كينو الەمىنىڭ كوكجيەگى

استانادا «Saryarka short film festival» دەپ اتالعان تالانتتى جاستارعا ارنالعان قىسقامەتراجدى فيلمدەردىڭ فەستيۆالى جايىندا ءباسپاسوز ءماسليحاتى ءوتتى.

شارادا فەستيۆال ديرەكتورى ءانۋار نۇرپەيىسوۆ ەلوردادا العاش وتكەلى وتىرعان بايقاۋدىڭ ەرەكشەلىگى جايىندا ءسوز قوزعادى. كەيىنگى كەزدە ەلىمىزدە كينو الەمىنە تالپىنعان جاستاردىڭ قاتارى كوبەيگەنى قۋانتادى. ولار ءتۇرلى باعىتتاعى جاڭاشا فيلمدەر ءتۇسىرىپ, شەت ەلدەردە وتكەن كونكۋرستاردان توپ جارىپ ءجۇر. «ءبىزدىڭ ماقساتىمىز – جاستار تۇسىرگەن فيلمدەردى كورەرمەن نازارىنا ۇسىنىپ, ساراپتان وتكىزىپ, باعاسىن الۋ. بايقاۋ 18 جەلتوقساندا «قازمەديا» ورتالىعىندا وتەدى. ەندى ونى جىل سايىن وتكىزۋدى جوبالاپ وتىرمىز» دەدى ءانۋار نۇرپەيىسوۆ.
– جالىنداعان وتى بار جاستارعا ارنالعان وسىنداي فەستيۆالدىڭ ۇيىمداستىرىلعانى مەنى قۋانتادى. بۇل يگى قادام دەپ ايتۋعا بولادى. سوندىقتان ولاردىڭ تالانتى مەن ونەرىن اركەز قولداۋعا دايىنمىن, – دەيدى قازىلار القاسىنىڭ توراعاسى باۋىرجان نوگەربەك.
بايقاۋدا جەڭىمپازعا بەرىلەتىن باس جۇلدەمەن بىرگە, «ۇزدىك رەجيسسەر», «ۇزدىك وپەراتور», «ۇزدىك ستسەناري», «ۇزدىك ايەل ءرولى», «ۇزدىك ەر ادام ءرولى» سەكىلدى جۇلدەلەر تاعايىندالعان.

ازامات ەسەنجول