كىتاپ ايىرباستاپ الىڭىز!

ەلوردادا بۋككروسسينگ ورىندارى اشىلدى. ەندى ءسىز بۇرىن وقىعان كىتابىڭىزدى سوندا اپارىپ, سورەدەن ءوزىڭىز وقىماعان باسقا كىتاپتى تەگىن الۋىڭىزعا بولادى.

بۋككروسسينگ ايماقتارى ادامدار كوپ جۇرەتىن ويىن-ساۋىق ورتالىقتارىندا, جوعارى وقۋ ورىندارى مەن قوعامدىق جەرلەردە ورناتىلادى. كىتاپ الماستىراتىن ءار الاڭعا وتاندىق جانە شەتەلدىك كلاسسيك اۆتورلاردىڭ ەسىمى بەرىلەدى.
– «بۋككروسسينگ» ۇعىمى – الەمدىك ترەند. اسىرەسە ەۋروپا ەلدەرىنە بارساڭىز, قوعامدىق ورىنداردا, اۆتوبۋس-مەترولاردا بۋككروسسينگ الاڭىن كوپتەپ كەزدەستىرەسىز. كىتاپتار ەلدەن ەلگە, قالادان قالاعا ساياحات جاسايدى. سونداي مۇمكىندىك ەندى استانالىقتاردا دا بار. ءبىر ءوتىنىش, وقىرمانداردان وقۋعا العان كىتاپتارىن, وقىپ بولعان سوڭ ورنىنا قايتا اكەلىپ قويۋىن سۇرايمىز, – دەيدى جوبانى ۇيىمداستىرۋشىلاردىڭ ءبىرى, Social Development Center قوعامدىق بىرلەستىگىنىڭ قوعاممەن بايلانىس جونىندەگى مەنەدجەرى بەيبىت تۇراباەۆ.
ونىڭ ايتۋىنشا, جاقىندا bookcrossing_kz Instagram پاراقشاسىندا «10 اپتا – 10 كىتاپ» چەللەندجى باستالىپتى. ونىڭ شارتىنا سايكەس, وقىرماندار وزدەرىنە ۇسىنىلعان 10 كىتاپتى 10 اپتادا وقىپ ءبىتۋى ءتيىس. سودان سوڭ پاراقشادا الگى كىتاپتاردىڭ مازمۇنى بويىنشا ساۋالناما جۇرگىزىلەدى. سىناقتان وتكەندەرگە 10 مىڭ تەڭگە سىياقى تاعايىندالعان. ال باستى جەڭىمپازعا ەۋروپاعا ساياحاتتاۋ مۇمكىندىگى بەرىلەدى.