قالادا Nur Otan پارتياسىنىڭ 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى اياسىندا 259 الەۋمەتتىك ينفراقۇرىلىمدىق نىساننىڭ 157-ءسى مۇگەدەكتىگى بار ازاماتتار ىڭعايىنا بەيىمدەلدى. تاعى 102 نىسان يەلەرى مونيتورينگتىك توپتار بەرگەن ەسكەرتۋلەر بويىنشا جۇمىستار جۇرگىزۋدە.
Nur Otan پارتياسىنىڭ 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىنىڭ 84-تارماعىندا مۇگەدەكتەرگە قامقورلىق جاساۋعا باسىمدىق بەرىلگەن. الەۋمەتتىك ينفراقۇرىلىمدىق نىسانداردى ەرەكشە قاجەتتىلىكتەرى بار ادامدار ءۇشىن پاندۋستارمەن, بەيىمدەلگەن ليفتىلەرمەن, دارەتحانالارمەن جابدىقتاپ, كوزى كورمەيتىندەرگە ارنالعان باعىتتاۋشى بەلگىلەر ورناتۋ كوزدەلگەن.
نۇر-سۇلتاندا «كەدەرگىسىز كەلەشەك» پارتيالىق جوباسىن ىسكە اسىرۋ شەڭبەرىندە 22 مىڭ الەۋمەتتىك ينفراقۇرىلىم نىسانىن ەرەكشە قاجەتتىلىگى بار ازاماتتاردىڭ ىڭعايىنا بەيىمدەۋ جوسپارلانعان. بيىل الماتى, سارىارقا, بايقوڭىر, ەسىل اۋدانى اكىمدەرىنىڭ اپپاراتتارىمەن 259 نىساندى (دەنساۋلىق ساقتاۋ, ءبىلىم بەرۋ نىساندارىن بەيىمدەۋ بويىنشا جۇمىستار جۇرگىزۋ جوسپارلانعان, مادەنيەت, سپورت, شاعىن جانە ورتا بيزنەس, مەملەكەتتىك مەكەمەلەر, حالىققا قىزمەت كورسەتۋ ورتالىقتارى, قازپوشتا فيليالدارى, اۋەجاي, ۆوكزال) قۇجاتتاندىرۋ بويىنشا ارنايى توپ قۇرىلدى.
بۇگىنگى تاڭدا 259 نىسان قۇجاتتاندىرىلدى. نىسانداردىڭ مەنشىك يەلەرىنە قنجە تالاپتارىنا سايكەس ەسكەرتۋلەردى جويۋ جونىندە ۇسىنىس حاتتار جىبەرىلدى.
«مۇگەدەك ادامداردى الەۋمەتتىك قورعاۋ» اقپاراتتىق پورتالىنا قۇجاتتاندىرىلعان جانە مۇگەدەكتەردىڭ ءجۇرىپ-تۇرۋىنا بەيىمدەلگەن نىسانداردىڭ دەرەكتەرى ەنگىزىلەدى. ەرەكشە قاجەتتىلىكتەرى بار ادامدار مەن تۇرمىسى تومەن ازاماتتاردىڭ ءومىر ءسۇرۋ ساپاسىن ارتتىرۋعا باعىتتالعان جۇمىستار جالعاسادى.
