتىن ازاماتتاردىڭ كوپ ەكەنىنە قۋانادى.
ەلباسى وسى سالادا جۇرگەن ازاماتتارعا بيزنەستىڭ الەۋمەتتىك جاۋاپكەرشىلىگى تۋرالى ءجيى ايتادى. بىلىكتى باسشى رەتىندە تانىلعان نازگۇل قايىرىمدىلىققا كەلگەندە ءۇنسىز قالعان ەمەس. جالعىزباستى انالار مەن جەتىمدەرگە, قاريالارعا, مۇمكىندىگى شەكتەۋلى ازاماتتارعا, سونىمەن قاتار داعدارىس ورتالىقتارىنا قول ۇشىن سوزۋدى كوزدەيتىن «شاپاعات» حالىقتىق جوباسىنىڭ ۇزدىكسىز جۇمىس ىستەۋىنە ۇلەس قوسىپ كەلەدى. قىزمەتكەرلەرىنە جوعارى جالاقى تولەگەنى ءوز الدىنا, بالالارى اۋىر ناۋقاسقا شالدىققان وتباسىلارعا اي سايىن قوماقتى قاراجات اۋدارىپ وتىرۋدى وزىنە مىندەت سانايدى.
وتباسىندا شاڭىراقتى, تۇزدە كاسىبىن جايقالتىپ وتىرعان جاننىڭ بويىندا باسشىعا ءتان بارلىق قاسيەت بار. مەملەكەتتىڭ قولداۋىن كۇتپەي-اق, ءوز ءىسىن العا سۇيرەيتىن نازگۇل ماقجان سياقتى ىسكەر قىز-كەلىنشەكتەردىڭ قاتارى قوعامدا كوپ بولسا ەكەن دەپ تىلەيمىز.
گۇلميرا ايماعانبەت