كىم ءۇشىن جانە قانشا جارنا تولەنەدى؟
زاڭ بويىنشا بارلىق جۇمىس ىستەيتىن تۇرعىنداردىڭ تابىستارىنان مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىنە جارنالار الىنۋى ءتيىس. اعىمداعى جىلى جارنانى تەك جۇمىس بەرۋشىلەر عانا تولەيدى. ونىڭ كولەمى – جالدامالى قىزمەتكەرلەرگە بەرىلەتىن ەڭبەكاقىنىڭ 1,5 پايىزى.
ءسىزدىڭ مەملەكەتتىك قۇرىلىمدا نەمەسە جەكەمەنشىك ۇيىمدا بولسىن, قاي جەردە جۇمىس ىستەيتىنىڭىز ماڭىزدى ەمەس: جۇمىس بەرۋشى ءوز قاراجاتى ەسەبىنەن تولەم جۇرگىزۋگە مىندەتتى. بۇل ءسىزدىڭ جالاقىڭىزعا اسەر ەتپەيدى.
وسى ماسەلەگە كوز جەتكىزۋ ءۇشىن سىزگە اي سايىن بەرىلەتىن ەسەپ پاراعىمەن مۇقيات تانىسىپ شىعىڭىز.
كەلەسى جىلى ساقتاندىرۋ مەديتسيناسى ەنگىزىلگەندە, جاعداي وزگەرەدى. 2020 جىلدىڭ قاڭتار ايىنان باستاپ جۇمىس بەرۋشى ءسىزدىڭ ەڭبەكاقىڭىزدىڭ 1 پايىزىن (2022 جىلى – 2 پايىزدان) ۇستاپ, مەديتسينالىق ساقتاندىرۋ قورىنا اۋدارا باستايدى. ايتسە دە, بەلگىلى شەگى بار – ەڭ كوپ دەگەندە 10 ەڭ تومەنگى جالاقىدان ەسەپتەلەدى.
جۇمىس بەرۋشى جالدامالى پەرسونال ءۇشىن 2020-2021 جىلدارى – 2 پايىز, 2022 جىلى 3 پايىز اۋدارىم جاساۋدى جالعاستىرا بەرەدى.
كىم ءوزى تولەيدى؟
جەكە كاسىپكەرلەر, شارۋا قوجالىقتارىنىڭ يەلەرى جانە جەكە تاجىريبەمەن اينالىساتىن تۇلعالار (جەكە ادۆوكاتتار, سوت ورىنداۋشىلارى, ت.ب.) 2020 جىلدان باستاپ اي سايىن 1,4 ەڭ تومەنگى جالاقىنىڭ 5 پايىز ستاۆكاسى بويىنشا ءمامس جارنالارىن اۋداراتىن بولادى. اعىمداعى جىلدىڭ باعاسىمەن ەسەپتەسەك, جارنانىڭ كولەمى 2975 تەڭگەنى قۇرايتىن ەدى.
ەسەپتەۋ ۇلگىسى:
ەڭ تومەنگى جالاقى 2019 جىلى – 42500 تەڭگە.
42500 تەڭگە ح 1,4 = 59500 تەڭگە.
59500 تەڭگەدەن 5 پايىز = 2975 تەڭگە.
ەڭ تومەنگى جالاقى جىلما-جىل وزگەرەتىندىكتەن, 2020 جىلى جارنا سوماسى وزگەشە بولۋى مۇمكىن. بارلىق تۇرعىندار (دەربەس تولەۋشىلەر) مەديتسينالىق ساقتاندىرۋ ءۇشىن ەڭ تومەنگى جالاقىنىڭ 5 پايىز مولشەرىندە تولەم جاساي الادى. 2019 جىلى – 2125 تەڭگە.
ەسەپتەۋ ۇلگىسى:
ەڭ تومەنگى جالاقى 2019 جىلى – 42500 تەڭگە.
42500 تەڭگەدەن 5 پايىز – 2125 تەڭگە.
تۇراقتى تابىسى نەمەسە رەسمي ەڭبەك شارتى جوق ازاماتتار دا مەديتسينالىق ساقتاندىرۋ جۇيەسىنىڭ قاتىسۋشىسى بولا الادى. مۇنداي مۇمكىندىك جالدامالى ەڭبەك كۇشىن تارتپاي, وزگە جەكە تۇلعالارعا قىزمەت كورسەتىپ, ءوزىن-ءوزى جۇمىسپەن قامتىپ وتىرعان ازاماتتارعا (مىسالى, ساياجايىنىڭ كوكونىستەرى مەن جەمىستەرىن ساتۋمەن, كومىر تيەۋمەن نەمەسە باقشاعا ەگىن ەگۋمەن, بالا كۇتۋشى, رەپەتيتور سەكىلدى جۇمىستارمەن, ۇيدە كومپيۋتەر جوندەۋمەن اينالىساتىن ازاماتتار) بەرىلەدى.
ءوزىن-ءوزى جۇمىسپەن قامتىعان ازاماتتار بىرىڭعاي جيىنتىق تولەم (بجت) جاساي الادى. ەڭ تومەنگى اۋدارىمدار ءۇشىن (0,5 – 1 اەك) ازامات بىردەن ءۇش الەۋمەتتىك جۇيەنىڭ قاتىسۋشىسى بولادى: زەينەتاقى (جۇمىس ءوتىلى ەسەپتەلەدى), الەۋمەتتىك جانە مەديتسينالىق ساقتاندىرۋ. 2020 جىلى كەمىندە ءۇش اي قاتارىنان بجت تولەۋ مەديتسينالىق قىزمەتتەردىڭ ساقتاندىرۋ پاكەتىن الۋعا مۇمكىندىك بەرەدى.
بجت ەسەپتەۋ ۇلگىسى:
رەسپۋبليكالىق جانە وبلىستىق ماڭىزى بار قالالار ءۇشىن – 1 اەك (2019 جىلى 2525 تەڭگە).
اۋىلدىق جەرلەر ءۇشىن – 0,5 اەك ( 2019 جىلى 1263 تەڭگە).
ماڭىزدى! مەديتسينالىق ساقتاندىرۋ جۇيەسى زاڭ ارقىلى ەنگىزىلدى. جۇمىس بەرۋشىلەردىڭ, جك, جەكە تاجىريبەمەن اينالىساتىن ادامداردىڭ جۇيەنى ورىنداۋىن مەملەكەتتىك كىرىستەر دەپارتامەنتى – سالىق مىندەتتەمەلەرىن ورىنداۋ قاعيداتى بويىنشا قاداعالايتىن بولادى. تولەم مەرزىمىن كەشىكتىرگەندەر ءۇشىن ءوسىمپۇل جۇرەدى, قاساقانا تولەم جاسامايتىنداردىڭ شوتىنا تىيىم سالىنادى.
«الەۋمەتتىك مەديتسينالىق ساقتاندىرۋ قورى»
كەاق نۇر-سۇلتان قالاسى بويىنشا فيليالى
