بۇل ءۇي 2015 جىلى پروبلەمالى دەپ جاريالانعان, مۇندا 537 ۇلەسكەر تىركەلگەن. «مەمساراپتاما» رمك-نىڭ جۇمىس جوباسى بويىنشا وڭ قورىتىندىسى بار. نۇر-سۇلتان قالاسىنىڭ قۇرىلىس جانە تۇرعىن ءۇي ساياساتى باسقارماسى سىرتقى ينجەنەرلىك جەلىلەردى سالۋعا كونكۋرس وتكىزدى, الايدا قازىرگى ۋاقىتتا جەلىلەردىڭ قۇرىلىسى باستالعان جوق. «ينجەنەرلىك جەلى تەندەرىن ۇتىپ العان كومپانيا جەلىنى وتكىزۋى كەرەك. ءۇي سالۋ جوباسىن جەڭىپ العان ادامدار ءۇيدى سالۋى كەرەك. اركىم ءوز ىسىمەن اينالىسۋى كەرەك. ءبارى بار سياقتى, بىراق جۇمىس العا باسپاي جاتىر. ەگەر ولار بىزگە قول ۇشىن بەرسە, ءبىز دە كومەكتەسۋگە دايىنبىز. قازان ايىندا سۋ قاتىپ قالادى, سوندا قۇرىلىسشى نە ىستەيدى؟» دەيدى ۇلەسكەرلەر. سونىمەن قاتار, ۇلەسكەرلەر جۇمىس قارقىنىنا نارازى. «قۇجاتتاردى راسىمدەۋ پروتسەسى قىستا ءبارى ورنىندا بولعان كەزدە باستالۋى كەرەك. ال جازدا ۇنەمى بىرەۋ ەڭبەك دەمالىسىندا بولادى. جازدا قۇرىلىس ماۋسىمى قىزىپ جاتقان كەزدە جۇمىس توقتاتىلىپ قالماسى ءۇشىن ماماندار ەڭبەك دەمالىسىنا قىستا شىقسىن. قازىر مۇندا ەكى جۇمىسشى قۇدىقتى تازالاپ, ءبىر-ەكى كۇن اينالاسىندا جۇرە تۇردى, بولدى, بۇل كەشەن اۋماعىندا ەشكىم جوق» دەيدى تۇرعىندار.
قالا اكىمدىگى ۇلەسكەرلىك قۇرىلىسى بار نىسانداردى تەكسەرۋ پروتسەسىن تىكەلەي باسقاراتىن بولادى. «مەن كۇن سايىن ەكى مەزگىل پروبلەمالى نىسانداردى ارالاپ, ۇلەسكەرلەرمەن كەزدەسەمىن. قانداي ماسەلەلەردى شەشۋ كەرەك ەكەنىن جانە قۇرىلىستىڭ نەگە قىمبات ەكەنىن بىلەمىن. قۇرىلىس سالۋشى وزىنە مىندەتتەمەنى العاننان كەيىن, ونى ورىنداۋى كەرەك. ءبىز بارلىق كەدەرگىلەردى ەڭسەرەمىز, بىرگە جۇمىس ىستەيمىز. شەشىمى دە جوق ەمەس. ەڭ باستىسى, قۇرىلىس ماۋسىمى كەزىندەگى ۋاقىتتى بوسقا وتكىزبەي, ءتيىمدى پايدالانۋ قاجەت» دەدى ا.كولگىنوۆ.
