20 اقپان كۇنى استانا كاسىپوداق ورتالىعىنىڭ ۇيىمداستىرۋىمەن ەلوردانىڭ جۇمىسپەن قامتۋ ورتالىعىندا «لايىقتى جالاقى – لايىقتى ەڭبەك» شاراسى ءوتتى.
– شارانى ءدال وسى كۇنى وتكىزۋىمىز كەزدەيسوقتىق ەمەس. 20 اقپان – بۇكىلالەمدىك الەۋمەتتىك ادىلدىك كۇنى. ياعني بۇل كۇندى بۇۇ «قاراپايىم ادامداردىڭ ءال-اۋقاتىنىڭ ارتۋىنا كەپىلدىك بەرەتىن, كەدەيلىكتى جويىپ, ادام بوستاندىعى مەن قۇقىعىنىڭ تاپتالۋىنا جول بەرمەيتىن كۇن» دەپ بەكىتكەن. سوعان وراي, وسى شارانى ۇيىمداستىرىپ وتىرمىز. جالپى, ادامدار وزدەرىنىڭ قۇقىقتارىن جاقسى ءبىلۋى قاجەت. سونىمەن قاتار, ولار كاسىپوداقتىڭ نە ەكەنىنەن, ونىڭ اتقاراتىن جۇمىسىنان دا حاباردار بولۋعا ءتيىس. ويتكەنى بۇگىندە جۇمىس بەرۋشىلەر تاراپىنان ءوز قىزمەتكەرلەرىنە ادىلەتسىزدىك تانىتاتىن جاعدايلار ءجيى ورىن الىپ تۇرادى. بۇل تۇرعىدا قاراپايىم جاننىڭ قۇقىعىن كاسىپوداقتار قورعايتىن بولادى, – دەيدى استانا قالاسى ايماقتىق كاسىپوداق بىرلەستىگىنىڭ توراعاسى تاستانبەك ەسەنتاەۆ.
ونىڭ ايتۋىنشا, مۇنداي شارالاردى وتكىزىپ تۇرۋدىڭ ماڭىزى زور. سونىمەن قاتار, كاسىپوداقتاردىڭ بەدەلىن كوتەرۋ كەرەك. رەسمي مالىمەتكە سۇيەنسەك, بۇگىندە استانادا 105 مىڭداي ادام كاسىپوداق بىرلەستىكتەرىندە مۇشەلىكتە ەكەن. ايتا كەتۋ كەرەك, قر كاسىپوداقتار قاۋىمداستىعىنىڭ رەسمي سايتىندا جاقىندا ارنايى ايدار اشىلىپتى. وندا كاسىپوداق مۇشەسى بولماسا دا, كەز كەلگەن وقىرمانعا ماماندارعا كوكەيلەرىندەگى ساۋالدارىن جازۋعا نەمەسە شاعىمدانۋعا مۇمكىندىك بەرىلگەن.
تاڭەرتەڭگىلىك ساعات 10.00-دەن كەشكى جۇمىس ۋاقىتىنىڭ سوڭىنا دەيىن جالعاسقان شارا بارىسىندا جۇمىسپەن قامتۋ ورتالىعىنا كەلۋشىلەردىڭ بارلىعى ەڭبەك زاڭدىلىعى تۋرالى اقپاراتتان قۇلاعدار بولىپ, ولارعا ارنايى دايىندالعان كىتاپشالار تاراتىلدى.
نۇرداۋلەت كاكىشەۆ
