تۇڭعىش پرەزيدەنت كۇنى مەرەكەسىنە وراي «اق جول» پارتياسىنىڭ وكىلدەرى الماتىداعى «تەمىربەتون-1» كاسىپورنىنىڭ ۇجىمىمەن كەزدەستى.
كەزدەسۋ بارىسىندا اتالعان سەرىكتەستىكتىڭ باس ديرەكتورى اسقار بيسكۋلتانوۆ كاسىپورىن تاريحىمەن, ءوندىرىستى ۇيىمداستىرۋ بارىسىمەن تانىستىردى. 1954 جىلى سالىنعان بۇل ءوندىرىس ورنى بۇگىندە جوعارى ساپالى ءونىم شىعارىپ, 400-دەي ادامدى جۇمىسپەن قامتىپ وتىر. «تەمىربەتون-1» بۇيىمدارى مەن تاۋارلىق بەتوننىڭ بارلىق ونىمدەرى ساپا جاعىنان قاتاڭ باقىلاۋدان وتەدى. كەزدەسۋ بارىسىندا جۇمىسشىلار «اقجولدىقتارعا» وزدەرىن مازالاپ جۇرگەن بىرقاتار ماسەلەلەردى ايتتى. اتاپ ايتقاندا, ولار قالادا تۇرعىلىقتى جەرى بويىنشا تىركەلمەگەن, وسى كاسىپورىندا جۇمىس ىستەيتىندەردىڭ الەۋمەتتىك قولجەتىمدى پاتەر الۋ ءۇشىن كەزەككە تۇرا الماۋى, اۋىر ەڭبەك جاعدايىندا جۇمىس ىستەيتىن جۇمىسشىلاردىڭ زەينەتكە شىعۋ جاسىن 60-قا ءتۇسىرۋ, زەينەتاقى قورلارىندا جينالعان زەينەتاقىنى تولىق الۋ, اۋعان سوعىسى ارداگەرلەرىنە ارنالعان جاڭا گوسپيتال سالۋ, مەكتەپ وقۋشىلارىنىڭ قاشىقتان وقۋ ساپاسىنا قاتىستى ماسەلەلەردى كوتەردى.
«اق جول» قدپ توراعاسىنىڭ ورىنباسارى دميتري ۆاسيلەۆ قالا كاسىپورنىندا جۇمىس ىستەپ, قالا بيۋدجەتىنە سالىق تولەپ وتىرعان جۇمىسشىلاردى تۇرعىلىقتى جەرگە تىركەلمەگەنى ءۇشىن الەۋمەتتىك پاتەر الۋعا تىركەمەۋىن قاتە دەپ سانايتىنىن جانە وسى ماسەلە الداعى ۋاقىتتا مىندەتتى تۇردە شەشىمىن تاباتىنىن ايتتى. سونىمەن قاتار ول ۇكىمەت الەۋمەتتىك كومەك بەرۋدى تەك كوپبالالى وتباسىلارمەن شەكتەمەي, جالپى قازاقستاندىق ءاربىر وتباسىنا بارىنشا جاعداي جاساۋى ءتيىس ەكەنىن جەتكىزدى.