ەلوردادا جولدا ءجۇرۋ قوزعالىسىن ۇيىمداستىرۋ ەرەجەسىنە كەزەڭ-كەزەڭمەن وزگەرتۋ ەنگىزىلەتىن بولدى. ەندى كوشە قيىلىستارىندا سولعا بۇرىلۋعا تىيىم سالىنىپ, وعان بالاما رەتىندە كەرى اينالۋ ءۇشىن قاۋىپسىز كەڭىستىكتەر جاسالادى.
پوليتسيا دەپارتامەنتىنىڭ مالىمەتىنە سۇيەنسەك, قوزعالىس قاۋىپسىزدىگىن ارتتىرۋ ءۇشىن بۇعان دەيىن ەشقانداي قۇرىلعىمەن رەتتەلمەي كەلگەن 5 ۋچاسكەنىڭ جاياۋ جۇرگىنشىلەر وتپەلەرىنە باعدارشام ورناتىلعان. تاعى 14 وسىنداي وتپەلەرگە باعدارشام قويۋ جوسپارلانعان.
تۇنگى ۋاقىتتاردا جاياۋ جولاۋشىلاردىڭ كورۋ مۇمكىندىگىن جاقسارتۋ ءۇشىن كۇرە جولدارعا جاقىن ماڭايلار قوسىمشا جارىقتاندىرىلاتىن بولدى. قازىرگى كەزدە بەس وتپە تۇسىنا قوسىمشا جارىق قوسىلدى. الداعى كۇندەرى باسقا وتپەلەردى دە جارىقتاندىرۋ جوسپارلانعان.
كولىك اعىسى كەزىندە جول قيىلىستارىندا قاقتىعىستاردىڭ ىقتيمالدىعىن مەيلىنشە ازايتۋ ماقساتىندا سول باعىتقا بۇرىلۋعا تىيىم سالىندى. سونداي-اق وعان بالاما رەتىندە كەرى اينالۋدىڭ قاۋىپسىز ورىندارى جاساقتالدى. باعدارشامداردىڭ جۇمىس رەجيمىنە ەنگىزىلگەن وزگەرتۋلەر قوعامدىق كولىكتەردىڭ قوزعالىسى مارشرۋتتارىن ەسكەرە وتىرىپ جۇزەگە اسىرىلدى. بۇل بالاما ءتيىستى جول بەلگىلەرى مەن باعدارشامنىڭ كەرى اينالۋ باعىتتاماسىنىڭ سيمۆولى كورسەتىلگەن قوسىمشا سەكتسيا ورناتۋ ارقىلى جاسالعان. جول قوزعالىسىن ۇيىمداستىرۋدىڭ وسى سحەماسىن الداعى كۇندەرى 7 ۋچاسكەگە ەنگىزۋ جوسپارلانعان.
سونداي-اق, 6 ۋچاسكەدە جول قيىلىستارى تۇسىندا اۆتوماشينالاردىڭ قوزعالىسىن ۇيلەستىرۋ بەلگىلەرىنىڭ ۇزىك-ۇزىك سىزىقتارى سىزىلعان. مۇنداي بەلگىلەردى التى جانە ودان كوپ قوزعالىس جولاعى بار بارلىق ماگيسترالدىق جولداردىڭ قيىلىسىندا قولدانۋ جوسپارلانعان.
نەگىزگى قۋات كوزىنەن بەرىلەتىن ەلەكتر ەنەرگياسى ءوشىپ قالعان جاعدايدا, باعدارشامداردىڭ ۇزدىكسىز جۇمىسىن قامتاماسىز ەتۋ ءۇشىن قورعالجىن تاسجولىنىڭ بەيسەكوۆا كوشەسىمەن قيىلىساتىن تۇسىندا اككۋمۋلياتور باتارەياسى ورناتىلدى. مۇنداي باتارەيالار قالانىڭ بارلىق كوشەلەرىنە كەزەڭ-كەزەڭمەن ورنالاستىرىلاتىن بولادى.
سونىمەن قاتار, ساياباق اۋدانىندا جانە ماڭگىلىك ەل – قابانباي باتىر – ساۋران جانە حۋسەين بەن
تالال كوشەلەرىنىڭ توعىسىندا جاڭادان سالىنىپ جاتقان مەشىت اۋماعىندا جاڭا اۆتوجول توسەلەدى. قوزعالىس قاۋىپسىزدىگىن قامتاماسىز ەتۋ جانە كولىك قۇرالدارىن قوياتىن ورىندى انىقتاۋ ءۇشىن جول قۇرىلىسى جۇمىستارىن جوبالاۋعا پوليتسيا دەپارتامەنتىنىڭ وكىلدەرى دە قاتىسىپ, ءوز ۇسىنىستارىن ەنگىزدى.
جۇرگىزۋشىلەردى قالا كوشەلەرىندە بولىپ جاتقان وزگەرىستەرمەن الدىن الا اقپاراتتاندىرۋ ءۇشىن جەتى جول قيىلىسى مەن جولايرىقتاردىڭ ۇستىندە كولىك قوزعالىس باعىتىن كورسەتەتىن جول بەلگىلەرى ءىلىندى. قازىرگى كۇنى مۇنداي بەلگىلەردى جول قيىلىستارىندا ورناتۋ جۇمىستارى قارقىندى جۇرگىزىلىپ جاتىر.
