بۇرناعى كۇنى ەلوردادا وتكەن Comic Con حالىقارالىق فەستيۆالىنە پوپ-مادەنيەت سالاسىندا تاجىريبەسى بار ماماندار جان-جاقتان شاقىرىلعان ەدى. بىزگە سولاردىڭ ءبىرى, رەسەيلىك سۋرەتشى-يلليۋستراتور يۋليا نيكيتينامەن اڭگىمەلەسۋدىڭ ءساتى ءتۇستى. ون شاقتى جىلدان بەرى كوميكس جانرىنداعى كىتاپتار شىعارىپ جۇرگەن يۋليا بىلتىر «ءتۇن جارىمىنداعى جەر» تۋىندىسى ءۇشىن كازيمير مالەۆيچ اتىنداعى حالىقارالىق سىيلىقتى يەلەنگەن. سۇحبات بارىسىندا ول جاقسى كوميكس قۇراستىرۋدىڭ قىر-سىرىن ايتىپ بەردى.
كەيىپكەرلەردىڭ شاش ۇلگىسىنە دەيىن جوسپارلاپ الۋ كەرەك
كوميكس-كىتاپ شىعارۋ ءبىر قاراعانداعىداي وڭاي دۇنيە ەمەس. اۋەلى بۇكىل جۇمىستىڭ جوسپارىن جاساپ, ىستەۋ كەرەك شارۋاڭنىڭ كولەمىن انىقتايسىڭ. وندا اڭگىمەنى كادرلارعا ءبولىپ ورنالاستىرعاندا قانشا بەت شىعاتىنىن, قانشا كەيىپكەردى بەينەلەۋىڭ كەرەكتىگىن, تۇپنۇسقانى قاي فورماتتاعى قاعازعا سالاتىنىڭدى انىقتاپ الاسىڭ. ودان كەيىن اڭگىمەنىڭ جانرى مەن مازمۇنىنا ءمان بەرەسىڭ, سول ارقىلى گرافيكا ءتىلىن تاڭدايسىڭ. قورقىنىشتى كينو كورىپ وتىرعاندا, وندا قاراڭعى تۇستەر مەن تۇلا بويىڭدى تۇرشىكتىرەتىن مۋزىكا مىندەتتى تۇردە بولادى عوي. تۋرا سول سەكىلدى, كوميكستە دە وقيعاعا بايلانىستى تۇستەر گامماسىن اۋىستىرىپ, سۋرەتتەرگە جارىق بەرۋ ءتاسىلىن وزگەرتەسىڭ. باعانا كەيىپكەرلەر جايلى ايتىپ قالدىم, بولەك داپتەرگە ءار كەيىپكەرىڭنىڭ جاسى, مىنەز-قۇلقى تۋرالى اقپاراتتى جازىپ, ونىڭ ءتۇر-سيپاتىن, كيىمىن, شاش ۇلگىسىن كىشكەنتاي دەتالدارىنا دەيىن اپ-انىق ەتىپ ءتۇسىرىپ العان دۇرىس. مۇنىڭ ءبارى – كوميكستى سالۋعا كىرىسپەس بۇرىن ورىندالاتىن دۇنيەلەر.
مۇقابا وقىرماندى الدامايتىنداي بولسىن
كەلەسى كەزەڭدە وقيعانى كادرلارعا ءبولىپ ورنالاستىرۋ قاجەت. بۇل پروتسەسس كەزىندە قانداي دا ءبىر ەپيزودتىڭ كوميكستە قانشا بەتتى الاتىنى بەلگىلى بولادى. سونداي-اق كەيىپكەرلەردىڭ رەپليكالارى مەن ءماتىندى دە وسى تۇستا جازىپ الۋ كەرەك. كەيبىرەۋلەر ءماتىن جازۋدى كەيىنگە قالدىرادى, بىراق جۇمىس اياقتالعان سوڭ كەي سوزدەر كادر ىشىنە سىيماي قالۋى مۇمكىن. وندايدا سالعان سۋرەتىڭنىڭ كەي جەرىن ءوشىرىپ, وزگەرتۋگە تۋرا كەلەدى. ياعني ەڭبەگىڭ مەن ۋاقىتىڭ شىعىندالادى.
وقيعانى كادرلارعا ءبولىپ سالىپ شىققاننان كەيىن دەتاليزاتسيا ساتىسىنا كىرىسەسىڭ. بۇل كەزدە سالعان سۋرەتتەرىڭدەگى كىشكەنتاي دەتالداردى انىقتاپ, جەتىلدىرە تۇسەسىڭ. دەتاليزاتسيا بارىسىندا سۋرەتتەردىڭ اجارى اشىلىپ, بۇرىنعىدان تارتىمدىراق كورىنەتىن بولادى.
كوميكستىڭ تۇپنۇسقاسى دايىن بولعان سوڭ, مۇقابا مەن پروموارت جونىندە ويلانۋ كەرەك. ادەتتە, كوميكس جانرىنا ەندى كەلىپ جاتقاندار ەڭ اۋەلى كوميكستىڭ مۇقاباسى مەن پروموارتىن دايىنداپ الادى دا, كوميكستىڭ ءوزىن سالۋعا سودان كەيىن عانا بارىپ وتىرادى. مۇنىڭ كەسىرىنەن كوميكس پەن مۇقابا اراسىندا الشاقتىق پايدا بولۋى مۇمكىن. جالپى, مۇقابا وقىرماندى الداماۋى كەرەك.
ءار كوميكسكە جارتى جىلداي ۋاقىت جۇمسايمىن
كوميكس سالۋدى جوعارىداعىداي كەزەڭدەرگە ءبولۋ سۋرەتشىنىڭ ءىستى سوڭىنا دەيىن جەتكىزۋىنە كومەكتەسەدى ءارى ونىڭ ەڭبەگىن دە شىعىن قىلمايدى. ماسەلەن, مەنىڭ «چارودەيدىڭ ساياحاتى» اتتى ۇشتومدىق كىتابىمنىڭ ءار تومى شامامەن 150 بەتتەن تۇرادى. ونى بىردەن سوڭعى نۇسقاداعىداي ەتىپ جازۋعا وتىرسام, ياعني ءبىرىنشى كادردى دەتالدارىنا دەيىن سالاتىن بولسام, 150-بەتكە جەتكەندە مۇلدە باسقا سۋرەتشىنىڭ جۇمىسى سەكىلدى اسەر قالدىرار ەدى. ويتكەنى پروتسەسس سوڭىنا جەتكەنشە بىرنەشە اي, جىل كەتۋى ىقتيمال. بۇل ۋاقىت ىشىندە سۋرەتشىنىڭ شەبەرلىگى شىڭدالادى, سايكەسىنشە بۇرىنعى جانە سوڭعى جۇمىستار اراسىندا ايىرماشىلىقتار بايقالادى. كوميكس سالۋ جۇمىسىن كەزەڭ-كەزەڭىمەن ىسكە اسىرۋ وسىنداي ايىرماشىلىقتاردىڭ ءىزىن بىلدىرمەۋگە ىقپال ەتەدى.
ۋاقىت دەمەكشى, مەن ءار كوميكستى بىتىرۋگە ورتاشا ەسەپپەن جارتى جىلداي جۇمسايمىن. نەگىزى, بۇل – وتە از مەرزىم. جاقىندا رەسەيلىك ءبىر سۋرەتشى-يلليۋستراتورمەن تانىستىم. ول ون ەكى جىل بويى ءبىر كوميكسپەن جۇمىس ىستەگەن ەكەن.
دەتال ءۇشىن ءارحيۆتى اقتارۋعا تۋرا كەلەدى
سۋرەتشىلەرگە ءجيى قويىلاتىن تالاپتاردىڭ ءبىرى – «ءوز ويىڭنان سالىپ ۇيرەن». بۇل ەرەجەنى كىم شىعارعانىن بىلمەيمىن, بىراق ايتەۋىر سەن الدەبىر نارسەنى ەشقانداي سۋرەتكە قاراماستان ءوز ويىڭنان سالا بىلمەسەڭ, دەمەك – سەنىڭ ناشار سۋرەتشى بولعانىڭ. كوميكس سالۋ كەزىندە وسى ەرەجە مۇلدە جۇرمەيدى. ويتكەنى ادامنىڭ ميى الدامشى. سەن ءوزىڭنىڭ بەس جاسىڭدا جولاق-جولاق سارى قۇلاقشىن كيگەنىڭە بەك سەنىمدى بولۋىڭ مۇمكىن. بىراق ەسكى سۋرەتتەرىڭدى كورگەندە, ول قۇلاقشىننىڭ ورنەگى وزگەشە ەكەنىن, ءتۇسى دە سارى ەمەس, قوڭىر بولعانىنا كوز جەتكىزەسىڭ. ال كوميكستە دەتال وتە ماڭىزدى. اسىرەسە, اۆتوبيوگرافيالىق كوميكستەردى سالار كەزدە ادامداردىڭ كيىمىن, ۇيلەردىڭ ديزاينىن, كوشەلەردىڭ كەلبەتىن دالمە-ءدال بەرۋگە تىرىسقان ابزال. ول ءۇشىن ارحيۆتەردى اقتارىپ, سول ۋاقىتتا تۇسىرىلگەن فوتوسۋرەتتەردى ىزدەيسىڭ. ءتىپتى كەيدە وقيعا ورنىنا بارىپ قايتۋعا دا تۋرا كەلەدى.
كوركەم جازۋ ونەرى وتە ماڭىزدى
كوميكس سالۋدا كوركەم جازۋ ونەرى اسا قاجەت. وقىرماندى كومپيۋتەرمەن ەمەس, اۆتوردىڭ ءوز قولىمەن جازعان جازۋى كوبىرەك قىزىقتىرادى. مەن كالليگرافيا كۋرسىن دا, لەتتەرينگ كۋرسىن دا وقىماعانمىن. سوندىقتان كومپيۋتەردىڭ كومەگىمەن ءوزىمنىڭ جەكە ءشريفىمدى جاساپ الدىم. ونى جاساۋ تۇك قيىن ەمەس. ءبىرىنشى ءوز قولىڭمەن بۇكىل ارىپتەر مەن سانداردى گرافيكالىق پلانشەتكە ءتۇسىرىپ الاسىڭ, كەيىن سودان ارنايى باعدارلامالار ارقىلى جاڭا شريفت قۇراستىرۋعا بولادى. ايتپاقشى, مەنەن كوبىسى «قانداي پلانشەت قولداناسىز؟» دەپ سۇراپ جاتادى. تۇسىنگەنىم, جاقسى كوميكس شىعارۋ ءۇشىن گرافيكالىق پلانشەتتىڭ ءتۇرى اسا ماڭىزدى ەمەس. ول – قىلقالام نەمەسە كەنەپ ءتارىزدى جاي عانا سۋرەت سالۋ قۇرالى. مۇنداعى ەڭ باستىسى, ءوزىڭىز سۋرەتتى جاقسى سالا الساڭىز بولعانى.
وسى جانرعا جاڭادان كىرىسىپ جاتقان جاس سۋرەتشىلەرگە «كوپ وقىڭدار!» دەگەن كەڭەستى ءجيى ايتامىن. كوميكستىڭ اياسى كۇننەن-كۇنگە كەڭەيۋدە. بۇگىندە قوعامداعى كەز كەلگەن وزەكتى تاقىرىپتى كوميكس تىلىندە سويلەتۋگە بولادى. تاعى ءبىر ماڭىزدى نارسە – ۇزدىكسىز ەڭبەك. جالعىز كوميكس سىزگە اتاق تا, اقشا دا اكەلمەيدى. بۇل سالادا ءوز قولتاڭباڭدى قالىپتاستىرۋ جىلدار بويعى ىزدەنىستى تالاپ ەتەدى.
