استانادا ەكىنشى جىل قاتارىنان «Astana Dausy-2018» حالىقارالىق مۋزىكالىق فەستيۆالى ءوتتى. بۇل جولى ەلوردانىڭ 20 جىلدىق مەرەيتويىنا ارنالعان شاراعا كەلگەن ازيا, ەۋروپا جانە امەريكانىڭ 12 مەملەكەتىنىڭ انشىلەرى وزدەرىنىڭ حيتتەرىن ورىندادى. سونىڭ ىشىندە Ninety One توبى, ەركە ەسماحان, گريگوري لەپس, Loreen, ALEKSEEV, اني لوراك, فيليپپ كيركوروۆ, سوگديانا, سوسو پاۆلياشۆيلي, ت.ب. بولدى. كەشتى ءلايلا سۇلتانقىزى جانە اندرەي رازىگراەۆ جۇرگىزدى. بارشا قاتىسۋشىلارعا ارنايى مۇسىنشە تاپسىرىلدى.
مۋز-تۆ تەلەارناسىنىڭ باس ديرەكتورى ارمان داۋلەتياروۆ فەستيۆالگە ەكىنشى جىل قاتارىنان قاتىستى. فيليپپ كيركوروۆ بيىل ءبىراز ءسوز تۋدىرعان «كوڭىل كۇيىمنىڭ ءتۇسى – كوك» اتتى ءانىن شىرقاپ, فەستيۆال وزىنە قاتتى ۇناعانىن جەتكىزدى.
«ەڭ سوڭعى مۋزىكالىق شوۋىمدى وتكەن جىلى 50 جاسقا تولعاندا وتكىزدىم. بۇل باعدارلامامەن كەلەسى جىلى قازاقستانعا كەلۋدى ارمانداپ ءجۇرمىن. بۇل ارمانىمدى ورىنداۋعا ۋادە بەرەمىن» دەدى رەسەي ءانشىسى.
وزبەك ءانشىسى سوگديانانىڭ پىكىرىنشە, «Astana Dausy» حالىقتاردىڭ دوستىق فەستيۆالىنە اينالدى. «كونتسەرتتىك كەستەمىزگە بۇل فەستيۆال باياعىدا ەنىپ, ءبىز وعان ۇزاق دايىندالدىق. بىراق ماراپاتتالاتىنىمدى بىلمەدىم, بۇل ماعان توسىنسىي بولدى. استاناداعى تاماشا كونتسەرتكە قاتىسىپ, جاي عانا ءان سالىپ كەتەم دەپ ويلاعانمىن. وسى فەستيۆالدىڭ جارقىن بولاشاعى بارىنا سەنىمدىمىن» دەدى ول.
ۋكراينا ءانشىسى ALEKSEEV وسىنداي شارالاردا انشىلەر ۇلكەن تاجىريبە جينايتىنىن, بۇل تاجىريبە «ەۆروۆيدەنيە» سەكىلدى بايقاۋلارعا قاتىسقاندا كومەكتەسەتىنىن ايتا كەتتى.
شۆەد ءانشىسى Loreen استاناعا ءۇشىنشى رەت كەلگەنىن, كەلگەن سايىن حالىقتىڭ قوناقجايلىعىنا ءتانتى بولاتىنىن, وسى ەلدە وزىندىك ستيل قالىپتاسقانىن جەتكىزدى.
وسى فەستيۆالگە ەكىنشى رەت قاتىسقان گريگوري لەپس بۇل جولعى شارا العاشقىسىنان اۋقىمدىراق بولعانىن ايتتى. مايكل دجەكسوننىڭ ستيلىندە ءان سالاتىن اقش ءانشىسى برەندون حوۆارد قازىرگى قازاق مۋزىكاسىنان تاۋسىلماس اسەر العانىن جەتكىزىپ, Ninety One توبىمەن دۋەت قۇرۋعا نيەت تانىتتى. جالپى, فەستيۆالدە شەتەلدىك ءبىراز ءانشى ءۇشىن وسى توپ جاڭالىق بولدى. ارمان داۋلەتياروۆ تا ولاردى تالانت رەتىندە ءسوزسىز مويىنداعانىن ايتىپ, ورىس تىلىندە ءبىر ءان جازۋدى ۇسىندى.
